Te fundit
Sali Shijaku, Ekspresionisti i ngjyrave dhe dritës (FOTO)
27 Shtator 2025, 18:59Kulturë
Luljeta Nelallari
“Ekspresion” quhet ekspozita që rikthen në vëmendje një nga artistët më të rëndësishëm të pikturës shqiptare, Sali Shijaku. Në Galerinë Shijaku, publiku është njohur me vepra të paekspozuara të artistit, pjesë e fondit të familjes. Kuruar nga Orges Shijaku dhe familjarët kjo ekspozitë shënon një ngjarje për kulturën shqiptare. Kritikë arti, analistë, njerëz të kulturës, të huaj, ishin të pranishëm në hapjen e ekspozitës, si një moment kujtese në 3 vjetorin e ndarjes nga jeta.
E veçanta e artit të Sali Shijakut, është se çdo figurë e personazh të vjen në trajta të ndryshme, me gjendje emocionale të ndryshme, duke sjellë një evoluim të personazhit. Mes tablove më të rëndësishme ishin “Natyra të qeta”, “Peisazhe” e Legjendat shqiptare, si dhe tablotë me figura madhore si Mic Sokoli, Cercis Topulli, Nora e Kelmendit, duke treguar se arti i Shijakut vazhdon të komunikojë me kohën sot, si një modernist i fuqishëm i dritës dhe ngjyrës.
Kush ishte Sali Shijaku:
Sali Shijaku lindi në Tiranë, më 12 mars 1933 në një familje tregtari të vogël. Pasi kreu Liceun Artistik “Jordan Misja”, të cilin e mbaroi më 1952-shin, me pedagogët Abdurrahim Buza dhe Nexhmedin Zajmi, vazhdoi studimet e larta në Institutin e Lartë të Arteve “I.E.Rjepin” në Leningrad (sot Shën Petërburg gjatë viteve 1956-‘61) pranë ateliesë të prof. Boris Vladimiroviç Joganson, një piktor i njohur, president i Akademisë së Arteve Sovjetike dhe Drejtor i Galerisë “Tretjakov” në Moskë.
Tabloja e titulluar “Heronjtë e Vigut” ishte diploma e studentit Shijaku, të cilën ai e mbrojti në vitin 1962 në Shqipëri, në Institutin e Lartë të Arteve, Tiranë.
E filloi krijimtarinë artistike në fillimin e viteve ‘60. Ai bënte pjesë në grupin e artistëve shqiptarë, që trajtuan tablonë kompozicionale, kryesisht me temë nga lufta, nga historia, nga legjendat, por edhe nga aktualiteti i kohës.
Ai u fut në rrugën e artit figurativ me portretet e para të tij, si: “Portret vajze” (1953, GKA), “Kostum tiranseje” (1952, GKA), duke kaluar gradualisht nga tabloja në tablo drejt kërkimit në portrete të bukurisë, thellimit psikologjik dhe njollave dekorative etj.
Vepra e “Piktorit të Popullit”, Sali Shijaku, karakterizohet nga një gamë e gjerë temash, që gjejnë zgjidhje në forma të ndryshme, shpesh të papritura.
Figurat e pikturuara të përzgjedhura nga piktori, edhe pse kanë një fund tragjik, atë të flijimit dhe të vetësakrifikimit, kthehen në simbole të adhurimit për publikun: për heroizmin ndaj atdheut (Vojo Kushi, 1969), të vetësakrifikimit për kombin (Mic Sokoli, 1976, “Nora e Kelmendit” 1981), të virtytit njerëzor (Rozafa, 1983).
Figura e artistit Sali Shijaku është një nga figurat madhore të arteve pamore shqiptare.
Shteti shqiptar e ka vlerësuar dhe nderuar kontributin e artistit me mjaft çmime dhe i ka akorduar disa Çmime Republike (1956, 1970, 1984, 1989). Në vitin 1969 ai mori titullin “Artist i Merituar” dhe në vitin 1979 “Piktor i Popullit”. Më 2004-ën ai u nderua me titullin “Nderi i Qarkut të Tiranës”.
Një pjesë e koleksionit të veprave të Shijakut janë të ekspozuara në sallat kryesore të Galerisë Kombëtare të Arteve në Tiranë. Veprat e Sali Shijakut ndodhen në shumë vende të botës dhe sot janë pjesë e koleksioneve të koleksionistëve brenda dhe jashtë Shqipërisë.
Më të lexuarat
24 oret e fundit
Javen e fundit
Blog Tema
Lini një Përgjigje