Te fundit
Washingtoni sanksionon iranianët e akuzuar për orkestrimin e shtypjes së protestuesve
15 Janar 2026, 20:00Bota
TEMA
Qeveria amerikane njoftoi të enjten se do të vendoste sanksione ekonomike ndaj disa zyrtarëve të sigurisë iranianë, të akuzuar për koordinimin e shtypjes së protestave në vend.
“Udhëheqësit iranianë iu përgjigjën brutalisht protestave paqësore me akte dhune, duke filluar nga masakra në rrugë deri tek sulmet ndaj viktimave të plagosura dhe spitaleve”, denoncoi në një mesazh në video ministri amerikan i Financave, Scott Bessent.
Në përgjigje, Thesari vendosi një seri të re sanksionesh ekonomike kundër interesave iraniane. Veçanërisht është në shënjestër Ali Larijani, në krye të instancës më të lartë të sigurisë në Iran si sekretar i Këshillit Suprem të Sigurisë Kombëtare.
Larijani “koordinoi reagimin ndaj protestave në emër të Udhëheqësit Suprem të Iranit dhe publikisht u bëri thirrje forcave të sigurisë iraniane të përdorin forcën për të shtypur protestuesit paqësorë”, shkruan ministria në një komunikatë, citon L’Orient Le Jour.
Gjithashtu janë sanksionuar katër zyrtarë të tjerë të sigurisë që veprojnë në nivel rajonal në Iran.
“Mesazhi ynë për popullin iranian është i qartë: Kërkesat tuaja janë legjitime. Ju po protestoni për një kauzë fisnike”, deklaroi ministri Bessent në video.
“Mesazhi ynë për udhëheqësit iranianë është gjithashtu i qartë,” vazhdoi ai. “Thesari amerikan e di se, si minjtë që braktisin një anije të fundosur, ju po transferoni me nxitim fondet e vjedhura nga familjet iraniane drejt bankave dhe institucioneve financiare në mbarë botën. Jini të sigurt se ne do t’i ndjekim ato, dhe ju gjithashtu.”
Sanksionet amerikane sjellin ngrirjen e të gjitha pasurive të mbajtura në Shtetet e Bashkuara nga personat dhe entitetet e shënjestruara. Ato gjithashtu ndalojnë çdo kompani ose qytetar amerikan të bëjë biznes me ta, me rrezikun që edhe vetë të goditen nga sanksione.
Më të lexuarat
24 oret e fundit
Javen e fundit
Blog Tema
Lini një Përgjigje