Te fundit
General, go home!
24 Qershor 2011, 19:15Blog
TEMA
Nga Halil Matoshi
Ardhjen e Agim Çekut nga Kroacia në luftën e Kosovës, njerëzit këtu e kishin pritur me shpresë. Vënia në krye të TMK-së pas luftës do ta bënte Çekun njeriun më të besuar jo vetëm në sondazhet e ndryshme për lidership, por të pranueshëm gjerësisht nga shoqëria kosovare, si njeri me zotësi profesionale dhe me ide të qarta, demokratike.
Drafti i memorandumit mes ministrisë që ai udhëheq (MFSK) dhe ministrisë së brendshme (MPB) i shkruar nga “zyra ligjore” e ministrisë së Çekut doli të jetë joligjore madje e rrezikshme për demokracinë.
Natyrisht, se dokumenti ende nuk ishte nënshkruar, ai fatmirësisht doli në shtyp (Koha Ditore raportoi hollësisht për përmbajtjen e tij të fortë) dhe u bë çështje debati shoqëror, madje arriti edhe para deputetëve të Kuvendit të Kosovës. Gjeneral Çeku mbeti i fyer madje i zemëruar pse dokumenti arriti tek publiku, sepse sipas tij ai ishte krejtësisht në rregull.
Sipas bindjeve dhe koncepteve të tij për ushtrinë, shtetin dhe të drejtat civile.
Gjeneral Çeku dëshironte që t’i rriste kompetencat e FSK-së, ngase ai vërente se për të aty kishte fare pak punë, pra po i mungonte edhe fama e dikurshme dhe besueshmëria e publikut, sidomos pas “ngjitjes” me AKR-në e Behgjet Pacollit.
Ai po vazhdonte ta justifikonte këtë memorandum me policinë e Kosovës, për të kryer detyra si ato që kryen KFOR-i në Kosovë. Mirëpo ai po harronte se KFOR-i nuk është ushtri kombëtare, por mision paqendërtues i NATO-s, i autorizuar nga KS i OKB-ve, për të krijuar një ambient të sigurt në Kosovë. KFOR-i nuk i nënshtrohet asnjë kontrolli civil në Kosovë, pos që i përgjigjet Komandës së lartë të NATO-s, ndërsa secila ushtri kombëtare në secilin vend nominalisht demokratik duhet t’i nënshtrohet kontrollit civil, një ministri civil dhe Parlamentit. Pjesët përbërëse të misionit ushtarak në Kosovë në vendet e tyre të origjinës nuk i kryejnë detyrat për të cilat janë të autorizuar në Kosovë. Madje në vendet demokratike ushtria nuk manifeston rrugëve dhe shesheve, dhe asnjëherë nuk kryen detyra policore duke qenë se ushtritë e vendeve demokratike bëjnë jetën e tyre strikte brenda, në kazerma.
Duke qenë kështu, krahasimi me misionin e KFOR-it është totalisht i paqëndrueshëm. Qysh do qoftë, Çeku si individ mund të zgjedhë mes demokracisë dhe totalitarizmit, mes të drejtave qytetare dhe shkeljes së tyre…
Por, si zyrtar i lartë i shtetit që është, ofertës së tij “mbrojtëse”, qytetarët, duhet t’i thonë: Jo, faleminderit!
Derisa ministri i brendshëm, Bajram Rexhepi e kishte kuptuar jehonën e pakëndshme që mund të ketë drafti dhe fliste për “krehjen” e tij, Çeku nguli këmbë: “Do të nënshkruhet memorandumi”, duke mëtuar qe Qeveria e vendit të ketë si levë për të mbajtur pushtetin, policinë dhe ushtrinë, FSK–ja e cila, ndonëse nuk është ushtri tipike, sipas ligjit, ka 2500 trupa të armatosura lehtë por që populli i Kosovës më qef e sheh si ushtri, një ditë ka mund edhe të bëhej e tillë. Në bazë të nenit 9.3 të Ligjit për FSK-në, ajo duhet të jetë e dizajnuar për të përmbushur detyra mbështetëse të sigurisë (logjistikë teknike në emergjenca) që nuk i përkasin policisë apo organizatave tjera për zbatimin e ligjit. Për FSK-në realisht kompetencat i ka prania ushtarake në Kosovë (zinxhiri komandues) dhe ICO, dhe jo ministri aktual Çeku. Prandaj, përzierja e kësaj force në çështjet civile, objektivisht e largon datën kur mund të ngrihej vërtet në trupë të rregullt ushtarake, konform me ushtritë mobile të NATO-s. Madje, shumë njohës të çështjeve politike dhe të sigurisë, aktin që FSK-ja të rreshtohet përkrah policisë, si “simotër” e saj, sipas fjalëve të Çekut, këtë e shohin si demolim në embrion të vetë idesë që Kosova të bëhet me ushtri. Pra vetë ideja e cenon direkt mundësinë që FSK-ja, një ditë të shndërrohet në ushtri kombëtare të Kosovës. Zëdhënësi i KFOR-it Hans-Dieter Ëichter e bëri të qartë këtë moment, KFOR-i as s’ka ditur gjë dhe as që e mbështet këtë memorandum sepse nuk ka asnjë bazë ligjore.
Prandaj, kush pret që të bëjnë ushtri njerëzit që janë mbi ligjin!?
Derisa Gjeneral Çeku po insistonte me këmbëngulje në planin e tij, u desht që revista prestigjioze gjermane “Der Spiegel” ta kualifikonte intencën e tij si “Përpjekje për puç në Kosovë”, që Çeku të shihte përreth dhe ta pranonte, sado që me gjysëm goje, faktin se nuk kishte përkrahje nga zinxhiri komandues i KFOR-it për një ide të tillë.
Pse kualifikimi i “Der Spegel” është i saktë?
“Ky do të ishte qartë një puç”, i ka thënë revistës një oficier i lartë i trupave paqeruajtëse të KFOR-it. Sipas ligjit FSK-ja është institucion për ndihmë teknike dhe emergjente.
Sipas zyrtarit të KFOR-it, në nenin 3 të memorandumit që e kishin përgatitur dy ministrat, që të dy ish eksponentë të UÇK-së, thuhet se Forcat e Sigurisë së Kosovës në të ardhmen mund të ndërhyjnë në rast trazirash dhe madje të kontrollojnë persona. Nëse miratohen këto rregulla, atëherë elita e vjetër e UÇK-së do të krijonte një instrument plotësues të pushtetit. Tregimin për dominimin e të gjitha segmenteve të shoqërisë kosovare nga ish-guerilja UÇK, tashti nën smokingun e zi dhe kravatë, ky memorandum do ta çonte në finale.
Ky do të ishte fundi i skories dhe fillimi i diktaturës.
Duke e përcjellur me vëmendje rrëfimin e gjeneralit para Komisionit Parlamentar për siguri, mund të thuhet, së paku bazuar në narracionin e tij, se Çeku ishte mospërfillës, madje nënçmues ndaj shtypit të lirë dhe kritikët e qeverisjes, madje nga kryeneçësia se memorandumi i iniciuar mes tij dhe ministrit të brendshëm është krejtësisht OK, qytetarët e edukuar ndihen të dëshpëruar dhe qytetarisht të fyer.
Secili qytetar, si liridashës i atdheut, si i barabartë para ligjit, por edhe si demokrat i bindur do të vuajë, jo pse një memorandum i tillë totalitarist mund të jetësohet, por për faktin pse këso ide të krisura ende e shquajnë mendësinë e lidershipit kosovar.
Ideja është e vjetër, vetëm konteksti është i ri.
Në secilën variant gjeneral Çeku, është dashur të kërkonte falje publike për shqetësimin që ua ka sjellë bashkëqytetarëve të tij, gjë që do të ishte akt i lartë patriotik pra patriotizëm ligjor, që, do t’i jepte kredibilitet të vazhdonte punën si ministër.
Por ai nuk e bëri këtë, madje sjellja e tij mospërfillëse ndaj kritikës shoqërore, i bëri shumë kosovarë të ndihen të pasigurt për të ardhmen demokratike të atdheut të tyre.
Gjeneral Çeku duke mëtuar të shtinte në dorë sa më shumë pushtet, e zverdhi besueshmërinë e shoqërisë kosovare ndaj tij, duke kaluar në anën e atyre që Kosovës po i ofrojnë modelin autoritarit dhe kleptokratik të qeverisjes.
Prandaj, qytetarëve kosovarë nuk u mbetët tjetër pos të shprehen:
Gjeneral, shko në shtëpi, dhe ta gëzoni pensionin!
4 komente në “General, go home!”
Lini një Përgjigje
Lini një Përgjigje
Më të lexuarat
24 oret e fundit
Javen e fundit
Blog Tema
Ne shqiptarët jemi populli më i pasur në botë. Ne kemi më shumë politikanë se sa banorë, më shumë shpëtimtarë se sa viktima.
Kështu si ju zotri Matoshi mund të shkruaj ndonjë i huaj , i cili nuk e njeh Çekun e as situatën në Kosovë . Të thuash se deshi të bënte grushtshtet është naive për të mos thënë mosnjohje totale e problemit .Qëllimin kryesor të çekut e kupton çdo kush : ta bëj TMK në Ushtri të kosovës dhe ai ka qenë një hap për të dalë nga pozita ngujuese ku është sot ushtria e ardhshme . A ka qenë ky hap në kahje të duhur dhe pse është interepretuar kështu , është çështje tjetër .Disa duan me çdo kusht të qojnë pluhur edhe aty ku nuk ka , në baltë .
O KOSOVE ! Merre vete drejtimin e shtetit e leni friken e servilizmin (tradite e shqiptarve) Krijoni ushtrine tuaj merreni veriun dhe ata SERB qe nuk deshirojne te jetojne ne KOSOVE me rregullat e ligjet e KOSOVES te shkojne ne Serbi.
Mattosh. Ky s’eshte asi pari as ifundit artikull i yti anti UCK . Mundet qe Gjen. Ceku ta kete kaluar masen ne draftin e vet, por ai nuk mund te fyhet te shahet dhe aq me teper t’i tregohet dera e shtepise Dhe ju jeni kaq i pafytyre sa ti tregoni jo thjesht deren e shtepise diku ne Prishtine. Jo pa prapamendim ti permend Kroacine si shtepi te tij.Serbet nuk kane bere me pak ndaj Gjen. Cekut. Ku keni qene ju z. Matoshi kur gjenerali la Kroacine dhe erdhi te luftonte ne Kosove? Dhe cfare te keqe sheh ti tek perjekjet e tij per ta nxjerre FSK nga roli “mbeshtetes” qe i kane dhene? Dhe se fundi a nuk tregoni ju se paku perbuzje ne mos urrejtje duke e quajtur UCK “ish guerilja UCK”? Matosh, jane ca kosovare , madje edhe shqiptare(Sali Berisha psh.,) qe hane ne grazhdin e srebeve. Mos dhe ti?