Te fundit
Akademia e Shkencave: Kujtojmë sot, në përvjetorin e lindjes, albanologun dhe studiuesin e shquar Robert Elsie
29 Qershor 2026, 10:05Kulturë
TEMA
Robert Elsie është një nga figurat më të njohura të kulturës shqiptare në botë.
Ai lindi më 29 qershor 1950 në Vancouver të Kanadasë.
Studimet universitare i kreu në Universitetin e British Columbia dhe doktoraturën në Universitetin e Bonn, duke u specializuar në gjuhësi dhe studime klasike.
Që nga fundi i viteve ’70 vizitoi shpesh Shqipërinë dhe Kosovën, duke u lidhur ngushtë me kulturën shqiptare dhe duke u bërë një ndër njohësit më të thellë të saj.
Karriera e tij përfshin punën si interpret në Ministrinë e Jashtme të Gjermanisë dhe më pas në organizata ndërkombëtare si BE, NATO, OKB dhe Gjykata Ndërkombëtare e Hagës, ku shërbeu në procese të profilit të lartë. Si studiues, ai botoi mbi gjashtëdhjetë libra dhe qindra artikuj kushtuar letërsisë, folklorit, dialekteve dhe trashëgimisë gojore shqiptare. Ndër veprat e tij më të njohura janë “Histori e Letërsisë Shqiptare”, “Dictionary of Albanian Literature”, përkthimi i :Lahutës së Malcisë”, si dhe antologjitë e poezisë moderne shqiptare.
Elsie dokumentoi me rigorozitet gjuhën shqipe, duke regjistruar dialekte e këngë popullore në Shqipëri, Kosovë, Mal të Zi, Maqedoni, Itali, Greqi e Turqi, duke i ruajtur si pasuri të çmuar për brezat.
Ai ishte anëtar i jashtëm i Akademisë së Shkencave dhe të Arteve të Kosovës që nga viti 2000, transmeton akademia.
Robert Elsie u nda nga jeta më 2 tetor 2017 në Berlin, ndërsa sipas dëshirës së tij u preh në Theth.
Trashëgimia e pasur e Robert Elsie-t mbetet në panteonin e studiuesve më të shquar të albanologjisë, si një urë e fortë mes kulturës shqiptare dhe botës.
1 Komente
Lini një Përgjigje
Më të lexuarat
24 oret e fundit
Javen e fundit
Blog Tema
Ishte albanologu i huaj me produktiv dhe me objektiv.