Te fundit
Morali i shkatërruar i qeverisjes
5 Dhjetor 2025, 08:20Blog
TEMA
Nga Thoma Gëllçi
Pezullimi nga detyra i zv/kryeministres dhe ministres së Infrastrukturës Belinda Balluku, pas akuzave të ngritura ndaj saj për shkelje të barazisë në tendera, ka hapur një debat shumë më të thellë sesa vetë rasti penal. Nuk është fjala më për një çështje individuale, por për një simptomë të një sëmundjeje të vjetër: moralin e shkatërruar të qeverisjes në Shqipëri.
Në çdo vend me standarde minimale të etikës publike, një zyrtar i lartë, sapo vihet nën hetim për çështje që lidhen me abuzimin e pushtetit, largohet vetë nga detyra për t’i hapur rrugë hetimeve të pavarura, pa presion politik, pa alibi procedurale dhe pa u fshehur pas imuniteteve të pushtetit. Dorëheqja nuk përbën pranim fajësie, por respekt për institucionet dhe për publikun të cilit i shërben.
Në Shqipëri, kjo kulturë përgjegjësie mungon. Në vend të reflektimit, zgjidhet përplasja; në vend të moralit, ngrihet muri i politikës.
Reagimi i kryeministrit Edi Rama pas vendimit të Gjykatës së Posaçme ,duke e çuar çështjen në Gjykatën Kushtetuese dhe duke argumentuar se pezullimi i një ministri “bllokon gjithë dikasterin” , e zhvendos debatin nga thelbi në periferinë e tij. Pse duhet të arrijmë deri në pezullim gjyqësor që një zyrtar i lartë të largohet nga detyra? Pse duhen interpretime juridiko-administrative për të zëvendësuar një akt të thjeshtë etik? Dhe mbi të gjitha: si ka mundësi që një ministri e tërë të jetë kaq e personalizuar sa funksionimi i saj të varet nga një individ i vetëm?
Argumenti se një ministri “bllokohet” kur ministri pezullohet, është pranim i një tjetër problemi të madh: kapja totale e administratës nga politika, mungesa e strukturave funksionale dhe centralizimi i frikshëm i vendimmarrjes. Në një shtet normal, ministria nuk ndalet sepse ndalet ministri. Në një shtet normal, ka zëvendës, sekretarë të përgjithshëm, hallka të ligjshme që garantojnë vazhdimësinë. Në një shtet normal, kriza e një individi nuk kthehet në krizë të institucioneve.
Por Shqipëria po përjeton pikërisht këtë: personalizim të pushtetit, dobësim të institucioneve dhe relativizim të përgjegjësisë. Mbi të gjitha, po përjeton mungesën e një morali minimal në qeverisje , moral që vendos vijën mes pushtetit dhe shtetit, mes interesit publik dhe interesit privat, mes përgjegjësisë dhe arrogancës.
Sot nuk ka rëndësi se çfarë thotë njëra palë apo tjetra, se çfarë interpretimi juridik i jepet një vendimi gjyqësor apo se sa gjatë do të zgjasë procesi. Rëndësi ka një e vërtetë e qartë: deri kur në Shqipëri zyrtarët e lartë do të vazhdojnë të mbahen pas karriges deri në sekondën e fundit, edhe kur kjo karrige është nën hijen e hetimeve?
Përgjigjja ndaj kësaj pyetjeje tregon nivelin e moralit të qeverisjes. Dhe pikërisht ky nivel është sot i rrënuar. Derisa të rikthehet kultura e përgjegjësisë, derisa dorëheqja të shihet si akt dinjiteti e jo si dobësi, derisa administrata të jetë e fortë dhe institucionet të jenë më të rëndësishme se individët, Shqipëria do të vazhdojë të jetojë në paradoks: me ligje të shkruara bukur dhe me moral politik të shkatërruar.
Ky është problemi i vërtetë. Dhe kjo është arsyeja pse çdo debat rreth “kompetencave”, “pezullimeve”, apo “interpretimit kushtetues” është vetëm një tentativë për të shmangur thelbin: qeverisja pa moral çon në krizë jo vetëm një ministri, por gjithë shtetin.
4 Komente
Lini një Përgjigje
Më të lexuarat
24 oret e fundit
Javen e fundit
Blog Tema
Heee Tema, artikulli eshte shume i drejte dhe i sakte. Perse e publikoni kete? Jo per gje por me kete standart i bie qe duhet te japi doreheqjen lali dhe bela. Dhe mire do bejne sepse po tu ngjit vula e korrupsionit nuk te shqitet me, sa do te mundohen ata.
Erioni dhe Belinda duhet te kishin dhene dorreheqjen menjehere sapo prokuroria i mori te pandehur. Shantazhi qe i bejne Rames dhe qe ky i fundit i ben presion drejtesise, eshte prova se dhe keta vete e dine qe e kane dhjere me korrupsion e trafik influencash (nuk ka asgje te perbashket me politiken) njelloj si Saliu, Likja e te tere pisat qe i kane marre frymen ketij vendit tonë. Turp te gjitheve!
Shkrim shume i sakte,i drejte . Te bejne doreheqjen,te hetohen. Perse kapen si i mbyturi pas ka shtes? Po dolen te pafajshem te shkojne prape ne vendin e punes.Kjo te ben te mendosh se Bela ka dicka nen kesule.
PO JU SI I ARRESTYAN DHE DENUAN.KUSH E ORGANIZOI KETE .AKI ISHIN TE DREJTE PROKURORI E GJYQTARI I VETEM TE ARRESTONIN TY?.PIKERISHTE KJO FORME OSE bMETODE ARRESTIMI E DETYROI EDI RAMEN EDHE. PSE ME. VONES TE KEROJ ZBATIMIN E LIGJEVE OSE RREGULLIMIN E LIGJEVE..NE KERE RASTE NUK SHTROHET PTOBLEMU DORHEQJES POR AKA KOPETENCE NJE GJYQTAR I VETEM TE PERJASHTOI NGA DETYRA NJE MINISTER.SEPSE NESER PO AI GJYQTAR PEZULLON KRYE MINISYTIN.PROBLEMI SHTROHET KUSH KA TE DREJTE K/MINISTRI APO NJE GJYQYAR ALLAFRENGA. ?.