Ruçi-Berishës: Ke frikë se ILDKP po lëviz. Majko: Nuk jeni në vete kur akuzoni FA

Kuvendi debaton mbi ndryshimet në ligjin për ndryshimet në ligjijn për ILDKP. Debatet janë përqëndruar në propozimin e bërë nga mazhoranca, sipas të cilës Inspektori i Përgjithshëm i ILDKP-së duhet të propozohet nga Kuvendi dhe jo nga Presidenti sikundër ka ndodhur deri më tani. Opozita pretendon se një propozim i tillë i heq të drejtën Kreut të Shtetit dhe vë nën kontroll të plotë ILDKP me synimin e vetëm fshehjen e pasurisë së zyrtarëve dhe ushtrimin e presioneve ndaj gjyqtarëve, prokurorëve dhe opozitës.

Përballë akuzave të opozitës se është shkelur Kushtetuta, Kryetari i Grupit Parlamentar të Partisë Socialiste Gramoz Ruci  tha se ka qenë mazhoranca e atëhershme, sot në opozitë, ajo që nuk e ka votuar në 2003-shin ligjin për propozimin e kreut të ILDKP-së. Sipas tij, mazhoranca në atë kohë ka deklaruar se në shkelje të Kushtetutës i është atribuar Presidentit një e drejtë që nuk ja jep Kushtetuta.

Por për ish kryeministrin Berisha Kushtetuta i ka dhënë Presidentit të drejtën për të luajtur me dy kandidatura në mënyrë që institucioni të jetë i pavarur. 

Opozita

Gjatë debatit parlamentar, deputetët e Partisë Demokratike e cilësuan propozimin si një tjetër sulm ndaj Kreut të Shtetit, Bujar Nishani.Ish-ministri Genc Ruli, deputet i PD, akuzoi mazhorancën se po e sulmon sot Presidentin Bujar Nishani vetëm sepse ai ka qenë një ish-funksionar i PD-së.

“Sot po bëni çmos që ti hiqni cdo kompetencë dhe ndaj ne themi se sulmi ndaj Kreut të Shtetit është politik. Nëse do të ishte Ilir Meta President ju do ia shtonit kompetencat në maksimum, madje do e kthenit republikën tonë në atë të gajdes herë fryhet dhe herë shfryhet. Ju me votat tuaja mund të na e ktheni këtë republikë edhe në atë të dy konsujve, që janë Ilir Meta dhe Edi Rama, por kur hapet shumë oreksi konsujt vrasin njëri-tjetrin dhe ju e dini fatin e Çezarit”, u shpreh Ruli.

Për deputetin tjetër të PD-së Kastriot Islami mazhoranca e sotme po shpërfill konsensusin e vitit 2003, atëherë kur edhe u vendos që Kreun e ILDKP-së e propozon Presidenti.

“Jam dakort me të gjitha ndryshimet përvec njërit, heqjen e kompetencës së Presidentit për të emëruar drejtuesin e ILDKP. Edhe argumenti që thuhet se Kushtetuta nuk e ka të shkruar si kompetencë, është joserioz, pasi edhe ata që bënë dhe vendosën në 2003 e kishin të qartë se dhënia e një kompetence të tillë bëhej vetëm për të mbajtur të pavarur një institucion të rëndësishëm. Edhe krahasimet që bëhen se janë njësoj ILDKP me KQZ, nuk qëndrojnë, pasi KQZ duhet të jetë e balancuar politikisht, kurse ILDKP e pavarur”, theksoi Islami.

Në vijim, ligjvënësi i PD-së theksoi se qëllimi i vetëm i këtij ndryshimi është shantazhimi i opozitës, gjyqtarëve apo prokurorëve që do e shisni si luftë kundër korrupsionit.

“Me uzurpimin e ILDKP po hidhni një tjetër hap duke cënuar pavarësinë e institucioneve dhe hapi i parë për të vendosur oligarkinë.Nuk do të doja që vendi të hynte në vorbullën e protestave apo më keq akoma, revolucioneve sikundër ka paralajmëruar kryetari i grupit parlamentar më të madh në Parlamentin Europian, Grupit të PPE-së Joseph Doll, i cili pas takimit me Presidentin Obama paralajmëroi se rrezikun që mund të shfaqet në vendet e rajonit”, theksoi Islami.

Ish-Kryeministri Sali Berisha në fjalën e tij akuzoi se mazhoranca po prish mekanizmin e kontrollit dhe balancës dhe sipas tij kjo bëhet vetëm e vetëm për të mos zbardhur ato 60 milionë që i keni nën dyshekë dhe jastëkë. Në këtë kuadër ai tha se akuzat që ka artikuluar kohë më parë për zyrtarë të PS që laheshin në vaska floriri nuk janë asgjë para kësaj.

“Presidenti përveç kompentencave, me ligj i ngarkohen detyra të tjera në frymën e Kushtetutës, parim themelor për institucionet e vendit, Kushtetuese dhe jo kushtetuese. Ky parim nuk ekziston për atë që do të ketë në dorë të gjitha pushtetet e tij, ndaj dhe ligjvënësi në vitin 2003 i ka dhënë Presidentit të Republikës autoritetin për të luajtur me dy kandidatura në mënyrë që ai institucion të jetë i pavarur, pjesërisht i pavarur se asnjë institucion nuk është i pavarur, kufizojnë njëri-tjetrin me pushtetet e tyre. Kjo kompetencë është në frymën e kushtetutës. Opozita po thotë të vertetën, por të paktën mos deformoni Kushtetutën. Doni ta hiqni, hiqeni, po ku do përfundoni, do ta shikoni”, – tha ish kryeministri Berisha.

Mazhoranca

Mazhoranca ka kundërshtuar pretendimet e opozitës përsa i takon asaj që propozimi i kreut të ILDKP të bëhet nga Kuvendi është marrje e kompetencës së Presidentit të Republikës.

“Thoni është sulm anti-Kushtetues, por gjejeni në çfarë neni kushtetues e ka Presidenti një kompetencë të tillë. Ne kemi zgjeruar rrethin e atyre që përfshihen nën hetim përsa i takon deklarimit të pasurive. Nuk ka asnjë gjë antikushtetuese nëse kontrollojmë interesat e institucioneve që kontrollojnë pasurinë e zyrtareve të lartë. A e dini ju, që deri më sot, nuk deklarohej pasuria e bashkëjetuesve të tyre dhe shumë kontrata lidheshin me bashkëjetuesit e tyre të cilët nuk kontrolloheshin asnjëherë”, tha deputetja socialiste Vasilika Hysi.

Ndërkohë, ligjvënësja Ermonela Felaj theksoi se Presidentit Bujar Nishani nuk i është marrë asnjë kompetencë nga ajo që i jep Kushtetuta, përkundrazi i ishte dhënë një e drejtë shtesë që nuk ka lidhje me funksionet e tij. “Ne po e clirojmë Presidentin nga kompetencat e panevojshme dhe po i japim Kuvendit një të drejtë”, theksoi ajo.

Deputeti socialist, Pandeli Majko, njëkohësisht ish-kryeministër, vlerësoi ndryshimet e propozuara, që zgjerojnë rrethin e zyrtarëve që u ndalohet të lidhin kontrata me institucione publike, ndërsa theksoi se korrupsioni në Shqipëri identifikohet si një ‘korrupsion sistemik’.

“Kur flitet për këtë do të thotë që korrupsioni ka prekur bazat e shtetit dhe është e kotë t’i mbushim mendjen vetes se ky korrupsion po funksionon vetëm në këto 6 muaj që është ndërruar qeveria, pasi korrupsioni sistemik që të ngrihet kërkon minimalisht mbi një dekadë. Jemi të dyja palët të zhytura në këtë histori dhe të tillë duhet ta kuptojmë korrupsionin sistemik”, Majko

Ndryshimet e sjella, sipas tij, prekin sidomos gjyqësorin, ku dhe dëmet që mund të vijnë nga korrupsioni në radhët e njerëzve të drejtësisë, janë shumë më të mëdha.

“Një politikan i keq mund të bëje dëme, por nuk mund të bëjë aq dëme sa një gjyqtar i keq apo i korruptuar, nuk mund të bëjë aq dëme sa një prokuror i keq apo i korruptuar dhe këtë e kemi shumë të qartë. Kush është sot drejtuesi i ri i ILDKP-së i votuar nga maxhoranca. Shkëlqim Ganaj është kandidati i dytë në listë, bashkë me znj. Zana Xhuka, të propozuar nga i njëjti president dhe që erdhën në parlament me frymën e së njëjtës qeveri, asaj të Partisë Demokratike. Ne e hoqëm Zana Xhukën se nuk i plotësonte kushtet dhe sollëm të dytin. Ç’të keqe ka kjo kur është propozuar nga presidenti. Shkëlqim Ganaj nuk ka pse diskutohet këtu si një njeri që ne e kemi sjellë për të bërë punën e maxhorancës kundër pozitës, por se ai ishte kandidatura e dytë në listë, së bashku me Xhukën”, tha Majko

Në fjalën e tij, ish-Kryeministri u ndal edhe në akuzat e bëra nga opozita ndaj Forcave të Armatosura. “Kam dëgjuar që akuzat e juaja që forcat e armatosura janë të përfshira në trafikun e drogës. A jeni në vete? E zëmë për një moment se është e vërtetë kjo histori. Ish ministri i mbrojtjes e di se për ndryshimin e elitës së FA nuk mjaftojnë 6 muaj. Pra nëse kjo histori do të ishte e vërtetë atëherë kjo do të kishte kohë që do të ndodhte, qoftë edhe në kohën tuaj. Kur thoni trafik droge e keni me ato djem e vajza që i kemi nisur në misisonet paqeruajtëse, në pikat më të vështira të luftës”, tha Pandeli Majko.

Duke reaguar ndaj deklaratave të ish-Kryeministrit, kreu i deputetëve socialistë Gramoz Ruci ka apeluar për një mbështetje të gjerë ndaj ILDKP, ndërsa ka pohuar se nuk ka asnjë shkelje të Kushtetutës.

“E para për Kushtetutën dhe do ta përgëzoja Berishën se po përgjërohesh për një dokument që nuk e ke votuar, por e ke cilësuar leckë. Sa mirë ka vepruar populli shqiptar, mazhoranca e asaj kohe që bëri një Kushtetutë, por ajo që nuk po thua është se cili nen po shkelet. Këtë nuk e thua dot se në ndryshimin e bërë nuk preket asnjë kompetecë e Presidentit. Përgëzime z. Berisha se po mbron një ligj të 2003, të cilin nuk e ke votuar. Prandaj zotëri meqë i drejtohesh me gisht mazhorancës se fle në dyshek me para, le të them unë ku fle lepuri. Ti ke frikë që ky institucion  ka filluar të lëvizë që në muajin e parë, kur ky institucion ka 2 vjet që nuk ka kryer asnjë veprim. Sa i përket tjetrës, për shkeljen e Kushtetutës, nuk asnjë nen të ligjit që po miratojmë dhe asnjë kandidat të cilin ushtron kompetencën e këtij institucioni. Le të bashkohemi të gjithë dhe të mbështesim këtë institucion të bëjë punën për të cilën është ngritur, luftën ndaj korrupsionit”, tha Ruci.

Vorpsi: Rama po tenton të kapë edhe Teatrin

10:37 Politika

Kuvendi, debate për amnistinë/ PD: U falën ata që blenë votat në Korçë. Reagon PS

10:20 Politika

VIDEO/ Tenton të vetëdigjet një ish- i burgosur politik

09:39 Politika 1 koment

INTERVISTA e plotë/ “Kjo e majtë duket sikur s'e ka marrë ende pushtetin”

09:06 Politika

VIDEO/ Rikthehet për të marrë hakun e xhaxhait, që iu vra kur ai ishte 12 vjeç

08:31 Politika

Radhë e gjatë njerëzish në një vend në Europë?! Duan të denoncojnë një gjyqtar

19:45 Politika

Hila: Do padis ILDKP-në, shkelën ligjin duke më publikuar emrin

19:02 Politika

Raporti/ Llalla: Në 2013 s’ka pasur denoncime për zyrtarë të korruptuar. Pajisjet e përgjimit i kemi me qira

18:29 Politika

VIDEO LAJM/ Shemben me tritol lokalet në ishujt e Ksamilit

18:16 Politika

VIDEO/ Momenti shokues përpara se ai të rrëmbehej për t’u torturuar për vdekje

18:10 Politika