Thaçi: Dora e Isa Mustafës është dorë e së kaluarës

Bisedoi: Muharrem Nitaj, BBC

Zoti Thaçi, do të doja që në këtë fundvit, ju, si njeriu i parë i ekzekutivit të shtetit më të ri në Evropë, të më jepnit një vlerësim për vitin e rëndë të Kosovës, vitin e dytë?

-Ishte një vit i përpjekjeve të mëdha, i një pune shumë vetëmohuese, por ishte një vit i suksesit të jashtëzakonshëm. Që në fillim të këtij viti ne filluam ndërtimin e autostradës Vërmicë-Merdar, një projekt madhor për vendin dhe qytetarët tanë, filluam projektin e realizimit të ëndrrave të qytetarëve të Kosovës, gjithashtu vazhduam me përpjekjet tona për njohje të reja për vendin tonë, kemi arritur në 72 njohje, jashtëzakonisht të fuqishme, pastaj vazhduam me përpjekjet tona për fitoren e jashtëzakonshme në GJND, duke njohur të drejtën ndërkombëtare të shpalljes së Kosovës shtet i pavarur dhe sovran, ndërsa edhe në Asamblenë e Përgjithshme ishte një sukses solid për Kosovën.

Gjithashtu, gjatë kësaj periudhe u ballafaquam me sfidat e rëndësishme të implementimit të kritereve demokratike të Komisionit Evropian për liberalizimin e vizave dhe perspektivën tonë euro-atlantike.

Reformat kanë vazhduar gjatë tërë kohës, në ekonomi, legjislacion, por edhe në politikë, prandaj sot kemi vendin tonë vend demokratik, të sundimit të ligjit, të përpjekjeve në luftë të pakompromis ndaj dukurive negative.

Viti 2010 ishte për Kosovën vit i suksesit historic, në kuptimin e legjitimimit të shtetit dhe përpjekjeve sfiduese për zhvillimin ekonomik, por edhe për rendin dhe ligjin.

Z. Thaçi po më flisni për sukseset historike të Kosovës në vitin kur Kosova pati shumë sfida, një prej tyre është riaktivizimi i procesit gjyqësor ndaj ish-kryeministrit Haradinaj, një tjetër është shpërbërja e qeverisë, dorëheqja e presidentit, që në muajt e fundit u cilësia si krizë politike. Në fakt megjithatë u përballët me shumë vështirësi?

-Unë theksova në kuadër të suksesit jashtëzakonisht të madh që kemi arritur si shtet dhe shoqëri, kemi pasur edhe sfida, të cilat kanë qenë të koklavitura, por kemi arritur që bashkarisht t’i tejkalojmë.

Edhe dërgimi i padrejtë i z.Haradinaj në Hagë ishte një lajm shumë i keq për shtetin, për popullin e Kosovës dhe për familjen e z.Haradinaj. Unë besoj në pafajësinë e tij të plotë dhe kthimin e tij në shtëpi dhe në jetën institucionale të Kosovës.

Ndërsa sa i përket ballafaqimeve të tjera që kemi pasur, unë mund të them se as sot nuk dua t’i përzihem në asnjë rrethanë Gjykatës Kushtetuese në vendimin e vet sa i përket ish-presidentit Sejdiu në rastin e shkeljes së Kushtetutës, ka qenë një vendim i autoriteteve të pavarura kushtetuese dhe për mua ka qenë i respektuar plotësisht.

Zgjedhjet kanë ardhur si rezultat i largimit të presidentit nga presidenca apo shkarkimit të tij dhe në anën tjetër i braktisjes së institucioneve nga LDK-ja, nga presidenca, qeveria, kuvendi.

Zgjedhjet e 12 dhjetorit ishin të suksesshme, të vlerësuara edhe nga ndërkombëtarët, ka mbetur për t’u plotësuar edhe ai vakuumi i izoluar demokratik dhe pastaj të fillojmë implementimin e rezultatit zgjedhor.

Z.kryeministër, procesi i zgjedhjeve të 12 dhjetorit ndoshta ka qenë procesi më i komplikuar që ka pasur ndonjëherë Kosova dhe për herë të parë kemi një kontestim të këtyre zgjedhjeve nga disa forca të caktuara politike. Nuk besoj të ketë qenë shumë komode për ju kjo?

-Zgjedhjet e 12 dhjetorit ishin zgjedhjet e para të lira në Kosovën e pavarur dhe sovrane, zgjedhje këto që arritën standarde të larta ndërkombëtare, të vlerësuara edhe prej SHBA-së dhe BE-së, si dhe prej mekanizmave të tjerë ndërkombëtarë, por në të njejtën kohë edhe nga monitoruesit ndërkombëtarë të organizatës ENEMO.

Ishin sfidë, por i kaluam bashkarisht, nuk ka kontestime, ka deklarime mospajtuese me rezultatin, por kjo është mungesë ose e kulturës politike, ose shprehje e pakënaqësisë me rezultatin zgjedhor që kanë pritur disa parti politike dhe që nuk e kanë fituar besimin qytetar.

Unë besoj që tani jemi në proces të rinumërimit të votave dhe do të kalojmë në procesin tjetër votues në Deçan, Skënderaj dhe Drenas më 9 janar dhe menjëherë në javën e parë pas kësaj do të fillojmë edhe zyrtarizimin e koalicionit për qeverinë e ardhshme me mandat katër vjeçar.

Ky fundviti ju sulmoi në formë shumë të veçantë përmes një raporti të raportuesit të Këshillit të Evropës, Dik Marti, me akuza ndoshta të padëgjuara edhe për ju personalisht. Si e keni përjetuar raportin?

-Unë kurrë në jetën time nuk kisha dëgjuar diçka të tillë. Raporti i Dik Martit është një raport racist, proserb, gebelsian, duke sharë e sharë sa më tepër kundër shtetit të Kosovës, atij të Shqipërisë, drejtuar kundër kombit shqiptar, kundër konsolidimit dhe forcimit të shtetit, kundër njohjeve të reja dhe frymës euro-atlantike të Kosovës.

Pra, Dik Marti ka vazhduar aty ku e kishte lënë Sllobodan Millosheviçi, duke kryer argatin me shërbime të fshehta serbe, por në të njejtën kohë duke përpunuar këto të dhëna edhe në Rusi.

Janë paksa të ashpra reagimet tuaja z.kryeministër, në momente edhe emocionale. Më thoni për aspektin praktik se si ju eventualisht do të mund ta rrëzoni këtë që e quani raport racist?

-Këtë raport e rrëzon vetë realiteti, e rrëzon e vërteta dhe jo gënjeshtra dhe trillimi i Dik Martit. Ne do t’i shfrytëzojmë të gjitha mundësitë legale dhe politike për t’u ballafaquar me këtë padrejtësi, me një të pavërtetë prej më të rëndave drejtuar kombit shqiptar.

Unë do ta ndjek këtë çështje në kuptimin legal të ngadhënjimit të drejtësisë, mbi këto shpifje, intriga ndaj shtetit të Kosovës dhe gjithë shqiptarëve në rajon, por raporti i Dik Martit është drejtuar edhe kundër Shteteve të Bashkuara të Amerikës, edhe kundër NATO-s, edhe kundër BE-së, presidentëve Klinton, Bush, kryeministrit Bler, gjithë personaliteteve dhe miqve që kam bashkëpunuar gjatë çlirimit të Kosovës dhe ndërtimit të pavarësisë, prandaj raporti i Dik Martit do të ketë pasoja për imazhin e shtetit të Kosovës, por e vërteta është në anën tonë.

Keni thënë se po i hapni dyert edhe për një hetim, nëse kërkohet?

-Ne nuk kemi asgjë për të fshehur. Këto shpifje të Dik Martit, të bartura nga libri i Karla del Pontes dhe shërbimet serbe janë hulumtuar tri herë deri tani, një herë nga Tribunali i Hagës, pastaj nga UNMIK-u dhe nga EULEX-i, kështu që është në interesin e shtetit të Kosovës transparenca dhe natyrisht të rikonfirmohet e vërteta.

Keni paralajmëruar ndjekje penale edhe ndaj Dik Martit, në momentin që atij do t’i skadojë imuniteti?

-Unë jam shumë i vetëdijshëm për imunitetit të Dik Martit. Drejtësia vonohet, por ngadhënjen. Do të punoj që mbi Dik Martin të fitojë drejtësia, në kuptimin legal, por edhe drejtësia e Zotit.

Z.kryeministër, po kalojmë në një çështje tjetër, e cila duket se do të jetë sfida e parë e juaja në vitin e ardhshëm. Menjëherë pas përfundimit të rivotimit në tri komuna në Kosovë, ju do të përballeni me sfidën e krijimit të qeverisë. Si do ta krijoni qeverinë dhe me kë?

-Unë jam duke punuar për krijimin e një qeverie shumëpërfshirëse, integruese dhe shumëetnike, që do të garantonte një funksionalitet në interes të shtetit dhe të gjithë qytetarëve të vendit.

Unë do t’ju shërbej të gjithë qytetarëve dhe i falënderoj ata për besimin e lartë që kanë treguar për vizionin tim, duke shënuar një fitore të thellë të PDK-së në zgjedhjet e 12 dhjetorit.

Kjo është një përgjegjësi shtesë, sepse zgjedhjet ishin referendum për qeverisjen time tri vjeçare, pra do të bashkëpunoj me spektrin politik shqiptar dhe joshqiptar, në mënyrë që të nxjerrim një qeveri të konsoliduar, një qeveri të stabilitetit, një qeveri integruese, që punon për Kosovën evropiane, reformatore, për një Kosovë me sundim të ligjit, për një Kosovë e cila do të afrohet shpejt për t’u integruar në NATO dhe në Bashkimin Evropian, por për një Kosovë që meriton marrjen e liberalizimit të vizave në 15 muajt e ardhshëm.

Sa bukur tingëllon kjo që po thoni z.kryeministër. Më thoni, me kë do ta formoni qeverinë?

-Unë do të bëj qeveri me atë spektër që i përgjigjet kushteve apo platformës, prioriteteve që kam prezantuar në fushatën elektorale.

Unë kam prezantuar se do të vazhdoj investimet kapitale, tashmë për autostradën janë ndarë mjetet, rreth 275 milionë euro, do të vazhdoj për reformat në arsim, për rritjen e mirëqenies sociale të qytetarëve, reformat në shëndetësi, pra do të ketë një qeveri që do të punojë për reformat demokratike për Kosovën evropiane.

Prioritetet e mia janë shumë të qarta, janë të një spektri të qendrës së djathtë, pra qeveria do të udhëhiqet prej një spektri që do të garantojë stabilitet, integrim, reforma, shumëetnicitet dhe natyrisht orientim të qendrës së djathtë.

Ndoshta një përpjekje që në qeverinë tuaj të ardhshme të ishin edhe dy aleancat, ajo e z.Haradinaj dhe e z.Pacolli?

-Mentaliteti i së kaluarës nuk do të jetë në qeverinë time dhe natyrisht edhe aventurier politik nuk do të ketë në qeverinë time, pra do të kemi një qeveri të prioriteteve të qendrës së djathtë.

Po spekulohet shumë për krijimin e një qeverie teknike, përsëritjen e zgjedhjeve në vjeshtë…këtë e ka kërkuar edhe lideri i LDK-së, Isa Mustafa. E përjashtoni një mundësi të tillë?

-Fillimisht zgjedhjet do të mbahen në Prishtinë në vitin 2013. Tani jemi duke ndërtuar një platformë që ta kthejë identitetin dhe dinjitetin e Prishtinës.

Jam duke punuar për ndërtimin e Kosovës evropiane dhe nuk do të harroj për të ndërtuar Prishtinën, gjithashtu evropiane. Që ta nxjerr nga ky kolaps, nga kjo ngulfatje, nga ky kaos urbanistik, nga kjo keqqeverisje dhe nga papastërtia numër një në Evropë. Nga ky vizion i munguar evropian për Prishtinën.

Pra, fryma evropiane e Kosovës do ta përfshijë edhe Prishtinën në një të ardhme të afërt. Kjo, me një lidership të ri, me qeverisje të re efektive, duke mos u marrë shumë me politikë, por duke u shërbyer të gjithë qytetarëve të vendit.

Kështu që unë do të punoj maksimalisht që në zgjedhjet e ardhshme në Prishtinë, të ketë një alternativë evropiane për Prishtinën evropiane dhe ajo të nxirret nga një qeverisje e një mentaliteti të së kaluarës.

Zgjedhjet janë me mandate katër vjeçar, zgjedhje këto të cilat tashmë e kanë marrë edhe legjitimitetin qyetar dhe natyrisht edhe mbështetjën e plotë ndërkombëtare.

Kryeministër, po më thoni se zgjedhjet janë mbajtur për një mandate katërvjeçar të qeverisjes, ndërkohë që kundërshtari juaj politik, Isa Mustafa ka deklaruar se ai nuk është i gatshëm t’ju shtrijë dorën e fitorës për këto zgjedhje…

-Ajo është një dorë e së kaluarës dhe unë i shtrëngoj duart me njerëzit e së ardhmes për vendin.

Megjithatë ai ka dalë i dyti në këto zgjedhje…

-Ka dalë siç ka dalë në krye të parties, përmes një revolucioni “jogurt” mund të them dhe të udhëhequrit e partisë në mënyrë demokratike, është diçka tjetër dhe mentaliteti i së kaluarës është diçka tjetër.

Ndërtimi i së ardhmes së vendit më mentalitetin e së kaluarës, është diçka e papërballueshme për frymën euroatlantike për të gjithë qytetarët e Kosovës.

Është vlerësuar se ndoshta njëra prej sfidave të mëdha të Hashim Thaçit në vitin 20011, do të jetë edhe përballja me dukurinë, e cila tashmë është cilësuar si dukuria e korrupsionit. Ju keni thënë se do të qeverisni me duar të pastra. Është një sfidë nëse do të themi se ju do të duhet t’i qëroni hesapet me disa nga bashkëpunëtorët tuaj në vitin e ardhshëm?

-Lufta kundër korrupsionit nuk është punë hesapesh, por është punë e sundimit të ligjit. Ne edhe më herët e kemi zhvilluar një betejë të tillë të ashpër kundër fenomeneve negative, në kuadër të shoqërisë dhe institucioneve kosovare.

Natyrisht se motoja jonë do të vazhdoj të jetë “zero tolerancë” ndaj korrupsionit dhe krimit të organizuar, kudo që paraqitet, në çdo rrethanë që paraqitet, në çdo nivel që paraqitet, në nivel qëndror, lokal apo edhe në mekanizmat të tjerë.

Prandaj, në këtë drejtim pres edhe mbështetjën e mediave të lira, shoqërisë civile, të të gjithë qytetarëve. Unë falendëroj qytetarët për besimin e patundur të treguar për vizionin tim për të ardhmën evropiane katërvjeçare të Kosovës.

Hashim Thaçi, po thuhet se viti 2011 do të jëtë vit në të cilin Kosova duhet ta përmirësojë imazhin e saj ndërkombëtar dhe t’u ofrohet më shumë strukturave ndërkombëtare. Kam parasysh këtu njohjet e reja dhe ndoshta edhe anëtarësimin e saj në OKB.

-Unë do të punoj që gjatë 15 muajve të ardhshëm, të fitojmë të drejtën e liberalizimit të vizave, që gjatë mandatit të ardhshëm Kosova të jetë pjesë e NATO-s dhe unë jam i sigurt për këtë.

Gjithashtu, që të afrohet sa më shumë me Bashkimin Evropian dhe OKB-në.

Është e vërtetë se raporti i Dik Martit ka qenë një goditje për imazhin e Kosovës, por ajo deri në ato momente kishte një imazh të lavdëruar dhe të përshëndetur nga gjithë komuniteti ndërkombëtar, si histori e suksesit.

Unë kam kaluar nëpër sfida të tilla për vendin dhe popullin tim edhe më parë dhe do t’i tejkalojmë dhe të fitojmë bashkarisht edhe këtë goditje nga “racisti dhe proserbi” Dik Marti.

A po ju zvogëlohen apo po ju shtohen miqtë pas këtij raporti?

-Miqtë “pro lirisë” dhe pavarësisë së Kosovës janë të gjithë ata që na kanë mbështetur. Me akuza prej më të ultave, unë jam përballur edhe më herët, prandaj në do t’a vazhdojmë punën për integrimin e Kosovës. Përkundrazi, ëshë vetëm një mobilizim i ri kundër forcave “anti Kosovë” dhe “anti integrim të Kosovës” në NATO dhe në Bashkimin Evropian.

I përmendët disa suksese të vitit që po lëmë pas. Ma thoni vetëm një, që ju synoni ta realizoni në vitin 2011?

-Viti 2011 do të jetë viti për Kosovën evropiane. Viti i reformave demokratike dhe do të jetë viti i liberalizimit të vizave. Do të jemi në muajt e fundit për meritat e liberalizimit të vizave. Do të kemi njohje të reja dhe do të kemi konsolidim dhe forcim të shtetit.

Berisha: Opozitës i ofruam të gjithë mundësitë për hetimin e zgjedhjeve

19:42 Politika

Emigrantët shqiptarë janë shumë të domosdoshëm si për Italinë, ashtu edhe për Shqipërinë

19:39 Politika

Fushë-Krujë - Ja ‘klinika’ e dytë fantazmë e Marti & Del Ponte

19:37 Politika

Topi: Politikanët të dorëzojnë imunitetin që të luftohet korrupsioni

18:23 Politika

Meta në Gjakovë për të falenderuar për ndihmat ndaj Shkodrës

15:10 Politika

Rama: Parlamenti është marrë peng nga dyshja Berisha-Meta

10:36 Politika

Protestat në Qytetin Studenti, roli i Berishës, Alisë, Hajdarit e protagonistëve të tjerë

22:33 Politika

Dështon komisioni, Berisha refuzon hetimin e zgjedhjeve

22:23 Politika

“Janari do jetë muaji i protestave për largimin e një qeverie të paligjshme”

19:16 Politika

Alarm për bombë në ambasadën shqiptare në Romë

16:51 Politika