Nuk kam fajësuar qytetarët. Kam thënë vetëm se, po ta donim këtë vend, jo shumë, por sa gjysma e asaj që deklarojmë në rrjetet sociale, mbase flakët do ishin më të pakëta se do ishim më të kujdeshëm në përdorimin e zjarrit e më aktivë në shuarjen e flakëve.

Përtej zjarreve e flakëve të gushtit, zonjusha prek një problem jetik: Ç’duhet të bëjë me përparësi ligjërimi publik? Të demaskojë ata që janë lart, apo të përpiqet të zgjojë ndërgjegjen qytetare?

Doemos, edhe njerën edhe tjetrën. Por krijimi i ndërgjegjes qytetare shpesh merr goxha peshë.

Kemi 100 e kusur vjet që përpiqemi të bëjmë shtet dhe na ngjan vetja si vëllezërit e kalasë së Rozafës: ç’bëjmë ditën, rrëzohet natën.

Gjithë këtë kohë, fatmirësisht nuk kanë munguar zërat publikë që kanë fshikulluar ata që janë lart. Sa për ilustrim kujtoni sarkazmën e Ali Asllanit që këto vite na ka ardhur në interpretimin e Reshat Arbanës: ‘Hani, pini dhe rrëmbeni, mbushni xhepe, mbushni arka,/ të pabrek’ ju gjeti dreka, milionier’ ju gjeti darka!’

Maskarenjtë i kemi patur me shumicë. Hakërrimat kundër tyre nuk na kanë munguar. Ajo që na ka munguar e na mungon është qytetari dhe qytetaria. Ose thënë ndryshe lenda e parë për të ndërtuar demokraci.

Qysh prej 10 mijë e kusur vjetësh, bota ka patur me shumicë sojlinj, mbretër, princër, zengjinë që kanë qeverisur si ua ka thënë koka e si ua ka dashur qejfi, me një fjalë kanë shirë në kurriz të popullit fukara.

Por demokracitë funksionale u ndërtuan vetëm dy shekujt e fundit, kur në skenë doli qytetari dhe nisi të ushtronte trysni e të kërcënonte me bashkësi, sindikata, greva, protesta, votë dhe, jo rrallë edhe me armë.

Ndruaj se në ditët tona, pa qytetarin dhe qytetarinë, pa solidaritet, organizim e protesta, hakërrimat ndaj atyre që janë lart rrezikojnë të mbeten fjalë boshe, shfryrje qaramanësh.

2 komente në “Ajo që na ka munguar e na mungon është qytetari dhe qytetaria”

Xoni says:

10 Gusht, 2021 20:35 te 8:35 pm

Plotesisht dakort z.Çapejev, si majtas dhe djathtas jane te kapur nga babezia e vjedhjes,sepse nuk ka qytetari te ndergjegjesuar mjaftueshem per tu organizuar ne protesta duke mos hajdutet te vjedhin edhe protesten.Aktualisht hajdutet vjedhin haptas pa u skuqur fare nga akuzat e bera nga ca hajdute te tjere.

Përgjigjjuni
1. ben says:
  
  11 Gusht, 2021 00:57 te 12:57 am
  
  Xoni-Capajevi e ka mire, por per cfare qytetaresh flet ai, kete nuk e kuptoj?
  Capajevi harron se qytetaret, te lodhur nga 50 vjet diktature dhe te zhgenjyer nga modeli i demokracise se komunistit te konvertuar ne antikomunist, Salih Ram Berisha, kane emigruar me kohe e me vakt dhe boshlleku i lene vakant u mbush nga katunaria, njesoj si parimi i eneve komunikuese, qe kemi mesuar dikur ne lenden e fizikes.
  
  Përgjigjjuni