Te fundit
Sezoni turistik/ Gjermeni prezanton Task Force: Masa të forta për turizmin
18 Prill 2014, 12:29Sociale
TEMA
Ministrja e Zhvillimit Urban dhe Turizmit Eglantina Gjermeni prezanton urdhrin për ngritjen e një task-force për manaxhimin e sezonit veror, masat për të gjitha institucionet dhe lehtësitë e ofruara për organet e planifikimit vendor. Gjatë një takimi me përfaqësues të njësive të qeverisjes vendore të brezit bregdetar, ministrja Gjermeni tha se këto masa kanë nisur të vihen në zbatim me qëllim rritjen e numrit të turistëve përmes cilësisë dhe standardeve të ofruara dhe promovimin e potencialeve që ofron Shqipëria.
Me urdhër të Kryeministrit është ngritur Task – Forca e menaxhimit turistik veror, e cila do të jetë përgjegjëse për ndjekjen dhe zbatimin e masave që do të garantojnë standarte, siguri dhe rritjen e cilësisë së shërbimeve. Të gjitha institucionet përgjegjëse për menaxhimin e sezonit turistik veror do të zbatojnë një plan masash të detajuara për mbarëvajtjen e sezonit turistik. Ky plan masash do të garantojë përmirësimin e standarteve dhe ofrimin e kushteve në drejtim të pastrimit të territorit, akseve nacionale dhe rrugeve dytësore, sikundër do të garantojë rendin, qetësinë publike si dhe sigurinë në ujrat e brendshme, sigurinë rrugore dhe lëvizjen e lirë të qytetarëve dhe grupeve turistike. Masat parashikojnë dezinsektimin e zonave bregdetare dhe higjenë maksimale në këto zona.
Ministrja Gjermeni i njohu drejtuesit e njësive vendore me Vendimin e Këshillit të Ministrave “Për sigurinë në det, plazhe dhe në ujërat e brendëshme në thellësi të territorit”, e cila përmban kontratën “TIP” që lidh pushteti vendor me subjektet qe marin me qera stacionet e plazheve. Këto masa janë të detyrueshme dhe synojnë rritjen e standarteve dhe cilësisë së shërbimit turistik në strukturat “stacione plazhi” dhe mbrojtjen e konsumatorit të këtyre shërbimeve. Çelja e sezonit turistik do të kryhet në bashkëpunim me AKT-në përmes aktiviteteve promovuese në bashkitë e qyteteve bregdetare. Gjatë këtij sezoni turistik do të realizohet edhe projekti i vendosjes së kullave të vrojtimit në 5 plazhe pilote dhe do të ristrukturohen “infopoint” të Durrësit dhe Rinasit. Ministrja Gjermeni prezantoi nismat në fushën e planifikimit të territorit, si dhe ndryshimet e reja ligjore që do t’i vijnë në ndihmë drejtuesve të njësive të qeverisjes vendore për ushtrimin e detyrave të tyre funksionale në fushën e ndërtimit.
Ministria dhe Agjencia Kombëtare e Planifikimit të Territorit njohën drejtuesit e njësive vendore me ecurinë mbi Planin e Integruar Ndërsektorial për Bregdetin.
Gjatë takimit me drejtuesit e njësive vendore të zonave bregdetare u prezantuan ndryshimet ligjore në VKM “Për miratimin e rregullores model të planifikimit ” e cila ka për qëllim zgjerimin e subjekteve përfitues duke përfshirë strukturat me funksion zhvillimin prodhues, ekonomik, industrial, bujqësor, blektorial. Kjo do të bëjë të mundur që organet e planifikimit edhe nëse nuk kanë të miratuar instrumentat vendorë të planifikimit, do japin leje zhvillimore edhe për këto kategori, duke lehtësuar kështu bisnesin. Drejtuesit e njësive vendore u njohën edhe me udhëzuesin që ka hartuar MZHUT dhe AKPT për mënyrën e zbatimit të kësaj VKM-je. Për herë të parë, të gjitha institucionet përgjegjëse për menaxhimin e sezonit turistik veror; Ministria e Zhvillimit Urban dhe Turizmit dhe Agjencitë e saj të varësisë AKT dhe AKB, Ministria e Transportit dhe Infrastrukturës dhe Autoriteti Rrugor Shqiptar, Policia e Shtetit dhe Drejtoria e Kufirit, Ministria e Mjedisit dhe Inspektorati Shtetëror i Mjedisit, Ujërave dhe Pyjeve, Ministria e Kulturës, Ministria e Shëndetësisë; Ministria e Financave dhe Ministria e Punëve të Jashtme do të zbatojnë një plan masash të detajuara për mbarëvajtjen e sezonit turistik.
Lini një Përgjigje
Më të lexuarat
24 oret e fundit
Javen e fundit
Blog Tema
