Komunisti i ‘68-ës mbetet me 68 “kokrra”

Nga Përparim Halili

Proces-zgjedhja e presidentit të Republikës zbuloi fuqinë reale të pushtetit të Berishës. PD, aleat-Gërdeci i saj republikan, “gjenerali i zi” i vitit ’97, “prasi” i Lushnjës dhe “qimeverdhi” inovacionit, nuk janë më mazhorancë, por minorancë me 3 kartona më tepër se opozita. Ky realitet ka kohë që është konstatuar e manifestuar edhe prej vet pushtetit. Megjithëse prej 3 vitesh, po vetë-quhet “mazhorancë”, numerikisht qeverisja “Berisha” nuk ka treguar se është e tillë. Në shumë raste votimesh të ligjeve në parlament, numri i deputetëve të pushtetit, ose i “kokrrave” siç i quan kryeministri, i ka zbritur në 68. Edhe pse numerikisht nuk ka qenë mazhorancë, disa ligje janë miratuar dhunshëm e anti-kushtetueshmërisht në parlament, duke vepruar “haxhiqamilçe”, duke inskenuar makinacione prej dyshes Berisha-Topalli, madje dhe falsifikim me numër votash. Disa ligje psh., janë votuar me “duart” dhe kartonat e 1 deputeti të “instruktuar” të PD, në emër të 3-4 deputetëve të tjerë, të cilët në momentin e votimit në parlamentin shqiptar, hargaliseshin nëpër kabaretë, piknikët dhe plazhet e botës. Disa ligje të tjerë, janë miratuar po me 68 “kokrra”, por me kuorum e pa kuorum të opozitës, pa pasur votat e aleatëve çamë, skraparllinj e “disidentë” majtas-djathtas. Të tjerë ligje, janë miratuar me kontributin e 2-3 “kokrrave” të bashkuara të omonistëve grekë e “patriotëve” çamë, si të disa “kokrrave” të opozitës, që “për inat të nënës e vjehrrës” PS, shkonin e “flinin” me “mullixhiun” e PD. Shumë ligje, janë shtyrë nga seance në seancë, duke mbetur ende pa u miratuar edhe sot e kësaj dite, mbasi votat e pushtetit kanë rënë nën 74, nën 73, nën 71, nën 70, e madje deri në 68 “kokrra”.

Tashmë, mazhoranca është katandisur në 68 “kokrra”. Kryeministri Berisha e di mirë që tani për tani, “laj-thaj” vetëm kaq ka nën urdhër. Sepse kaq “kokrra” ka mundur të “vjelë”, të vjedh e të blej realisht në zgjedhjet e 2009-ës. “Kokrrat” e Skraparit që e mbajtën në pushtet, duket se nuk janë më në xhepin e Berishës. “Kokrrat” e çamëve, që në raste “emergjencash” zëvendësojnë “kokrrat” e skraparllinjve kur këta bëjnë lojëra me parulla fëminore: “harruam të vinim në seancë”, po hiqen si “fuqi, duke bërë presione për të “shqyer” sa më shumë poste të tjera nga pushtet-“kërma PD”. Vota e Priftit varet nga tavolinat e gjykatësve. Mazhoranca ka kaluar në minorancë.

Prej disa ditësh, kryeministri Berisha gjendet në hall për 3-4 “kokrra”, të cilat i duhen për të zgjedhur atë president që do dhe i duhet atij. Ka disa ditë që ka dalë publikisht me “tas” në dorë duke lypur vota. Votat e partisë së “Skraparit” që ka futur në “kontratën” e viti 2009, nuk po i binden më, ka disa muaj e veçanërisht pas “ngjalës” së Lalëzit, që i kanë dalë nga “zgara”. Votat e çamëve janë gati, por kërkojnë konvertim me poste “ku bëhen lekë”. Votat e omonistëve grekë, kërkojnë si shkëmbim detin shqiptar si dhuratë për grekët, kërkojnë një ministri “ku bëhen lekë” dhe një shifër të lartë minoritarësh grekë në “censusin” e popullsisë shqiptare. Vota e mallakastriotit Islami, kërkon si shkëmbim kolltukun e “kafkëthyesit” të vitit 1991. Vota e Oketës, kërkon një president pa këtë Berishë “sulltan” dhe pa këtë mazhorancë të inkriminuar. Opozita po dihet, që nuk do atë president PD-istë, apo klientelistë që do të përzgjedh Berisha.

Edhe vetëm pak orë pas votimit të parë për presidentin në parlament, “mini-mazhoranca” e mbetur ende në “stanin” e kryeministrit Berisha, duket se po shkon pa një emër presidenti. Dhe është e pamundur të gjendet ky emër, qoftë edhe sikur Berisha me 68 “taborët” e tij, të dalë përsëri si në 2002-in kodrave të liqenit për të kërkuar president “dominoje”. Berisha edhe po të jetë “perëndia”, në kaq pak orë të mbetura deri në seancën e votimit në parlament, nuk e gjen dot një emër presidenti, qoftë edhe sikur të bredh nëpër të gjithë stendat e TEG-ut, të QTU, nëpër shkallët e stadiumit “Skënderbeu”, në kompanitë koncensionare të hidrocentraleve, të rrugëve, të kromit e koaludimit të makinave. Berisha edhe po të jetë “magjistar”, në kaq pak orë të mbetura nuk e gjen dot një emër presidenti, qoftë edhe sikur të hedh në veprim Sandrin dhe Fevzon e TV-KLAN-it, analist-moderatorin Çim Peka, apo Çupin e “81 partive”. Troç, Berisha edhe pse është “nëna” e pazareve të pista dhe pakteve të pamoralshme, kuptohet që për votimin e parë nuk e gjen dot një emër presidenti, qoftë dhe sikur të ngarkoj me mision “baba Mondin e OSBE”, atë pazarxhiun austriak të BE Grossruck, Thaçin e Kosovës, apo edhe Fazlliçin. Madje nuk ka kohë për emër, as edhe sikur të njoftoj Fatos Nanon, që të niset me “avionin e parë” nga Vjena.

Raundi i parë e zgjedhjes së presidentit, do jetë pa emër presidenti dhe kjo tashmë është e vetmja alternativë e mbetur e mazhorancës së kthyer në minorancë. Krejt i kapitulluar për mungesë “kokrash”, kryeministri Sali Berisha ngjason me atë “pulën e shushatur” që i ka ardhur “veza” e nuk di nga t’ia mbajë. Vetë nuk e “emëron” dot presidentin e Republikës, mbasi siç dihet brenda “manastirit” PD nuk i ka 71 “murgj”. Katër votat e “besimtarëve” të “baba Likes” së Kulmakut të malit të “Tomorrit”, nuk po “falen” më tek Berisha. Dy votat e “filozofit” çam Idrizi, janë hedhur e po rrotullohen si “zare” bixhozi në tavolinën e Berishës. “Kokrra” Islami, nuk e ka problem të luaj edhe në sekondën e fundit. Përfundimisht, komunisti i ’68-ës Sali Berisha, ka mbetur vetëm me 68 “kokrra” në parlament.

Nikoliqi nuk duhet të jetë në Bruksel më i mirëpritur se Jahjaga dhe Thaçi

21:58 Blog

Dalldi e dëshpërim

20:54 Blog

A do të arrijë opozita e ribashkuar t’i shmangë zgjedhjet e parakohshme?

20:52 Blog

Pse ka rëndësi për mua si kosovar, presidenti i Shqipërisë

20:47 Blog

Sali Berisha dhe “Lëkura prej Shangreni”

18:50 Blog

Meta, midis integrimit evropian ose integrimit në PD

16:47 Blog

“Selmanaj kundër Kosovës”

11:05 Blog

Lotët e krokodilit të Berishës dhe çfarë thoshte dikur Sokol Olldashi për tragjeditë në rrugë

10:49 Blog

Himara, si e "mirë dhe si e keqe"

11:15 Blog 1 koment

Varrmihës demokracie, pjekës rakie dhe popullist proevropian

09:58 Blog