ISKSH: Rimbursimi i barnave, për 1 vit shpenzohen 8.4 miliardë lekë

Fondi i Sigurimeve Shëndetësore shpenzon sot rreth 8.4 miliardë lekë të reja në vit vetëm për rimbursimin e barnave, ku për sëmundje si diabeti, shpenzohen 1.1 miliard lekë në vit.

Shifrat u bënë të ditura në analizën vjetore të ISKSH-së, ku gjithashtu u raportua se recetat me rimbursim që përfitojnë pacientët, janë rritur me 500 mijë vetëm gjatë vitit të fundit, duke arritur në 4.2 milion receta të rimbursueshme në vit.

“Ritmet e rritjes së sëmundshmërisë, si dhe të parave që paguhen sot nga Fondi i Sigurimeve Shëndetësore për rimbursimin, janë të larta, por ne synojmë të kthejmë vëmendjen nga parandalimi i hershëm, ofrimi i shërbimeve me cilësi dhe financimin e shërbimeve sipas nevojave reale. Në këtë këndvështrim, me vizionin e ri të Qeverisë për shërbimin shëndetësor dhe mbështetjen e Ministrisë së Shëndetësisë, Fondi do të kalojë nga financimi i fragmentuar i shërbimeve shëndetësore, në blerës të këtyre shërbimeve në bazë të kostove të përcaktuara drejt”, tha drejtori i ISKSH, Astrit Beci.

Në vijim ai premtoi se brenda muajit prill do të jenë gati 5 paketat e para të shërbimeve shëndetësore, ndërsa puna për paketën e dializës po finalizohet.

“Në përfundim të procesit do të dimë saktësisht shifrat e ndërhyrjeve kardiovaskulare, të dializës dhe transplantit të veshkave, hepatit dhe implantit koklear për fëmijët me probleme të dëgjimit. Do të kemi kështu një standard të unifikuar si në spitalet publike ashtu edhe në ato private dhe i hapim rrugë ndryshimit të mënyrës së financimit të spitaleve, jo më sipas një buxheti historik, por sipas nevojave reale. Ky është hapi i parë serioz që po ndërmarrim, për politika më të drejta të mbulimit shëndetësor që duam të ndërtojmë”, tha ai.

Beci bëri të ditur ndërmarrjen e iniciativës për të kaluar nga përdorimi i librezës së shëndetit, tek karta e shëndetit. Projekti do të nisë të pilotohet shumë shpejt në disa qendra shëndetësore në Tiranë, për t’u shtrirë në të gjithë Shqipërinë. Sipas Becit, ky projekt do të përmirësojë dukshëm cilësinë e punës së mjekëve dhe farmacistëve si dhe kontrollin e tyre.

“Ne do të kthejmë kështu, kohën dhe rolin e mjekut të familjes në funksion të shërbimit ndaj pacientëve, pasi ata nuk do të jenë më të detyruar të plotësojnë fletë libreze pa fund, por me një mjet të thjeshtë, kartën e shëndetit, pacientët do të marrin shërbim e duhur dhe mjeku do shfrytëzojë kohën për të vizituar sa më mirë pacientët, duke fituar dinjitetin dhe rolin që i takon”, tha ai.

Një tjetër çështje e rëndësishme ku do të fokusohet ISKSH, është rimbursimi i barnave. Në këtë kuadër Beci sqaroi se aktualisht, ka nisur puna për hartimin e listës së barnave të rimbursueshme të këtij viti.

“Qëllimi ynë është që, me një përdorim më të mirë të fondeve, të rrisim numrin e përfituesve. Përpos procesit transparent të pranimit të propozimeve për listën e barnave këtë vit, unë si drejtor i Fondit së bashku me ekipin tim, po zhvillojmë takime intensive me mjekët, përfaqësues të të gjitha katedrave kryesore në QSUT, për të marrë një mendim sa më profesional, i cili do të reflektohet më tej në vendimmarrje për një listë barnash kosto-efektive, por mbi të gjitha cilësore për pacientët”, u shpreh ai.

Gjithashtu, Fondi po merr të gjitha masat e duhura për të mbështetur projektin e Qeverisë për kontrollin bazë periodik të popullatës 40-65 vjeç, për ekzaminimet falas të kësaj grupmoshe.

Konfindustria: Po cenohet siguria e bizneseve, të ndërhyjë qeveria

13:09 Ekonomia

Veliaj: Skemë e re për pensionet

12:42 Ekonomia

Borxhet, si do të shlyhen 720 milion $

16:53 Ekonomia

Rregullimi i tregut të barnave, emergjencë

13:40 Ekonomia

Miratohen anëtarët e Komisionit të Ndihmës Shtetërore

18:13 Ekonomia

Koncesionet - Vjedhjet që iu njihet hajduti…

20:52 Ekonomia

VIDEO/ Rama inspekton aksin Milot-Lezhë: Asnjë projekt pa sinjalistikë

16:07 Ekonomia

Energjia, privatët gërryejnë shtetin/ Kontratat detyrojnë Qeverinë t'ua blejë më shtrenjtë sesa tregu

16:12 Ekonomia

Gjiknuri: Qytetarët të ulin konsumin e energjisë elektrike

14:13 Ekonomia

Task Force për Energjinë/Peleshi: 146 kallëzimë penale, arkëtimet i rritëm me 10 milionë

12:36 Ekonomia