Te fundit
Begirishtajn, drejtori i ri i sportiv te Siti
28 Tetor 2012, 17:28Sport
TEMA
Mançester Siti po mundohet të rikrijojë edhe një herë stafin që ndërtoi sistemin aktual të Barcelonës, pasi ka zyrtarizuar emërimin e Çiki Begirishtajn si drejtor sportiv në këtë klub. Ish-drejtori sportiv i Barcelonës ka për detyrë të ndërtojë tashmë nga e para sistemin e rekrutimit të talenteve të rinj, me synimin për të krijuar të njëjtat kushte zhvillimi si te katalanasit.
Sipas deklaratës së vetë klubit anglez, ish-futbollisti i kombëtares spanjolle ka mbajtur këtë pozicion për 10 vite në radhët e katalanasve, i larguar në vitin 2010 nga klubi, ndërsa tani do ët ketë për detyrë të mbështetë trajnerin Roberto Mançini në rekrutimin dhe veprimtarinë e skuadrës së parë.
Ndërkohë, personi që mbante këtë detyrë deri tani, Brajan Marud, do të kalojë si drejtor i akademisë së re të klubit që do të fillojë punën duke filluar nga sezoni i ardhshëm.
“Jam shumë i lumtur që më është ofruar një mundësi kaq e shkëlqyer”, ishin fjalët e para të Begirishtajn si pjesëtar i stafit të Mançester Sitit. “Progresi dhe arritjet e Mançester Sitit në fushën e lojës janë të dukshme për të gjithë dhe jam i nderuar që më është dhënë mundësia të kontribuoj për përmirësimin e këtij klubi në të ardhmen”, tha ai.
Me kalimin e Begirishtajn si dhe emërimin e pak javëve më parë të Ferran Soriano si shef ekzekutiv të klubit, Mançester Siti ka krijuar bërthamën e Barcelonës së tre viteve më parë dhe mediat angleze spekulojnë se tashmë transferimi i radhës është ai i Pep Guardiolës në drejtimin e skuadrës. Për këtë arsye, është mësuar se trajneri Roberto Mançini ka kërkuar një mbledhje urgjente me drejtuesit e klubit, për të sqaruar pozicionin e tij në të ardhmen, por edhe për të kërkuar ndihmë që të administrojë sa më mirë mosmarrëveshjet me një pjesë të lojtarëve.
Lini një Përgjigje
Më të lexuarat
24 oret e fundit
Javen e fundit
Blog Tema
