Qeveria s’ka kapacitet t’i ndalë zgjedhjet serbe

Qeveria e Kosovës nuk është shumë e qartë nëse do të lejojë apo jo mbajtjen e zgjedhjeve serbe në territorin e Republikës së Kosovës.

Zyrtarët e lartë në Prishtinë thonë se zgjedhjet janë të kundërligjshme dhe antikushtetuese dhe, si të tilla, nuk prodhojnë kurrfarë efektesh. Megjithatë, Kuvendi i Kosovës, me një rezolutë e obligon Qeverinë që të mos e lejojë fare mbajtjen e këtyre zgjedhjeve.

Mirëpo, zëvendëskryeministri Hajredin Kuçi, rikujton se institucionet e Kosovës kanë probleme në shtrirjen e pushtetit, sidomos në veri të vendit.

“Besoj se të gjithë i dimë ne kapacitetet tona, i dimë limitet e, po ashtu, i dimë edhe mundësitë, por i dimë edhe vullnetet. Shpesh vullnetet duhet të përputhen pak edhe me mundësitë edhe me kapacitetet. Ne ia kemi të bërë të qartë bashkësisë ndërkombëtare, në veçanti Serbisë, por edhe qytetarëve serbë atje që ato zgjedhje janë ilegale, do të trajtohen të tilla, s’do të kenë efekte politike e juridike dhe çdo rezultat eventual, po e them nën thonjëza, nuk do të jetë legjitim, por ne do të ndërmarrim edhe plane konkrete për parandalimin në radhë të parë të tyre, e pastaj për mos-mbajtjen e tyre”, thotë Kuçi.

Ditëve të fundit, kryetari i Kuvendit të Kosovës, Jakup Krasniqi, dhe ministri i Brendshëm, Bajram Rexhepi, thanë se nuk duhet përjashtuar as përdorimin e forcës për ndalimin e zgjedhjeve serbe. Por, zëvendëskryeministri Kuçi dukej më i matur kur është fjala për çështjen e përdorimit të forcës.

“Unë e definoj shtetin kështu: Nuk është shteti aparat i dhunës, por shteti është aparat që ndërton rendin dhe të drejtën dhe kush e shkel rendin dhe të drejtën shteti e ka monopolin me përdorë dhunën. Jam i bindur që këtu rol të veçantë duhet të luajë bashkësia ndërkombëtare, në veçanti BE-ja, që është një lloj garance e raporteve të Kosovës me Serbinë”, thekson Kuçi.

Autoritetet serbe kanë kumtuar se zgjedhjet nëpër disa komuna të Kosovës do t’i organizojnë në koordinim me administratën e Kombeve të Bashkuara, përkatësisht UNMIK-un. Por, zyrtarë të UNMIK-ut, ende nuk kanë një qëndrim të prerë rreth organizimit apo ndalimit të tyre.

“Ne jemi konsultuar me akterët e ndryshëm. Siç kemi thënë edhe më parë, ne do të përgjigjemi kur të kemi kërkesën nga Serbia. Po presim një kërkesë zyrtare, të cilën nuk e kemi ende”, thotë një zëdhënës i UNMIK-ut, Olivier Salgado.

Historia e reagimit të Prishtinës kundër mbajtjes së zgjedhjeve të Serbisë brenda territorit të Kosovës filloi me deklaratën e Kuvendit të datës 22 dhjetor të vitit 2003. Edhe atëherë, Kuvendi i kishte cilësuar të paligjshme këto zgjedhje, por ato janë mbajtur nëpër komuna të banuara me shumicë serbe.

Kurse, administrata e UNMIK-ut, në vazhdimësi kishte deklaruar se nuk i organizon, por as nuk i pengon zgjedhjet serbe. Një reagim dhe skenar i tillë i Prishtinës zyrtare dhe administratës së UNMIK-ut, është përsëritur sa herë që Serbia ka organizuar zgjedhjet e saj edhe brenda territorit të Kosovës, madje edhe pas shpalljes së pavarësisë.

Në rastin e zgjedhjeve të fundit të paralajmëruara nga Serbia, përfaqësuesi i Posaçëm i BE-së në Kosovë, Samuel Zhbogar ka deklaruar se zgjedhjet lokale janë krejtësisht të papranueshme, kurse ato parlamentare, sipas tij, mund të mbahen nën organizimin e OSBE-së, duke pasur parasysh faktin se në Kosovë ka qytetarë me shtetësi të dyfishtë. /rel/

EULEX: Të lirohen Limaj dhe të tjerët e “rastit Kleçka”

18:16 Rajoni

Gadafi sponsorizoi partitë serbe

11:10 Rajoni

Sërish incidente në Maqedoni, sulmohet autobusi me nxënës në Kumanovë

11:01 Rajoni

Hashimi, baba për herë të dytë?

13:09 Rajoni

Krasniqi: Edhe me forcë kundër zgjedhjeve serbe

11:27 Rajoni

BE fonde Kosovës si “Republic of Serbia”

11:22 Rajoni

Ministri serb braktis konferencën për shkak të Kosovës

18:36 Rajoni

Krasniqi: Nuk duhej pranuar fusnota

13:05 Rajoni

Pacolli: Jam lodhur nga politika

13:04 Rajoni

Lugina e Preshevës kërkon autonomi politike

12:00 Rajoni