Te fundit
U shua aristokrati i fundit i komedisë shqiptare
8 Nëntor 2020, 13:40Blog
TEMA
Nga Ilir Yzeiri
Koço Devole ishte aristokrati i fundit i komedisë shqiptare në të gjithë kuptimin e kësaj fjale. Ai ishte talent i lindur. Zotëronte në shkallën më të lartë cilësitë e një aktori të madh komedie. Kishte plastikën, mimikën, zërin dhe aftësinë për t’u transformuar e futur në çdo rol me një lehtësi të jashtëzakonshme.
Koço Devole mbylli ciklin e artistëve të komedisë që erdhën nga skena e estradës së Teatrit dhe varietesë dhe pas tij nisi të zhvillohet në vendin tonë kabareja, humori i shpejtë i batutës që ka përmbytur edhe sot ekranet tona.
Me emrin e tij lidhet jo vetëm arti i interpretimit, por ai, bashkë me Pëllumb Kullën, njihen si mjeshtërit edhe të realizimit të hartimit dhe vënies në skenë të komedive, skeçeve pa fund në Estradën e Tiranës e Fierit apo atyre në Televizionin shqiptar.
Koço Devole u bë i dashur për publikun atëhere kur me elegancën e tij dhe me humorin brilant përcolli ditët e fundit të diktaturës. Pastaj, askush më bukur sesa ai nuk i paraqiti plagët e reja që po hapte tranzicioni.
Pjesët e tij për skemat piramidale, alegoritë dhe satirat për parlamentin e ri shqiptar apo për partitë e reja, cikli i pjesëve që parodizonin diktatorin me personazhin e famshmë të Sillos apo Nafijes e deri te karikaturat e zengjinit të ri që e nis karrierën me makina luksoze e femra dhe përfundoin duke shitur banane kanës hyrë në memorien kolektive si pjesë e kulturës më të mirë shqiptare.
Në të gjitha rolet që realizoi dhe në të gjitha pjesët që shkroi, ai asnjëherë nuk e ndërtoi humorin me sforcime banale. Ai zotëronte në mënyrë të përsosur artin e komedisë dramatike dhe personazhet e tij realizoheshin përmes veprimit dhe tekstit, të cilin ai e ndërtonte vetë që më parë.
Koço Devole ishte një aristokrat i skenës shqiptare sepse asnjë tjetër si ai nuk arriti të ndërtojë aq shumë karaktere pa rënë asnjëherë në vulgaritet. Reth tij, aktorë të tjerë të mëdhenj si Cekja apo Agron Llakaj merrnin shkëlqimin e merituar dhe koha kur të gjithë këta aktorë ndërtonin humorin shqiptar ka mbetur si një nga periudhat e më të mira dhe të paarritshme të komedisë shqiptare.
Koço Devole ishte aristokrat edhe në jetë. Askush nuk e mori vesh ndonjëhere se si jetonte ky njeri, çfarë problemesh kishte, çfarë shqetësimesh. Ai ishte shumë dinjitoz e krenar dhe iku nga kjo botë pa na treguar asnjë nga mendimet e tij për veten apo edhe për të tjerët. Filip Çakuli, miku i tij i ngushtë dhe njeriu që e mbajti afër atëhere kur ai nuk kishte një punë fikse, mund të tregojë më mirë se unë se çfarë vlerash kishte ky artist i madh, ky aristokrat i komedisë shqiptare.
Të jesh i sigurtë Koço se krijimet e tua dhe rolet që ke lënë nuk do të na ndahen kurrë. Unë, edhe pa ikur ti nga kjo botë, gjithnjë iu kthehesha atyre, por si unë edhe shumë të tjerë. Me ty do të ndodhë si me ata që futen aq shumë në jetën tonë sa vjen një ditë dhe harrojmë që ata nuk janë më.
Lamtumirë, miku im !
9 komente në “U shua aristokrati i fundit i komedisë shqiptare”
Lini një Përgjigje
Lini një Përgjigje
Më të lexuarat
24 oret e fundit
Javen e fundit
Blog Tema
U prehte ne paqe me i miri i humorit origjinal shqiptar.Te qofte i lehte dheu Koco i paharrueshem
I paharruar!
Te lumte pena Ilir! Je vertet gazetar me pene te holle qe ve pikat mbi “i”!
Bravo Ilir ke bere nje shkrim homazh te shkelqyer. Ashtu ishte aristokrat ne skene e jete. Faleminderit Koço per kenaqesine qe na ke dhene duke na i bere jeten me te lehte. Te qofte dheu i lehte.
Vdekja na e pati zili kete artist te mrekullueshem deri sa na e mori. I ndrite shpirti si shkelqeu ne jete!
U prejte ne paqe Koco Devole.
Zoti i plotfuqishem i dhente qetesi ne boten tjeter edhe per faktin e jashtezakonshem qe na ka ndricuar ditet me humorin e tij.
Ngushellime Shqiperise dhe Familjes dhe miqeve te tij.
Koco shpresoj qe ky komb te te kujtoje vlla, me nje bust, shkolle apo nderim tjeter, kaq gje e meriton.
Zoti te dhente paqe o njeri i mire dhe aktor i madh.
Gjithnjë origjinal ne nje sistem ku humori, si edhe gjithe artet, ishin te kontrolluara dhe me pak hapesire.
Një artist me pak per Shqiperinë. Duke patur parasysh se brezi i ri preferon bussiness-in, rrjetet sociale, apo trafikun dhe mbjelljen, te tille artiste, do duhet disa kohe qe t’i zevendeosjme.
Fatkeqsisht, shumica e humoristeve modern te sotem qe mbushin ekranet, jane te nje cilesie shume inferiore me baballaret e tyre qe edhe ne komunizem arrin te gjenin hapesira per te kritikuar.
Po na largohen artistet tane te medhenje te skenes dhe humorit..Sigurisht ata kane lene vepren por mungesa fizike ka vleren e saj te padiskutushme.Nuk ishte radhe e Kocos per te ikur…por kesaj jete ske ci ben…ajo ben cfare do…Ngushllime familjes dhe miqeve dhe shokeve dashamireve te tij te panumurte ane embane vendit..
I madhi Koço Devole…RIP….
Gjigandi Koco merition ti behen nderet si komiket e medhenj Toto,Fernandeli ,Caplini
Na ka ndricuar me humor ne kohe te zymta.
RIP njeri I madh…