INTERVISTA/ Prifti: Shanset për sukses të mazhorancës së re

Dritan Prifti, dikur një personalitet shumë aktiv në politikë, qeverisje, media, apo mes elektoratit, sot është një person që merret me biznes, konsulencë, por e ndjen se i paska marrë shumë kohë edhe familjes apo miqve, të cilët sot e kanë më pranë se herët e tjera.

Dritan Prifti kësaj radhe nuk arriti të futet në Kuvend. Pse?

Ka dy arsye pse nuk u futa në këtë Kuvend: E para, sepse më vodhën rreth 6,000 vota, të cilat i evidentova pasi mora gjithë filmimet e numërimit të votave nga KQZ. Dhe, e dyta, sepse Kodi Zgjedhor është diskriminues, duke kërkuar dy herë më shumë vota për tu zgjedhur si kandidat i pavarur, sesi për një kandidat të çfarëdo partie brenda koalicionit. Për këtë diskriminim unë kam marrë pjesë në një grevë urie të bërë në sallën e Parlamentit në vitin 2008. Edhe pasi më vodhën rreth 6,000 vota, unë përsëri arrita të merrja zyrtarisht rreth 6,200 vota. Ka deputetë në `Kuvend sot që kanë marrë më pak vota se unë. Megjithatë, unë kam thyer një rekord historik. Kam marrë vota më shumë se çdo deputet tjetër i pavarur në historinë e Shqipërisë. Nuk besoj se si kandidatë të pavarur Rama, Berisha apo ndonjë tjetër do merrnin më shumë vota se unë.

Votat e mija janë vota zemre nga ata njerëz që kanë vlerësuar shërbimin tim në 12 vjetët e shkuar.  Unë isha një individ neë zgjedhje që nuk kisha komisioner dhe askush nuk mi mbronte votat; përkundrazi, hajdutët tradicionalë të votave u sulën si ujqër mbi votat e mia dhe arritën ti merrnin. Kur një përfaqësues i PDIU-së kërkoi të mbronte votat e mia në Lushnjë, një deputet i PS iu vërsul me fyerje e kërcënime.  Dhe, në Mallakastër votat e mia i vodhi PS-ja, kurse në Fier ato i mori PD dhe LSI.  Në Tiranëm hajdutët e votave i mbrojti KQZ-ja që nuk pranoi të hapte asnjë kuti të vetme për teë parë se çfarë kishte ndodhur në Qarkun e Fierit.  Ata që vjedhin votat nuk e kanë për gjë të vjedhin edhe taksat e popullit. Vjedhin votat që të kenë mundësi të vjedhin Shqipërinë.

Çfarë fitoi dhe çfarë humbi Shqipëria me zgjedhjet e 23 qershorit?

Për hir të së vërtetës, duke u distancuar nga historia ime personale, me zgjedhjet e fundit, mendoj se Shqipëria ka fituar shumë me këto zgjedhje. Ishte mirë që u largua qeverisja e PD-së. Vendi kishte nevojë për ndryshim.  Ndërkombëtarët kishin nevojë të shihnin ndryshim gjithashtu. Të paktën, me këto zgjedhje, kemi fituar besimin e partnerëve ndërkombëtarë, dhe besoj se procesi i fitimit të statusit kandidat të BE-së do jetë i shpejtë.  Të tjerat mbeten për tu parë.

Besoj e keni lexuar programin e qeverisë Rama. Cili është gjykimi juaj? A ka mundësi zgjidhjeje të problematikave që ka Shqipëria me këtë program?

E kam lexuar programin e qeverisë Rama. Në letër duket ambicioz. Programi vendos gishtin mbi problemet që ka ky vend, por rruga se si duhen zgjidhur problemet është e paqartë.  Programi nuk tregon rrugën dhe nuk jep as burimet e financimit. Por, për mua është shpejt për kritika. Duhet parë se si do të ecë puna e qeverisë, të paktën për 6 muaj, përpara se dikush të ketë të drejtë peër kritika.  Shqipëria ka mundësi të jashtëzakonshme zhvillimi.  Çdo gjë varet nga qeverisja.

Po opinioni juaj për kabinetin qeveritar? A janë oferta më e mirë qeverisëse që mund të ofronte Rama në këtë periudhë?

Ka dy mënyra për të qeverisur një vend në mënyrë demokratike. Mënyra e parë është që qeveriset nga Kryeministri, me një ekip politik që zbaton me përpikmëri porositë dhe vizionin e tij. Mënyra tjetër është të drejtohet nga kryeministri me një ekip profesionistësh, ku vendimet merren në mënyre kolegjiale.  Rama ka zgjedhur të drejtojë me një ekip politik, duke marrë mbi vete gjithë përgjegjësitë e qeverisjes, edhe për ministritë e veçanta. Në këtë qeveri shumica e ministrave nuk kanë eksperiencë drejtimi në fushat që mbulojnë. Megjithatë, unë dëshiroj me gjithë zemër që kjo qeveri të ketë sukses, sepse Shqipëria është në një pikë shumë të keqe. Varfëria është ulur këmbëkryq në 50% të familjeve shqiptare dhe mungesa e perspektivës kërcënon gjithë rininë e këtij vendi.  Ata duhet të kenë sukses për të mirën e këtij vendi.

Ju keni qenë kritik me koncesionet këtë periudhë. Çfarë duhet të bëhet me koncesionet, sidomos ato që janë dhënë gjatë vitit elektoral? A është zgjidhje anulimi i tyre?

Unë nuk mendoj se koncesionet duhen anuluar apriori, pa i kontrolluar si janë dhënë, kush i ka marrë dhe a janë duke plotësuar detyrimet kontraktore?  Ka kompani serioze që kanë marrë koncesione, ashtu siç ka kompani që janë një mbulesë për qeveritarë që kanë marrë koncesionet.  Puna duhet bërë me korrektësi dhe pa nxitim.

Zbatimi i detyrimeve kontraktore duhet të jetë kriteri i vetëm që t’i vlerësoj ato.  Puna e qeverisë në vitin zgjedhor ka qenë legjitime dhe ajo duhet të vazhdonte të punonte. Kurse koncesionet, lejet, privatizimet që janë bërë pas ditës së zgjedhjeve, 23 qershorit, duhen anuluar të gjitha.

Këto veprime qeveria që humbi zgjedhjet nuk kishte të drejtë t’i bënte.  Qeveria pasi humbi zgjedhjet duhet të qëndrojë në detyrë për të ruajtur paramentrat bazë ekonomike të vendit dhe të përgatitet për të bërë dorëzimet. Kjo pjesë duhet korrigjuar me Kushtetutë. Qeveria e re duhet të mbledh Parlamentin dhe filloi punën menjëherë pasi shpallet zyrtarisht rezultati i zgjedhjeve, dhe nuk duhet të presë javën e parë të shtatorit për të filluar punën.

Qeveria po e merr drejtimin e vendit, kur ekspertët flasin se mund të ketë krizë energjitike në fundvjeshte. A mendoni se mund të ketë probleme? (KESH anuloi tenderat për blerjen e energjisë gjatë vitit 2014)

Nuk besoj se do të ketë problem, nëqoftëse qeveria nuk dëshiron të ketë problem.  Kriza energjitike zgjidhet me para, dhe nëqoftëse Qeveria do importojë energji, nuk do ketë asnjë problem. Askush nuk do pranojë të rikthehet kriza energjitike, kur kemi disa vjet që nuk e ndjejmë.  Qeveria Berisha investoi mirë në këtë drejtim.  Ata gabuan me privatizimin e shpërndarjes, dhe sigurisht, gabuan me largimin e CEZ-it. Përgjegjësia e Qeverise Rama është e madhe tani, sepse importi energjisë është përsëri detyrim i Qeverisë, dhe jo i CEZ-it si 4 vitet e fundit. Dështimi i CEZ-it është një përgjegjësi e shtuar mbi Qeverinë e re, e cila nuk do ta ketë të lehtë.

Duket se ka rënie të ndjeshme të grumbullimit të taksave nga tatimet dhe doganat. A jeni edhe ju i mendimit se taksimi progresiv do të shëndoshin disi financat e vendit?

Unë jam për tatimin e sheshtë. Situata financiare nuk është e vështirë për shkak të tatimit të sheshtë apo progresiv.  Situata është kështu për shkak të keq-qeverisjes.  Do isha dakord që kompanitë celulare të taksoheshin më shumë, industria e lojrave të fatit, alkoli dhe cigarja, por nuk do isha dakord me ndryshimin e tatimit 10% për bizneset prodhuese apo ato që punësojnë.

Bizneset prodhuese dhe ato që punësojnë janë në vështirësi për shkak të akcizës shumë të lartë dhe të padiferencuar të karburantit. Biznesi nuk po fiton për shkak të arrogancës së tatim-mbledhësve dhe gjobave pavend të tyre.  Unë them se, nëqoftëse përmirësojmë administrimi e taksave, ka vend dhe për ulje taksash. Rritja e taksave është e pavend.

A ka shanse që Shqipëria të marrë statusin e vendit kandidat tani këtë vjeshtë?

Besoj se brenda vitit kjo mund të arrihet. Shumica e shqiptarëve këtë e shohin si fitore, por unë mendoj se ky proces duhet studiuar mirë. Statusi kandidat na intereson, por anëtarësimi duhet studiuar mirë, në mënyrë që ai të bëhet me kushte pozitive për ekonominë tonë të vogël.

Çfarë mendimi keni për ministrat e LSI-së? Ju i njihni mirë të gjithë ata.

Më duket strategji e menduar mirë që LSI tani kontrollon sistemin e drejtësisë në vend; që nga Parlamenti, KLD apo Ministria e Drejtësisë. Për të qenë i sinqertë, unë ministrat i respektoj individualisht. Kam vlerësim për investimin e tyre në LSI dhe shpresoj t’i marrin detyrat seriozisht.

Për interes të lexuesve, çfarë angazhimesh keni tani që jeni jashtë parlamentit?

Unë do të vazhdoj të bëj atë që kam bërë prej kohësh. Do punoj të ndihmoj këtë vend të thith sa më shumë investime të huaja dhe të zhvillohet, dhe do ndihmoj njerëz në nevojë të përballojnë jetën e vështirë.  Nuk do të largohem nga Shqipëria, siç mund të shpresojnë disa. Do të kaloj më shumë kohë me familjen time. Do të përpiqem të korrigjoj gabime dhe mangësi të së kaluarës.

Përbërja e komisioneve dhe delegacioneve/ Sali Berisha dhe Taulant Balla do të udhëtojnë bashkë?

18:58 Politika

Në arrati/ Shemsie Kadria fiton pafajësinë, prokuroria kërkoi 12 vite burg

18:46 Politika

Pengmarrja 300 mijë USD, një histori e trilluar për të bindur vëllain të shesë tokën

18:39 Politika

INTERVISTA/ Meta për Klan Kosovën: Kemi pasur vijat e kuqe edhe në koalicionin me PD

17:25 Politika

Komisioneri i KiE: S’kanë dalë para drejtësisë përgjegjësit e 21 janarit, sidomos ata që prishën provat

16:52 Politika

Auron Tare, denoncuesi i parë në portalin e PD-së për shkarkimet nga puna

15:30 Politika

PD akuzon Ramën pse po… rikonstrukton Kryeministrinë: Të ndalojë rrënimin e saj

14:42 Politika

125 vjet National Geographic/ Fotografia mund të ndryshojë botën

12:50 Politika

Ramës i mbaron mandati si kryetar i PS. Fino: Nuk ka kandidaturë tjetër veç tij

12:13 Politika

A ekziston akoma Muri i Berlinit?

10:57 Politika