Te fundit
Çfarë po ndodh realisht me Ellen DeGeneres në Angli? Përmbytje, zhvendosje dhe zëra për rikthim në SHBA
8 Dhjetor 2025, 09:48Lifestyle
TEMA
Vetëm një vit pasi u zhvendos në fshatin piktoresk britanik të Cotswolds për të nisur një kapitull të ri larg jetës në SHBA, Ellen DeGeneres dhe bashkëshortja e saj, Portia de Rossi, janë përfshirë në një situatë që ka tërhequr vëmendjen e mediave ndërkombëtare: përmbytje, zhvendosje të përkohshme dhe zëra për rikthim në Shtetet e Bashkuara.
Çifti bleu një pronë luksoze prej rreth 15 milionë paundësh, një fermë 43-akërshe, të cilën e transformoi me investime të mëdha në një rezidencë moderne me shtatë dhoma gjumi, pishinë të brendshme, palestër, sauna, pistë për helikopter dhe ambiente të dedikuara për evente private.
Megjithatë, vetëm pak ditë pas zhvendosjes, zona u përfshi nga stuhi të forta dhe reshje intensive, të cilat bënë që lumi pranë pronës të dalë nga shtrati. Si pasojë, territori përreth u përmbyt, duke e detyruar çiftin të largohej përkohësisht nga shtëpia dhe të zhvendosej në një tjetër rezidencë më të sigurt.
Mediat britanike kanë raportuar gjithashtu për vështirësi me banorët e zonës dhe për sfida të përshtatjes me jetën rurale angleze, shumë ndryshe nga stili i jetesës në Kaliforni. Rajoni i Cotswolds është i njohur si rezidencë e preferuar edhe për figura të tjera të njohura si David Beckham, Kate Moss dhe Simon Cowell.
Në muajt pasardhës, shtëpia luksoze e Ellen DeGeneres është nxjerrë në shitje përmes agjencisë Sotheby’s International Realty, duke shtuar spekulimet se çifti mund të mos e shohë më të ardhmen në Britani.
Megjithatë, vetë Ellen ka reaguar më herët në rrjetet sociale duke mohuar se prona e saj është dëmtuar rëndë nga përmbytjet, duke i quajtur disa raportime “të ekzagjeruara”. Deri më tani, nuk ka asnjë deklaratë zyrtare nga moderatoja e njohur që konfirmon se ajo dhe Portia de Rossi e kanë braktisur përfundimisht Mbretërinë e Bashkuar.
Burime pranë çiftit bëjnë me dije se ato aktualisht ndodhen në Shtetet e Bashkuara për sezonin e festave, por mbetet e paqartë nëse bëhet fjalë për një rikthim të përkohshëm apo një vendim afatgjatë.
Për momentin, e vetmja gjë e sigurt është se ëndrra e qetësisë rurale në Cotswolds nuk ka shkuar sipas planit fillestar, ndërsa e ardhmja e Ellen DeGeneres në Britani mbetet ende e hapur. Burimi: People.com
Më të lexuarat
24 oret e fundit
Javen e fundit
Blog Tema
Lini një Përgjigje