Schröder, ndërmjetës në luftën në Ukrainë, shpëtimtar i Evropës apo zëdhënës i Putinit?

6 Gusht 2022, 10:33Bota TEMA

Schröder, ndërmjetës në luftën në Ukrainë,

Vizita në Moskë dhe deklaratat e ish-kancelarit Gerhard Schröder kanë shkatuar reagime të ndryshme. A është ai ndërmjetës në luftën në Ukrainë, shpëtimtar i Evropës apo zëdhënës i Putinit?

Pas deklaratave të ish-kancelarit Gerhard Schröder se Rusia është e gatshme për arritjen e një zgjidhjeje në luftën e Ukrainës përmes bisedimeve, pati kritika të ashpra nga Kievi. Presidenti ukrainas Volodimir Zelenski tha se është “e neveritshme” kur “ish-udhëheqësit e shteteve të fuqishme me vlera evropiane punojnë për Rusinë, e cila lufton pikërisht kundër këtyre vlerave”. Nëse qeveria e Moskës do të donte vërtet përfundimin e luftës ajo “nuk do të kishte dërguar përforcime në Ukrainën jugore dhe nuk do të kishte kryer vrasje masive në territorin ukrainas”, tha presidenti ukrainas.

Në një intervistë me revisten “Stern” dhe stacionin televiziv privat RTL Gerhard Schröder ishte shprehur për “lajme të mira” pas vizitës javën e kaluar në Moskë. “Kremlini dëshiron një zgjidhje përmes negociatave”, tha ish-kancelari. Sipas tij një nga sukseset e para ishte marrëveshja për eksportin e grurit nga Ukraina dhe “ndoshta kjo mund të zgjerohet ngadalë në një armëpushim.”

Procedurë për përjashtim nga partia SPD

Për shkak të qëndrimit të tij ndaj luftës së Ukrainë, punës së tij për kompanitë ruse të energjisë si dhe afërsisë së tij me presidentin Vladimir Putin, Partia Social-Demokrate gjermane (SPD) po zhvillon aktualisht një procedurë për përjashtimin nga partia të Schröderit. Rezultati pritet të shpallet së shpejti.

Sekretari i Përgjithshëm i partisë liberale FDP, Bijan Djir-Sarai, e akuzoi Schröder-in se kishte sulmuar qeverinë federale në emër të Putinit. “Schröderi vepron si zëdhënësi i Putinit në Gjermani dhe lejon me vetëdije që Kremlini ta përdorë si pararojë për të dobësuar pozitën e qeverisë federale”, tha ai për gazetën “Bild”. Ish-kancelari duket se e ka “humbur plotësisht lidhjen me realitetin” dhe po përhap  në Gjermani “propagandë të pastër të Kremlinit”.

Kurse Dietmar Bartsch, kreu i grupit parlamentar të partisë E Majta, e vlerësoi vizitën e Schröderit. “Sigurisht që kemi nevojë për një zgjidhje përmes negociatave,” tha Bartsch për gazetat “Rheinische Post” dhe “General-Anzeiger”. “Nëse Schröder mund të japë një kontribut për këtë, atëherë ne duhet ta përdorim atë.” 

Bartsch kritikoi edhe vlerësimet e ministres së Jashtme Annalena Baerbock, sipas së cilës aktualisht një zgjidhje diplomatike nuk është e realizueshme.

Lavde nga mediat ruse

Nga ana tjetër edhe shumë media ruse e shohin ish-kancelarin Gerhard Schröder si shpëtimtar të Evropës nga dimri i ftohtë dhe si ndërmjetës në luftën në Ukrainë. Gazeta Izvestia thekson besnikërinë e Shröderit ndaj Putinit dhe shkruan se “ish-kancelari refuzoi të kërkonte falje për miqësinë e tij me Putinin”. Më tej në gazeta shkruan se bisedimet janë më të mira se heshtja dhe se situata në Ukrainë mund të zgjidhet me ndihmën e diplomacisë. Gazeta citon ish-kancelarin Schröder të ketë thënë se Kremlini është gati për negociata paqeje dhe duke iu referuar fjalëve të Shröderit kritikon që  “vendet evropiane, përfshirë Gjermaninë dhe Francën, nuk po bëjnë mjaftueshëm për këtë”.

“A erdhi ‘miku i Putinit’ në Moskë për të shpëtuar Gjermaninë dhe për t’i dhënë fund operacionit special ushtarak?” – është titulli i një artikulli në portalin online Deita.ru. Më tej në artikull shkruhet se Schröder ndoshta qëndroi për vizitë në Moskë për t’i shpëtuar gjermanët nga një “i ftohtë i tmerrshëm” që i pret si dhe për të vepruar si ndërmjetës në konfliktin e Ukrainës. Megjithatë nëse do të ketë bisedime ruso-ukrainase për paqe, Kremlini ndoshta do të bëjë lëshime vetëm, nëse kancelari Scholz do të heqë dorë në këmbim nga ndihma ushtarake për Ukrainën./DW

2 Komente

  1. f
    fukaraji22

    Ky ndoshta ka qene ose eshte agjent KGB, vetem e verteta nuk dihet por menyra si sillet dhe trajtohet te bene te mendosh se eshte nje i tille............

    1. F
      Franci

      Nuk ka qene agjent i KGB -se ish Kancelari gjerman , thjesht shfrytezoi mbas ikjes nga Kancelaria njohjen e "afert " dhe futjen e tij ne biznesin me presidentin rus ...tani qe flasim eshte ne Bordin drejtues te Gasprom me nje roge maramendese , kjo eshte dhe arsyeja pse ish Kancelari nuk e ka denuar sulmin rus .dhe tani qe flasim edhe pse eshte paralajmeruar direkt nga partia ku punoi , nga partia qe e nxori dhe e mbeshteti per Kancelar 2 here ...vuri interesin personal mbi ate te pergjithshem edhe pse u kercenua me perjashtim nga radhet e SPD , sikur ne 2002-shin ne kursin per Kancelar do te fitonte Edmund Stoiber , ish kryeministri i Bavarise historia do te shkruej krejt ndryshe sot , historia ama nuk shkruhet me "sikur " dhe keshtu sot Europa vuan politikat e gabuara te ketij karabushi .......fukaraji 22, paraja eshte e embel, imagjinoe paraja e madhe sa e embel eshte ....Keto paguan Europa sot , paktet e ketij karabushit dhe te Merkelit me Presidentin rus Putin , ndryshimi eshte se Ish kancelarja e pranoi boterisht gabimin kurse ky kafsha jo ....nuk eshte nevoja ta shkruaj prap pse nuk e pranoj ...e shkruajta me lart ....tung

      Lini një Përgjigje