Edhe Evropa ka faj

Nga Remzi Ejupi

Për më shumë se 15 vjet kosovarët pritën për ditë më të mira, duke shpresuar në mirëqenie, liberalizim dhe integrim. Sot, po mbushin çdo natë autobusët me familje, fëmijë e shumë të rinj, për të ikur ilegalisht drejt Evropës.

Ata nuk u dëshpëruan brenda natës, sepse nuk është e lehtë të merret vendimi për t’i shitur pronat, për t’ia kthyer shpinën vatrës dhe për t’ua besuar fatin kontrabandistëve pa e ditur cakun. Pamjet e rënda nga kampet në Hungari dhe Francë janë tragjedia e radhës e Kosovës. Ajo shtresë e popullatës për të cilën jemi mburrur se e kemi me mesatare më të re në Evropë, po largohet nga ky vend. Këta të rinj nuk po shohin perspektivë, sepse u mjafton të dinë se kemi mbetur i vetmi vend në Ballkan të izoluar, pa liberalizim të vizave, me imazh të keq si shtet e shoqëri. E çfarë kanë më shumë se ne serbët, maqedonasit, bullgarët, apo edhe vëllezërit tanë matanë kufirit? Liberalizimi i vizave ndal edhe imigrimin ilegal, duke u dhënë mundësi qytetarëve të qarkullojnë lirshëm, të shohin se me azil nuk ka zgjidhje.

E nëse është politika ajo që e ka degraduar shtetin dhe na ka mbajtur të izoluar, ka qenë me vite të tëra, pikërisht, bashkësia ndërkombëtare ajo që i ka mbështetur të korruptuarit. Për të mos harruar se në sa skandale na dolën të jenë të përzier edhe vetë zyrtarët ndërkombëtarë. Kosova mbetet hotel me pesë yje për ta. Në çdo vatër krize personeli ndërkombëtar është i rrezikuar nga fanatikët politikë. Në Kosovë ndërkombëtarët priten si dashamirë, por fatkeqësisht ky mirëbesim është keqpërdorur nga një pjesë e tyre – qoftë me neglizhencën e tyre ndaj problemeve, qoftë me rrezikimin e demokracisë dhe sundimit të ligjit, për shkak të interesave më të larta, siç është stabiliteti politik.

Në të njëjtën kohë përmenden miliarda euro, gjoja të investuara në Kosovë nga fondet e BE-së. Vetëm në sektorin e energjisë janë dhënë mbi një miliard euro. E ku janë qindra e qindra miliona të tjerë që erdhën në Kosovë? E sa miliona euro janë paguar këshilltarë të huaj për gjithë këto vite? Cili është rezultati i këtij “projekti ndërkombëtar”, kur që nga viti 1999 shumë njerëz nuk mund të gjejnë një vend pune pa lidhje politike?

Padyshim se përballë kanë pasur shembullin më të keq të qeverisjes, për vite të tëra. Luksin marramendës që nuk e kanë as qeveritarët në Berlin, veturat më të reja, mobiliet sikur pashallarë në saraje Stambolli. Drekat e darkat me verëra të shtrenjta. I madh e i vogël duke udhëtuar me “biznes klasë”. Për një shtet të varfër si Kosova, pos presidentes dhe kryeministrit, askush s’duhet lejuar të udhëtojë në kategorinë e luksit.

Është po kjo skenë politike që brenda pak kohe arriti standardin që me asnjë matematikë nuk mund të dalë me të ardhurat zyrtare që kanë. Megjithatë, nuk kanë mundur të fshehin lidhjet e tyre me biznese dhe monopole, që u mundësuan krijimin e perandorive ekonomike. Prandaj, nuk është për t’u habitur që prej vitit 1999 nuk arritëm të kemi asnjë investitor serioz nga vendet perëndimore, derisa në Kosovë kemi grupe mafioze që kanë shtrirjen e tyre për më shumë se një dekadë, madje edhe përtej Kosovës.

Për t’u pastruar kjo situatë dhe ky dëmtim i shtetit kërkohet punë e madhe. Fillimisht, Qeveria e re duhet të zvogëlojë luksin e saj, të ndalë nepotizmin. Të ketë strategji për zhvillim, atë që nuk e ka pasur tash e 15 vjet. Të mos varemi nga të hyrat e doganave. Të stimulohet biznesi vendor dhe të mos mbështeten bizneset që importojnë mallra nga Serbia, e cila na pengon në secilin hap të integrimit, në sektorët kyçë, ekonomi, sport, kulturë. Nga mbi 10 miliardë euro zyrtarisht që kanë ardhur në Kosovë nga diaspora, 3 miliardë prej tyre kanë shkuar në Serbi, duke i blerë mallrat e saj. Remitanca këto që mbajnë gjallë Kosovën.

Ndërkaq, milionat e buxhetit janë harxhuar për luksin e zyrtarëve qeveritarë. Sa miliona euro janë harxhuar për 15 vjet në vetura, mobile, karburante, dreka e darka, hotele të shtrenjta? E sa buxhete marramendëse kanë shkuar si shpenzime të mbi 36 agjencive, përshirë mëditjet dhe harxhimet e tjera me vetura zyrtare, udhëtime zyrtare, pa llogaritur këtu vendimet që merren në interes të grupeve të caktuara? Sepse në fund të fundit ata milionerë që po na sillen rrugëve nuk na kanë pikur nga qielli, por atyre u ka pikur në prehër paraja publike. Por, kur ua hedhim një sy linjave buxhetore te shpenzimet kapitale, pra, mes tjerash, edhe investimet me rëndësi në infrastrukturë, për nëntë muajt e parë të këtij viti, krahasuar me vitin 2013, kemi 36 për qind më pak.

Kryeministrit të ri, Isa Mustafa, i ka mbetur “patatja e nxehtë” në dorë. Me të ardhur në pushtet atij iu desh të prekë fondin rezervë, në pamundësi që të paguajë pagat për dhjetorin. Kjo ishte sfida e parë, të tjerat e presin.

Së pari duhet shtrënguar rripin të gjithë pushtetarët dhe të zvogëlojnë luksin e planifikuar për vitin 2015. Të harrojnë veturat e shtrenjta, bileta “biznes klasë”, hotele luksoze, mëditje sa një pagë mesatare, punësime të familjarëve, dhënie e tenderëve kompanive që i kanë financuar gjatë fushatës. Nëse me këto ndryshime nis qeverisja e re atëherë premton ndryshim.

Mustafa ka një sfidë të madhe para vetes dhe shpresat për ndryshim mbeten tek ai. Të paktën nuk bart mbi vete barrën e të korruptuarit dhe për dallim nga paraardhësi i tij, nuk mund të themi se Mustafa është i paditur dhe se nuk merr vesh në ekonomi, dhe ky është sektori që Kosova po e vuan. Nëse nuk i hapen rrugët e zhvillimit këtij vendi, të fundit do të jenë politikanët që do të kërkojnë azil.

Drama e pemës të Vitit të Ri

14:50 Blog

Familja nuk është, atje ku ke nje vend për të ndenjur, por ku mund të kuptohesh

19:46 Blog

Pamundësia e ngushëllimit

18:09 Blog

Hapja e dosjeve stopon përbaltjen

17:06 Blog

Çfarë ishte dhe çfarë nuk mund të ishte Lëvizja e Dhjetorit 1990 ?

09:38 Blog

E majta ka të drejtë për borxhin

16:51 Blog

Shefa, ka vdekur një fëmijë!

18:28 Blog

Rritja reale ekonomike vjet, +1,39 %. Po sivjet?

11:50 Blog

Letër në redaksi: Delijorgji po na privatizon gjithë lagjen

19:53 Blog

Korçës i hoqëm një shesh kaotik dhe i dhamë një fytyre evropiane

19:18 Blog