Te fundit
Meta: Opozita të mos frymëzohet nga bllokimi. Bel: Krijoni kredibilitet në rrugën e integrimit
12 Mars 2014, 13:13Politika
TEMA
Fryma e bashkëpunimit dhe jo e bllokimit duhet të na udhëheqë të gjithëve. Shpresoj që opozita të frymëzohet nga integrimi dhe jo nga bllokimi, që është një sëmundje e vjetër e politikës sonë.
Kështu u shpreh Kryetari i Kuvendit Ilir Meta në konferencën e përbashkët për mediat me Presidentin e Senatit francez Jean-Pierre Bel, i cili po zhvillon një vizitë zyrtare në Tiranë. Ndërsa shprehu vullnetin maskimal të mazhorancës qeverisëse për të bashkëpunuar me opozitën në realizimin e reformave, përfshi këtu edhe atë territoriale, Meta tha se jemi të hapur për një bashkëpunim dhe konsesus të plotë. Në vijim Kryetari i Kuvendit duke e vlerësuar vizitën e Bel në Tiranë si mjaft të rëndësishme për forcimin e marrëdhënieve dhe bashkëpunimit midis Shqipërisë dhe Francës, Meta vuri theksin në rivitalizimin e marrëdhënieve ekonomike midis dy vendeve. Në këtë kuadër Meta tha se Shqipëria është një vend i hapur për investimet e huaja, ndërsa i cilësoi investimet franceze si një asset i vyer për zhvillimin ekonomik të Shqipërisë.
“Forcim i bashkëpunimit midis dy vendeve, edhe në kuadër të integrimit europian. Pa një ballkan të integruar tërësisht në BE edhe vetë Europa nuk do të jetë e integruar dhe e plotësuar. E falenderova Kryetarin e Senatit francez për mbështetjen që Franca i ka dhënë dhe i jep Shqipërisë në proceset integruese. E garantova kreun e Senatit të Francës se do të avancojmë me reformat e nisuara dhe do të përmbushim të gjitha prioritetet në rrugën e integrimit”, theksoi Meta. Sipas tij, perspektiva e integrimit në BE është rruga më e mirë që i shërben të gjithë qytetarëve tanë. “Ne besojmë fort tek vlerat europiane, me Ballkanin si pjesë integrale e saj, pavarësisht situatave të vështira ekonomike që po kalon kontinenti ynë”, tha Meta.
Ndërsa, Kryetari i Senatit të Francës Jean-Pierre Bel u shpreh se miqësia mes dy vendeve ka rrënjë të thella, por që duhet të konkretizohet edhe më tej.
“Keni mbështetjen e Francës për të përparuar në proceset integruese në BE. Marrëdhëniet mes dy vendeve do të njohin një dimension të ri dhe ne do të mbështesim aspiratën e popullit shqiptar”, theksoi Bel.
I pyetur sepse Franca i tha ‘Jo’ marrjes së statusit të vendit kandidat nga Shqipëria në muajin Dhjetor, Kreu i Senatit francez theksoi se ne nuk i kemi thënë jo perspektivës europiane të Shqipërisë, por është e nevojshme që Shqipëria të krijojë një kredibilitet në rrugën e saj të integrimit.
“Kjo rrugë është shumë e ngadaltë, por kjo shërben për të forcuar marrëdhëniet mes vendeve aspirante dhe BE. Pra ne kemi thënë që të vazhdojmë sëbashku dhe në muajin qershor kemi një tjetër takim”, theksoi Bel.
Lini një Përgjigje
Më të lexuarat
24 oret e fundit
Javen e fundit
Blog Tema
