Te fundit
Meta, midis integrimit evropian ose integrimit në PD
25 Maj 2012, 16:47Blog
TEMA
Nga Altin Ketro
Kur sovrani (populli) votoi në parlamentaret e 2009-ës, vendosi të mos i japë asnjë partie shumicën për të qeverisur e vetme vendin. Partia Demokratike doli si forca politike me numrin më të madh të deputetëve, por koalicioni i drejtuar prej saj nuk shkoi më shumë se 70 ndenjëse. Një shifër kjo që kushtetueshmërisht e bënte të pamundur krijimin e një qeverie. Normalisht vendi duhet të rishkonte në zgjedhje të reja politike. Dhe, kur pritej të ndodhte kjo, ndodhi pikërisht ajo që nuk pritej: njëra nga forcat politike që kishte hyrë e vetme në zgjedhje, por që si kazus kishte rrëzimin e Berishën nga pushteti i fituar në 2005-ën, lidhi koalicion me këtë të fundit. Si arsye madhore nxori atë se vendi s’mund të shkonte në destabilitet politik kur përparësia duhet të ishte integrimi dhe me këtë tezë jetësuan të ashtuquajturën “Qeveria e Integrimit”.
U siguruan pra 74 numra, të cilat jepnin siguri për një qeverisje pa probleme. Ndonëse me numër shumë të vogël deputetësh, LSI-ja kërkoi përfaqësim politik në të gjitha nivelet, pasi numrat e saj vërtetë ishin përcaktues për mbarëvajtjen e qeverisjes. Përpos kësaj, ajo mori me vete edhe një kosto politike, pasi tradhtoi shumë nga ata që e votuan pikërisht për të kundërtën e asaj çka vendosi pjesa drejtuese e partisë, qoftë kjo edhe me një Konventë që s’kishte shans të dilte kundër asaj që tashmë kish marrë udhë.
Pushteti normalisht të josh pasi në vende si ky i yni qenia në qeverisje, qendrore a lokale, asnjëherë nuk është parë si mundësi për të mirëqeverisur, për të shpalosur një mënyrë vizionare drejtimi me frymë europerëndimore, për të luftuar të keqen: krim, korrupsion, prepotencë, arrogancë, monopol, oligopol …; e për t’i dhënë udhë të mirës: duar të pastra, drejtësi sociale, treg i lirë, i hapur e konkurrues, përunjësi, ndershmëri …
Vajtën si vajtën gjërat dhe ajo që hyri në bashkëqeverisje si garantuese jo vetëm për integrimin, por edhe si një pengesë që qeverisja e re s’do mund të përsëriste prapësitë e 4-vjeçarit të mëparshëm, ra në po të njëjtat ujëra të pista të moçalit “korrupsion”.
Si të tillë ata u infektuan me po atë sëmundje që po dergjte forcën bashkëqeverisëse duke pasur tashmë të dyja të njëjtën diagnozë. Ndonëse sëmundja mbetet sëmundje, ka edhe ilaç për ta kuruar. Kura është e vështirë, kortizonale, që jep edhe efekte anësore, por nëse s’të shpie drejt vdekjes, pa pasoja nuk të lë.
Por që ta luftosh sëmundjen duhet edhe vullnet i brendshëm, sepse po e lëshove veten ajo të përpin dhe s’ka ilaç që të bën derman. Vullneti është çështje karakteri që në rastin tonë s’i përket një individi pasi tërësia e interesave shtrihet përtej një njeriu të vetëm e nis si fillim në formë vertikale në kupolën drejtuese e pastaj në formë horizontale shtrihet deri në bazë. Dhe rrezja horizontale, tashmë e zgjeruar, kur shkon në pikën e saj fundore përplaset fortë dhe rikthehet edhe më e fortë andej nga u nis.
Nëse fillimi i aventurës kishte në brendi njerëz idealistë që vinin më së shumti nga papunësia por me një dëshirë, për të parë një formë qeverisëse që ata mendonin se duhet të ishte ashtu siç edhe besonin, me kalimin e kohës dhe rehatimin në vende pune që iu sollën të mira materiale në një kohë të shpejtë, ku ligj nuk ishte Ligji, ai i shkruari në Kode e miratuar në Kuvend, por ai i shkruari në Marrëveshje e i jetësuar në përqindje qeverisje, atëherë, kjo e dyta, i bëri grykës të mëdhenj, shtatanikë në padurim dhe nga garantues të ligjshmërisë u bënë dubëlshpërdorues të bashkëqeverisjes.
Marrëveshja është marrëveshje, thotë i vogli, dhe ne do e respektojmë atë, pra qeveria do mbahet si do mbahet, por deri më 2013-ën ka për ta shtyrë. Domethënë hajde të qeverisim nën korrupsion. I fëlliqur ti, i fëlliqur unë, përshtypje nuk na bën sepse kemi marrëveshjen që na mban më këmbë. Pra, i bie që edhe “pavarësia në korrupsion” të jetë pjesë e marrëveshjes. Të kuptohemi, ka marrëveshje publike të shkruara e zeza mbi të bardhë e të firmosura me bojë të njomë, por ka edhe marrëveshje të nënkuptuara, “të firmosura” me frymë të thatë. E para mund të jetë shumë e bukur, por duhet t’i ruhemi kësaj të dytës, sepse kjo na merr më qafë.
Kësaj marrëveshjeje qeverisje ia kuptuam përmbajtjen dhe synimet e saj i shfaqën me aq transparencë e siguri, saqë as ligji penal s’u bëri dot gjë. E vetmja pikë që ende mund t’i japë kuptim asaj palo marrëveshje është ajo për integrimin e vendit. Aaa prit, se këtu nuk e kemi vetëm ne në dorë. Këta partnerët ndërkombëtarë që na ndihmojnë në rrugëtimin tonë të padrejtim për t’u integruar (busulla është me defekt), na kanë përcaktuar disa prioritete për t’i realizuar. Midis shumë prej tyre që vërtetë janë thelbësore për ecurinë e mëtejshme të shtetit të së drejtës dhe demokratizimit të plotë të vendit është futur edhe çështja e zgjedhjes së Presidentit. Jo si pikë e drejtpërdrejtë, por e artikuluar shumë shpesh së fundi edhe në publik, paçka se në kanale diplomatike asaj po i jepet prioritet.
Në vitin e largët 2002, kryetari i vogël i partisë bashkëqeverisëse [me interesimin e europartnerëve] ndali kryetarin e partisë së tij të katapultohej si kreu i shtetit duke i dhënë mundësinë opozitës së kohës të propozonte një emër të sajin dhe nën konsensus e votuan të dyja palët. Sot ai ka sërish shansin të kontribuojë që bashkëqeverisësi i tij ta fusë procesin në frymën e konsensusit me opozitën. Nëse Sali Berisha nuk e konsideron, Ilir Meta ka gjithë të drejtën e bllokimit. Një të drejtë që siç e theksova qysh në hyrje, ia ka dhënë sovrani.
Kjo s’do të thotë që me këtë veprim Meta dhe gjithë ajo pjesë e korruptuar e LSI-së në administratë pastrohen. Thjesht ai zbaton pikën që e ka shumë për zemër, integrimin. Jo se do integrohemi sapo të zgjedhim Presidentin, por duke qenë se edhe kjo çështje është futur si njësi matëse për klasën politike, atëherë ai ka obligim për ta çuar përpara të vetmen pikë që ia justifikon bashkëqeverisjen. Dhe për këtë duhet të flasë hapur, qartë e pa asnjë mëdyshje me aleatin e madh bashkëqeverisës. Takimi i parë i tyre tregoi një Berishë më të tërhequr nga idea fillestare për të zgjedhur nga radhët e veta Presidentin. Por Berisha është gjithnjë i paparashikuar dhe zgjedhja e Presidentit mbetet e vetmja çështje ku Meta të mund të tregojë se është dikushi në atë koalicion. Nëse nuk arrin të faktorizohet edhe kësaj here, atëherë është i lutur të mos na e përmendë më atë fjalën e bukur, integrim. Sepse i vetmi integrim që do i mbetet të bëjë, është të futet në strukturat e Partisë Demokratike.
7 komente në “Meta, midis integrimit evropian ose integrimit në PD”
Lini një Përgjigje
Lini një Përgjigje
Më të lexuarat
24 oret e fundit
Javen e fundit
Blog Tema
Dy fetyrat me te korreptuarit ne bote.Mjer vatani e mjer mileti kush qeverisin.Skane per te ikur mos u lodhni kot,se kane parane tone qe na kane vjedhur,meparat tona do rrine ne pushtet edhe 30 vjet te tjera
Turp i zotit, politika shqiptare ne dore te ketij!
Ky integrues?!!! Pika qe s’ju bie! Ky eshte nje cope hajduti ordiner!!!!
Padyshim qi mes ktyne opsioneve kaptin-lopa duhet me zgjedh integrimin me Doktorin nryshe si ka punet hiq mire.
E kush del kunra Doktorit veqse te kqia e gjejn
Vete konstatoj se Meta eshte integruar ne PD, por edhe ne Europe e ShBA sepse keshtu te korruptuar dhe grabites te Pasurise se popullit i duan politikanet shqipfoles dy te medhenjte ShBA dhe Europe.
OSE INTEGRIMIT DREJT BURGUT SE NUK JA FALIN AS BERISHA AS RAMA(21 JANARIN) AS NANO ,I ERDHI RADHA .
Kur flet dhe ti per korrupsion qe ti u turperove dhe prej atij Saliu je jashte hekurave te burgut pasi ato qe kishe bere nuk ishin montazhe por te verteta ,ti je nje tradhetar i etur per pushtet dhe nuk e bere per stabilizimin e vendit por e bere per xhepin tend dhe klaneve te tua .Ti nuk ke te drejte te flasesh per korrupsion se ti duhesh ne burg sot ke vjellur popullin dhe kjo doli qarte ne vidiot e Priftit qe ti e bere dhe te cmendur por ai ishte ne rregull.Je nje mashtrus ,tradhetar, hipokrite fjalet me te keqia qe me vijne ne mend mund te them.mos del fare ne shesh me Ramen bashkepuno se ke te njejten koke me te .Njeri i ulet cfare nuk te beri Rama dhe ti sot u bashkove me te .shkon nga fryn era e pushtetit .Berisha do fitoj se eshte i drejte dhe ka bere dhe po mundohet .