Qosja: Kush është kundër zgjedhjeve të parakohshme, kërkon të zgjatet kriza në Shqipëri (INTERVISTA E PLOTE)

Bisedoi: Rudina Xhunga

“SHQIP”

Si është perceptimi i situatës që po ndodh në Shqipëri, në sytë e shqiptarëve të Kosovës?

Po, unë edhe kam shkruar për këtë çështje dhe kam thënë se duhet t’i shohim objektivisht. Flitet politikisht për dy krahe, krahun e majtë dhe krahun e djathtë. Ç’është e vërteta, shpesh herë ato përzihen. Parti shumë të diferencuara në jetën kombëtare shqiptare ne nuk kemi, ashtu siç ka në Evropë apo në vende të tjera. Shumë herë, koncepte apo pikëpamje të majta i gjejmë në parti që quhen të djathta dhe ide, mendime, qëndrime të djathta mund t’i gjejmë në parti të majta. Por, disa parti quhen të majta dhe këtu apriori merret një qëndrim jo favorizues për to, jo i drejtë, jo objektiv. Harrojnë se i majtë është Toni Bleri, harrojnë se i majtë konsiderohet Obama, partia demokratike në Amerikë, një parti social-demokrate, harrojnë se partitë social-demokrate të majta ishin partitë që kanë bërë zhvillimin më të madh shoqëror, ekonomik në mënyrën më të drejtë, më të pranueshme, me drejtësinë më të madhe shoqërore, pra partitë e shteteve skandinave. Por sot po e njëjtësojnë të majtën me komunizmin që është një qëndrim plotësisht i gabueshëm, një mendësi e tejkaluar ku fatkeqësisht tek ne ende nuk ka tejkaluar.

Kjo ishte për shqiptarët e Kosovës. Po për shqiptarët e Shqipërisë të cilët jo vetëm nuk janë në ditët e tyre më të mira, por janë në ditë me ankth, me pasiguri, me paqartësi dhe sidomos me polarizim dhe kjo është më e frikshme. Palët janë vendosur përballë, por cilat palë, shqiptarët dhe shqiptarët?

Për mendimin tim, në Shqipëri ka shumë dukuri që unë, personalisht, i shikoj dhe çuditem. Ka sjellje, veprime, mosveprime, mossjellje, mosshprehje të njerëzve që unë nuk i kuptoj. Nuk e kuptoj heshtjen e disa intelektualëve, nuk e kuptoj paraqitjen e disa intelektualëve. Nuk e kuptoj indiferencën e shqiptarëve në pjesën më të madhe, një indiferencë e pakuptueshme ndaj të pavërtetës, ndaj gënjeshtrës, ndaj të padrejtës. Si është e mundur kjo? Në botë reagohet shumë, në botë njerëzit humbin karrierën përgjithmonë nqs dëshmohet se qëndrimet e tyre janë të padrejta, nqs dëshmohet se flasin gënjeshtra, nqs dëshmohet se bëjnë propagandë të pavërtetë etj. Te ne, këto gjëra kalojnë në heshtje të plotë. Unë pashë një emision, jo më 21 janar, por me 22, në televizionin ABC Neës. Aty ishin të ftuar pesë apo gjashtë intelektualë, një regjisor, një përkthyes i shquar, një dirigjent, kompozitor, një mjek i dalluar dhe profesor universiteti. Ata folën për rreth një orë dhe më bëri përshtypje një fakt shumë i dhimbshëm. Folën për demonstratën, të gjithë ishin kundër dhunës por asnjëri, as ajo grua e cila ishte më e egra, më brutalja, nuk përmendi vrasjen e tre personave, i katërti vdiq në Stamboll. Pra, asnjëri nuk foli për vrasjet. Po mirë ore burra, një gjë është të çohesh në demonstratë dhe në atë demonstratë të marrësh gura e shkopinj, çadra e mjete të tjera që mund të gjenden në rrugë, por jo armë, dhe tjetër gjë është të vrasësh me armë. Ky është një dallim i madh dhe atyre nuk i bënte përshtypje si u vranë tre burrat. Të tre lanë fëmijët, gratë e tyre, prindërit të papunë, pa rrogë. Me çfarë do të jetojnë ato sot? Si është e mundur të gjykojnë në atë mënyrë këta gjashtë intelektualë? Si është e mundur, ku është parë që shteti të vrasë qytetarët e vetë? Qytetarët ishin çuar në protestë por protestat, demonstratat, grevat janë të ligjshme në të gjithë botën. Kjo është një nga arritjet më të mëdha të demokracisë në këtë planet. Çfarë është protesta, demonstrata dhe greva? Është një organizim i njerëzve për të vënë më në dukje, për të shquar më shumë një problem shoqëror. Dhe këto njerëz ishin çuar në demonstratë për të vënë në dukje, për t’i bërë bashkëkombasit e vetë që ta shihnin më qartë korrupsionin në Shqipëri, që ta shohin më qartë përpjekjen dhe realizimin për ta bërë Shqipërinë shtet privat dhe me aq sa di, me aq sa kam përvojë, Shqipëria është një shtet i privatizuar. Por prej kujt? Prej Sali Berishës. Doni dëshmi? Keni sa të doni. Sali Berisha bën betejë të pandërprerë për të privatizuar shtetin shqiptarë. Kur është në pushtet, bën betejë që të gjitha institucionet të jenë të tijat, me njerëzit e tij, që të bëjnë çfarë t’i thotë ai. Kur është në opozitë bën çdo gjë të lejuar e të palejuar që të marrë pushtetin, madje me dhunë siç bëri më 14 shtator 1998. Ai bëri puc, ai bëri grusht shteti, kjo që u bë tani nuk ishte grusht shteti.

Çfarë ishte ajo që ndodhi tani?

Kjo që u bë tani ishte një protestë me elementë dhune, me gurë, me çadra, shkopinj. Ishte veç një protestë, por jo grusht shteti. Grusht shteti me çadra bëhet? Absolutisht jo. Dhe grushtin e shtetit nuk e bën populli, por një grup njerëzish me tanke ashtu siç bënë ata që u futën në 1998 me tanke dhe morën institucionet e shtetit. Ndërsa më 21 janar askush nga protestuesit nuk u fut në ndërtesë. Ne shohim luftë të vazhdueshme të këtij njeriut me prokurorët, luftë me Arben Rakipin derisa e përjashtoi atë. Luftë me Theodhori Sollakun, e përjashtoi edhe atë. Tani është në luftë me prokuroren, Ina Ramën, të cilën e bëri vetë prokurore. Një luftë e paskrupullt me të me fyerje të rënda. Ku ka kryeministër në këtë botë që bën asisoj fyerjesh kundër cilitdo në këtë planet. Fyerjet janë një problem dhe një temë e veçantë që duhet trajtuar, fyerjet që bën kryeministri i një shteti ndaj titullarëve, zyrtarëve, qytetarëve. Pra, thamë lufta me prokurorët, që të tre i përjashtoi. Kalojmë të lufta e tij me kryetarët. Ai bëri luftë me kryetarin Rexhep Mejdani, kryetari i parë vërtetë demokratik në historinë e Shqipërisë si shtet. Ai bëri me të luftë pa kompromis, me shumë fyerje të botuara, shqiptuara, dëgjuar prej qytetarëve. Më pas, lufta me Alfred Moisiun, një luftë e ashpër të cilën në radhë të parë e kishte bërë Partia Demokratike. Tani, luftë me kryetarin që e bënë vetë, të partisë së vet që ishte funksionar i Partisë Demokratike. Pse ndodh kjo luftë? Ndodh për ta privatizuar shtetin ashtu sic e ka bërë. Mandej, luftë me mediat. Kur shoh disa televizione si ABC Neës, ajo është gazetë humori, nuk është televizion i pavarur. Unë e dëgjoj ministrin e qeverisë së sotme i cili një kryetar partie e ka quajtur katër herë, për disa minuta, qen i tërbuar. Te ne kalojnë fyerje të tilla në media dhe asaj apo atij që drejton emisionin nuk i bën përshtypje fjalë të tilla. Dhe çudia më e madhe është se opinioni është indiferent. Çfarë do të thotë kjo? Kjo do të thotë se Shqipëria, populli shqiptar është indiferent aq çuditshëm, aq i heshtur ndaj fyerjeve të rënda që janë cenim i kulturës shqiptare, të civilizimit shqiptar, të jetikës shqiptare, të qytetarisë shqiptare.

Duke i larguar nga fyerjet dhe dhuna verbale e cila në fakt ka paraprirë edhe dhunën fizike që pamë në bulevard, unë dua të ndaj tek disa personazhe. Do të kërkoja prej jush profesor, që ti drejtoheshit nëpërmjet Shqip në Top Channel së pari Kryeministrit te Shqipërisë, z. Sali Berisha. Çfarë do t’i thoshit?

Për mendimin tim, ai i ka kaluar të gjithë kufijtë e të lejuarës. E keni parë ju, e kam parë edhe unë mënyrën se si flet në parlament për deputetët që ka përpara të opozitës, për kryetarin e opozitës. Po mirë, hajde të supozojmë se janë të vërteta, dhe mund t’ju them se pjesa më e madhe e atyre që thotë nuk janë të vërteta, në pjesën më të madhe të ditës e të natës ky njeri shqipton më shumë të pavërteta sesa aradha të tjera njerëzish të paguar. Se shumë e shumë gazetarë të tjerë që dëgjon të thonë të pavërteta. Nuk është problemi se ai po shqipton ato të pavërteta kundër atyre njerëzve, kundër atyre deputetëve, por problemi më i madh është se i thotë në Parlamentin e Shqipërisë. Por Parlamenti është institucion i formimit të shoqërisë, i formimit të popullit. Është njëkohësisht institucion edukativ, institucion moral dhe parlamenti është populli, shteti në përmasë më të vogël. Ashtu qenka populli shqiptar? Ashtu flet populli shqiptar? Ashtu komunikon populli shqiptar, ashtu siç flet Sali Berisha me deputetët në parlamentin e Shqipërisë? Jo, unë kam koncept dhe mendësi tjetër për popullin shqiptar. Populli shqiptar është një popull me etikë të lartë, me parime të larta. Populli shqiptar ka dhënë jetën për moralin, dinjitetin, krenarinë. Njeriu nuk është prej lecke, guri apo druri por njeri me vetëdije që e dallon nga bota shtazore vetëdija, etika, morali. E dini si thotë Kanti? “Yjet në qiell mbi mua, ligji moral në mua”. S’ka ligj morali me Sali Berishën derisa flet ashtu. Ai është i privuar nga ligji i moralit, nuk njeh rend moral në jetën e popullit shqiptar në Shqipëri derisa flet e sillet ashtu. Dhe ky njeri, kryeministri i Shqipërisë, i cili një herë ishte kryetar e tani kryeministër i Shqipërisë, që e quan deputetin që ka përballë, të cilin e ka zgjedhur një pjesë e popullit për disa cilësi të tij edhe morale, ta bëjë fytyrën leckë. Më pas kryetarja e parlamentit, bën ftesë nxirreni jashtë atë leckë. Kë fton ajo? Si mund të ngjajë në një institucion përfaqësues të popullit? Fyerja ka pasoja të rënda. Evropa me shekuj ka dalë në dyluftim për fyerje shumë të vogla. Napoloni ka ndalur dyluftimet. Në dyluftim është vrarë Pushkini dhe Lermontovi, dy krijues të mëdhenj të Rusisë. Në dyluftime janë vrarë qindra personalitete të larta në Evropë, Francë, Gjermani, Holandë e në shtete të tjera për nderin, identitetin, etikën, moralin, të vetin dhe të popullit të vetë dhe atyre të cilëve iu takojnë. Njeriu dallon nga shtaza se ka vetëdije dhe në mos vetëdijen ka një etikë, ka dinjitetin dhe krenarinë. Po si respektuam këto, për çfarë të drejtash të tjera duhet te flasim? Ku janë këto të drejta të njeriut? Për çfarë të drejtash të njeriut do flasë Sali Berisha? Nuk ka çfarë flet, i ka thënë të gjitha.

Një tjetër personazh të cilit do të doja gjithashtu t’i drejtoheshit është lideri i opozitës në Shqipëri, z. Edi Rama.

Për mendimin tim, Edi Rama ka një mendje të kthjellët. Unë i shoh dhe i dëgjoj fjalimet e tij. Ato janë tekste e fjalë që nuk mund t’i formulojë gjithkush. Ai është njeri i talentuar në shkrim, në të folur, gojëtar i mirë, i sistemuar, racional. Argumentet e tij janë të qëndrueshme. Për ata që janë në politikë, askush nuk bën analizë më të mirë të realitetit shqiptar, por as analizat e tij nuk mjaftojnë. Por përpos gojëtarisë një politikan i mirë duhet të ketë edhe diçka tjetër të cilën sipas mendimit tim Edi Rama nuk po e tregon. Në mendimin filozofik ekziston një koncept “pyka nxirret me pykë”. Nuk kryhen punët me Sali Berishën me fjalime poetike sado të të lënë përshtypje ato. Me Sali Berishën duhet të sillesh, jo si Sali Berisha, por duhet bërë një politikë shumë e vendosur. Unë, fjala vjen, i përkrah protestat. Protestat janë institucion demokratik. Kosova pa protesta nuk do të ishte këtu ku është. Kosova di të bëjë protesta, atë e ka mësuar dhembja, tragjedia, pushtimi, shkelja e të drejtave të njeriut. Në Shqipëri, partia socialiste nuk di të bëjë protesta. Bën protestë sot e pastaj pas një jave, kot. Edi Rama bën protestë të premten e më pas të premten tjetër pastaj pas një muaji, pas dy muajsh. Kot. Mund të jetë se kryetari i partisë socialiste dhe partia socialiste mendojnë se kështu kërkojnë ndërkombëtarët e kështu bëhen protestat. Edhe ne në Kosovë na kanë thënë. Nuk e kanë përkrahur pavarësinë e Kosovës deri ne 2002, kanë qenë kundër, madje as protestat nuk i kanë përkrahur. Pavarësinë e Kosovës jo që jo, kërkesat tona jo që jo por ndërkombëtarët e ndryshojnë kur shohin realitetin. A i keni parë kundërthëniet e ndërkombëtarëve? Sot e dëgjova që Ambasadori Amerikan thonte se me protesta nuk ndërrohet gjendja, nuk merret pushteti, por në Tunizi u thonin se me protesta merret pushteti. Si është e mundur që një kriter duhet për Shqipërinë e një kriter tjetër për Tunizinë? Nuk është kryeministri i Shqipërisë Sali Berisha më demokrat se Ben Aliu, absolutisht nuk është. Nëse lexoni për Tunizinë do të shihni se ka përparuar shumë, por prapë nuk është vend demokrat. Ndërkombëtarët një kriter e kanë për Shqipërinë e një tjetër për Egjiptin. Pse? Unë mendoj se as Bashkimi Evropian dhe as Shtetet e Bashkuara të Amerikës nuk e shohin drejt, objektivisht gjendjen politike në Shqipëri dhe nuk kanë krijuar kategoritë me të cilat duhet ta vlerësonin atë gjendje. Ndërkombëtarët nuk duan të pranojnë rinumërimin e votave, nuk e kanë përkrahur kërkesën për rinumërimin e votave por në Kosovë, a i rinumëruan votat? 40 % të votave u kërkuan të rinumërohen dhe ashtu u bë në Kosovë. Çfarë ka që nuk shkon këtu? Po kërkon të rinumërohen votat. Është njësoj sikur dikush të thotë që më ke vjedh diçka, të cilën e ke fut në shtëpinë tënde dhe ai do të shoh nëse është e vërtetë apo jo. Mua nuk më çudit qeveria shqiptare, por Evropa që ishte kundër numërimit të votave dhe e solli Shqipërinë deri aty ku po e shohim sot.

Ata janë pjesë e krizës sonë?

Ata janë pjesë e krizës dhe mua më çudit sjellja e tyre dhe më tutje. Ata nuk kanë koncept për populizmin në Shqipëri. Ne e dimë ç’është populizmi, përdorimi i popullit në një mënyrë të caktuar. Kemi populizmin komunist Stalinist dhe kemi populizmin e djathtë fashist. Populizmi komunist i drejtohet ideologjisë, niset nga ideologjia dhe i bën thirrje ideologjisë dhe popullin e përvetëson me ide. Komunistët i përcjellin popullit idetë, konceptet, vizionin, i padrejtë, i gabueshëm, komunizmi nuk i dha frytet. Por këtë ia venin përpara popullit ne protesta, demonstrata, kërkesa. Populizmi fashist është tjetër, ka koncepte te tjera, i drejtohet pasioneve. Po Sali Berisha kujt i drejtohet? Pasioneve të njerëzve, jo arsyes, ai nuk paraqet ide, ai nuk paraqet vizione. Populizmi i Berishës është populizëm tipik fashist. Dhe Evropa nuk do ta shohë këtë. Unë shtroj pyetjen tani, pse sillet Evropa kështu? Pse sillet kështu ndaj krizës shqiptare që po zgjat shumë, sepse nuk është prej zgjedhjeve te 28 qershorit me ndërprerje të shkurtra. Kjo krizë zgjat prej viteve 1991-1992 e këndej me ndërprerje shumë të shkurtra. Epo tani faktorët ndërkombëtarë do të duhej të deklaroheshin qartë siç u deklaruan qartë me 1998. Cilat janë arsyet që ndërkombëtarët nuk deklarohen tani? Unë kam mbërritur në rezultatin se ndërkombëtarët nuk duan institucione të qëndrueshme në Shqipëri, por duan “udhëheqës” të fortë e kjo e fortë për ta do të thotë servil që bën çdo gjë që kërkojnë. A e keni parë ku e mbështet legjitimitetin e vetë qeveria shqiptare? Ajo mbështetet në liberalizimin e vizave. Por, vizat iu liruan Serbisë, Maqedonisë, Malit të Zi. S’u dëgjua ndonjë që t’i bënte jehonë kësaj gjëje. Absolutisht. Ajo që ndodhi ishte dicvka e zakonshme. Qytetari në vend që të shkojë në ambasadë dhe të paguajë 20, 30 apo 50 euro tani nuk paguan dhe shkon pa viza. Kjo është divcka që do të ndodhtë. Evropa ka interesa për këto viza të liberalizuara se njerëzit shkojnë e bëjnë shpenzime ne këto vende. Evropa nuk bën gjë pa mend, pa e analizuar dhe vlerësuar mirë. Por në Shqipëri ndodhi mrekullia. Nuk ishte një ngjarje historike dhe e jashtëzakonshme për Shqipërinë, ishte një ngjarje e zakonshme. Kryeministri mblodhi të gjithë studentët e Shqipërisë, të Tiranës, dhe bën një miting me këngëtarë e këngëtare, artistë e aktorë, kush nuk ishte aty.

Megjithatë situata është e polarizuar në Shqipëri mes atyre njerëzve, të cilët mendojnë se vizat apo hyrja në NATO e Shqipërisë që qeveriset prej Sali Berishës është një moment i mirë për shqiptarët dhe është në vazhdim e sipër dhe një pjesë tjetër e shqiptarëve mendojnë të kundërtën që nuk është e vërtetë se Shqipëria është në një moment të mirë por është në krizë politike, ekonomike dhe morale. Këto janë palët përballë, jo thjesht Sali Berisha dhe Edi Rama.

Unë mendoj se kriza është politike, shoqërore, ekonomike, shpirtërore, morale, krizë e përgjithshme, por askush nuk flet për bazën e kësaj krize, shkaqet e kësaj krize. Pse e bazojnë këta legjitimitetin e vet vetëm në liberalizimin e vizave dhe hyrjen në NATO? Sepse nuk kanë ku ta mbështesin tjetër legjitimitetin e vetë. Prandaj shkaqet e krizës nuk kërkohen, shkaqet janë shoqërore dhe ekonomike. Ajo çfarë ka ndodhur në Shqipëri është një tranzicion i regjur, i reduktuar në privatizim dhe ky privatizim ka sjellë një numër tajkunësh, pasanikësh 3%, 4%. Tani, këto pasanikët që janë pasuruar në një tranzicion të reduktuar i shtojmë edhe këta pasanikët e politikës që janë pasuruar nëpërmjet firmave të quajtura parti politike. Pra, pasanikët e Shqipërisë do të jenë diku 10%. Në anën tjetër janë ata të varfrit që bëjnë çmos për të ruajtur vendin e punës se nxirren shumë lehtë nga vendi i punës për t’i futur njerëzit e partisë së vet në punë. Dhe pastaj kemi të papunët. Pra kemi shtresën e neokapitalizmit të pasuruar gjatë tranzicionit të reduktuar dhe shtresën ose klasën e të varfërve ku futen edhe të papunët. Mes tyre është ajo shtresa e kollareve të bardha, pra shtresa e mesme, e cila është e shkatërruar. Ndoshta tani po bën përpjekje të ngjallet pak, por prapë e shkatërruar mbetet kjo shtresë e mesme, shtresa e intelektualëve. Kështu që në Shqipëri kemi në njërën anë furinë kapitaliste të interesit privat dhe në anën tjetër furinë marksiste të luftës për pushtet dhe të hakmarrjes. Ky është sundimtari i Shqipërisë. Pra, në njërën anë furia kapitaliste e interesit privat dhe në anën tjetër furinë marksiste e luftës së tmerrshme për pushtet dhe hakmarrjes. Ja sundimtari i Shqipërisë, ja gjendja e Shqipërisë. Këtu zë rrënjë kriza e përgjithshme e Shqipërisë politike, shoqërore, ekonomike, shpirtërore, morale. Por askush nuk flet për këtë. Nga fillimi deri në fund, çdo ditë, në televizionet shqiptare ka vetëm luftë politike mes partive, nuk ka asgjë tjetër. Nuk ka popull. Ku është populli shqiptar? Populli është vetëm kur e shohim në protesta. Ekzistojnë vetëm partitë politike, njerëzit e politikët të veshur mirë, të dhjamur mirë dhe ata flasin, bëjnë debate, ata mendojnë. Ndërsa popull nuk ka Shqipëria, nuk e shohim atë.

Në ç’mënyrë do vijë zgjidhja për ne, në mënyrë të menjëhershme, një zgjidhje çështjesh mes Edi Ramës dhe Sali Berishës apo një zgjidhje vjen nga ndërkombëtarët apo një zgjidhje që do e prodhojë vetë shoqëria shqiptare?

Zgjidhja nuk është e vështirë tani, në këto momente në Shqipëri. Zgjedhjet e parakohshme bëhen shumë lehtë. Nqs nuk kalon një ligj në Evropë, në parlament, shpallen zgjedhjet. Pra për shumë pak Evropa bën zgjedhje të reja. Në Shqipëri janë pjekur kushtet për të bërë zgjedhje të reja dhe ai që çohet kundër zgjedhjeve të parakohshme ai kërkon të zgjatet kriza në Shqipëri. Kërkon zgjedhje të parakohshme? Urdhëro, nqs keni të drejtë do i fitoni zgjedhjet, nqs nuk keni të drejtë do i vazhdojnë këta të tjerët. Është shumë e thjeshtë. Por nqs nuk duan të organizojnë zgjedhje të parakohshme është legjitime, është e drejtë, është e moralshme, është e kuptueshme, është e nevojshme që me kërkesë popullore, me protesta nga populli dhe madje me mosbindje qytetare të kërkohet realizimi i një të drejte. Në zgjedhjet e qershorit, partia socialiste dhe partia demokratike baraz i ka fituar zgjedhjet, nuk janë 100 mije apo 150 mije veta por është gjysma e Shqipërisë. Pra, po i kërkon gjysma e Shqipërisë. pra, duhet realizuar kërkesa e gjysmës së Shqipërisë. është irracionale, është çmenduri të mohosh kërkesën e gjysmës së popullit. Ku është parë kjo? Dhe po e përsëris, më çudit sjellja e Evropës. Evropa ka shumë përvojë për çdo gjë, për të gjitha. Unë kam punuar gati dy vjet me evropianë në administratën e Kosovës. Nuk ka problem në këtë botë për të cilën nuk e kanë çelësin. Janë shtete të tilla si Franca, Gjermania, Anglia, Italia, Spanja te cilat janë shtete me përvojë sidomos Franca me përvojë planetare. Kanë qenë fuqi koloniale, i njohin e gjithë bota, i njohin të gjitha mentalitetet, i njohin të gjitha mendësitë, kanë prodhuar të gjitha ideologjitë e Evropës dhe të gjitha sistemet janë provuar aty në fillim. Ata e kanë celsin për çdo gjë. Ata e dinë shumë mirë si mund të zgjidhet kriza në Shqipëri. Urdhëroni, ndërhyni, zgjidheni. Është momenti i fundit që institucionet e Evropës dhe të Amerikës të deklarohen për çfarë janë në Shqipëri, çfarë duan në Shqipëri dhe të mos e lënë Shqipërinë në atë gjendje. Dhe kjo gjendje e vazhdueshme që po e rraskapit popullin shqiptar. Gjatë këtyre viteve, substanca kulturore shqiptare është cenuar, është dëmtuar më shumë se gjatë shumë kohëve në histori. Për 20 vjet është dëmtuar shumë substanca kombëtare. Duhet të shohim emisionet që jep një gazetar, për mua i jashtëzakonshëm, Marin Mema, që quhet Shqipëria tjetër. Me emisionet e tij ai tregon se sa shumë është dëmtuar dhe po dëmtohet substanca kulturore kombëtare shqiptare. Fatkeqësisht.

Unë nuk dua ta mbyll me këtë fjalën fatkeqësisht profesor. Do të doja ta mbyllja me diçka tjetër. Nuk kemi mundësi të flasim për Kosovën në këtë intervistë, me problemet e forta me të cilat po ballafaqohet ajo, do ta bëjmë një herë tjetër, por do të doja në fund të kësaj interviste t’ju pyesja që dihet që populli shqiptar ka nevojë për një zgjim, për një rilindje. Po ju, ku e shikoni zërin që do mund ta artikulojë këtë zgjidhje?

Shekulli i 21-të ka filluar si shekull me fat për shqiptarët. Shqiptarët janë një popull në ngritje. Shqiptarët kanë sot dy shtete me një premtim historik që s’do të shqetësojë askënd, që një ditë, edhe pse nuk e dimë më siguri, mund të bëhet një shtet shqiptar. Mund të besojmë se kjo pjesë e shqiptarëve zgjon xhelozi tek të tjerët, zgjon xhelozi edhe në Ballkan por ky është realiteti. Rrethanat historike te fundit të shekullit të 20-të dhe të fillimit të shekullit të 21 ishin rrethana historike ndërkombëtare që favorizuan shqiptarët në përgjithësi. Do të ishte mëkat historik që shqiptarët të mos e shfrytëzojnë këtë gjasë të madhe historike. Si ta shfrytëzojnë? Mendja e shëndoshë thotë se më mirë do ta shfrytëzojë këtë gjasë të madhe historike për t’u konsoliduar si popull, si komb, si shtete në rrugë të gjatë historike me forca të bashkuara. Kjo është ardhmëria e popullit shqiptar dhe kjo i premton më së shumti popullit shqiptar bashkimin e forcave krijuese, ndërtuese të të gjithë popullit për ta pushtuar sa më mirë historinë.

Biberaj: Berisha duhet të largohet. Topi është lideri i ardhshëm i të djathtës

18:12 Politika

Video e skandalit të koncesioneve, Meta do thirret në prokurori

16:13 Politika

Filip Çakuli: “Formimi komunist i Sali Berishës, arritja më e madhe e komunizmit”

14:55 Politika

Countryman "korrigjon" Berishën dhe ambasadorin amerikan: Nuk ishte puç, në Shqipëri e korruptuar qeverisja

14:48 Politika

LSI, Vangjel Tavo: Regjistrimi i popullsisë duke deklaruar kombësinë është në frymën e BE-së

14:42 Politika

Arrestohet gardisti i parë, akuzohet për vrasjen e Ziver Veizit

14:27 Politika

Prifti sërish në prokurori: Ekspertët kanë vërtetuar se video është e pamanipuluar

12:54 Politika

Policia arreston personin që goditi Bekimen më 21 janar

11:13 Politika

Berisha- forcave speciale: Ju luftonit talebanët, mua më sulmuan bazhibozukët

09:29 Politika

Babai i Erisonit: Djali ishte imi, por drejtësia na përket të gjithëve

09:18 Politika