INTERVISTA/ Nasip Naço: Ju tregoj skandalet e KLD

Nga Skënder Minxhozi, JAVA

Zoti ministër,së fundi ju përdorët tone të ashpra ndaj Këshillit të Lartë të Drejtësisë. Cili është opinioni juaj në lidhje me situatën e krijuar në këtë institucion?

Gjendja e krijuar në KLD në mbledhjet e fundit të saj, nuk është e rastësishme. U bënë disa mbledhje radhazi, në të cilat Këshilli i Lartë i Drejtësisë mban të njëjtin qëndrim. Mund të them hapur se qëndrimi i KLD është antiligjor, jo bashkëpunues. Besoj se këta përfaqësues të këtij institucioni janë tashmë të kënaqur në ishullin ku janë mbyllur. Vetë fakti që shumica e mbledhjeve janë bërë me dyer të mbyllura, jashtë çdo transparence, i kanë shërbyer maxhorancës që kanë krijuar brenda KLD-së.  Në vijim të pyetjes tuaj, mund të them se nga muaji shtator, kam kërkuar që si ministër i drejtësisë, të bashkëpunoj ngushtësisht me KLD, si dy institucione që janë të detyruar të kooperojnë intensivisht me njëri-tjetrin, për shkak të zbatimittë ligjit, por edhe të prioriteteve të integrimit në Bashkimin Europian. Në vijim të këtij vullneti, kam konstatuar për shembull, që nga 30 gjykata, 21 prej tyre ishin pa kryetar, ose këta të fundit ishin të komanduar ose të deleguar. Duhet të dini që një vendim i KLD mund t’i mundësojë një gjyqtari vetëm tre muaj si kryetar i komanduar, këta kanë qëndruar nga pesë dhe gjashtë vjet. Mjafton kjo, për të kuptuar sesi ka funksionuar këto vite KLD. Këta kryetarë janë lënë në këtë gjendje, për të qenë të ekspozuar ndaj presioneve.

Një fakt tjetër tronditës ka të bëjë me studentët e magjistraturës. Të gjithë ata studentë që kishin mbaruar shkollë vitin e kaluar, nuk futeshin në listë nga KLD, por rrinin në shtëpi, duke u paguar pa punuar, megjithëse në gjykata kishte vende bosh. Kjo pasi në vend të tyre, silleshin studentë nga rrethet e tjera, plotësonin vendet vakante në Tiranë, kurse studentët e Tiranës dërgoheshin nëpër rrethe të tjera. U krijua një listë me 16 magjistratë, që nuk futeshin në rendin e ditës në KLD. Kërkova që ata të hynin në rendin e ditës, por ju e dini tashmë që kërkesa ime u hodh poshtë. U sollën gjyqtarë nga rrethet dhe siç duket, kjo ishte qoka e rradhës.

Ka dhe shumë raste të tjera, për të përshkruar mënyrën me të cilën operon sot KLD. Për katër vende vakante në gjykatën e apelit në Durrës, konkuruan 61 kandidatë dhe fituan katër prej tyre, të cilët morën nga 12 apo 13 vota, ndërsa të tjerët nuk morën asnjë votë, edhe pse ishin gjyqtarë të shkëlqyer, të trajnuar e të shkolluar. Kjo më la përshtypjen se mbledhja e vërtetë ishte bërë diku tjetër dhe se aty po konsumohej thjesht një formalitet. Mund t’ju tregoj një rast tjetër, në një tjetër gjykatë, në Gjirokastër, ku në dy kandidatë për kreun e gjykatës, njëri merr 13 vota, ndërsa tjetri asnjë votë. Pas dy javëve, gjyqtari që s’mori asnjë votë, u caktua gjyqtar apeli në të njëjtin qytet me 13 vota. Këto janë raste dhe fakte tronditëse për mënyrën sesi funksionon KLD.

Një tjetër episod është ai i mbledhjes së javës së kaluar, ku u emëruan gjyqtarë në Tiranë, persona të cilët ishin marrë me aktivitet politik. Ish-drejtoresha e kabinetit e ministrit të brendshëm, konkuron dhe futet në sistemin e drejtësisë jashtë ligjit dhe kritereve. Unë besoj se kjo listë shkeljesh e rastesh flagrante, mund të zgjatet pafund. Mund të shtoj gjithashtu se KLD dhe Inspektoriati kanë të drejtë të bëjnë vlerësimin e gjyqtarëve. Ato e kanë bërë këtë, por për vitin 2005-2006, duke e përdorur vlerësimin e atij viti, për ngritjet në detyrë në vitin 2014.

Pra KLD punon “për llogari të vitit 2005”, siç thuhej dikur…?

Po. Kjo mund të thuhet edhe kështu, pasi kjo është gjendja reale në të cilën ndodhet sot KLD. Më lejoni t’ju kujtoj se sipas ligjit, për t’u bërë kryetar gjykate, ose për të vajtur nga shkalla e parë në apel, duhet të jesh vlerësuar dy herët e fundit me përcaktimin “shumë mirë”. Në asnjë rast, të gjitha emërimet e fundit që janë bërë, asnjë nga kryetarët e gjykatave që janë promovuar, nuk janë vlerësuar me këtë nivel. Ka pasur raste kur janë vlerësuar një herë me “shumë mirë” dhe KLD ka neglizhuar, duke i  emëruar në shkelje të ligjit.

Po përflitet për një riformatim të mundshëm të ligjit të KLD. Sa qëndron ky version?

Në fazën aktuale nuk mund të flitet për riformatim këtij ligji. Është hartuar një draft për të bërë disa ndryshime emergjente, me qëllim që KLD të hyjë në shinat e ligjit, që të mos keqinterpretojë vendimet që merr vetë, por të miratojmë disa amendime për të larguar edhe konfliktin e interesit që e ka kapur Këshillin e Lartë të Drejtësisë.

Mund t’ju them për shembull që një nga anëtarët e KLD, në konflikt të hapur interesi, është emëruar drejtor i shkollës së magjistraturës. Një anëtar tjetër tentoi të kalonte në gjykatën e apelit dhe kjo u bllokua falë ndërhyrjes së partnerëve tanë ndërkombëtarë, të cilët bënë që presidenti të mos e dekretonte rastin në fjalë, por ta linte atë në heshtje, ndërkohë që anëtarët e tjerë e kishin votuar tashmë. Kjo është një tendencë e hapur e gjithë anëtarëve të KLD, për ta përdorur atë si trampolinë, për të bërë karrierë për veten e tyre.

Si një njeri i ligjit dhe ministër i drejtësisë, si e komentoni faktin që këto shkelje masive ndodhin në institucionin më të lartë të drejtësisë në Shqipëri?

Unë mendoj se anëtarët e KLD nuk njohin dhe nuk respektojnë drejt, raportet mes pavarësisë dhe përgjegjshmërisë. Midis këtyre dy elementëve duhet të ketë një raport balancues. Unë besoj se ata janë të kënaqur në realitetin e tyre të mbyllur, atyre nuk u intereson as perspektiva e integrimit europian të vendit, e hedhin poshtë edhe perceptimin e fuqishëm të opinionit publik dhe ndërkombëtarëve për drejtësinë, si një sistem i korruptuar. Mund t’u përmend raportin e Transparency International, i cili në fushën e drejtësinë na rendit në një nivel me Laosin dhe Kamboxhian. Është interesant të shihet sesi asnjë nga anëtarët e KLD, nuk e pranon se në sistemin gjyqësor ka korrupsion. Ata mendojnë se janë më të ndershmit, më të mirët, sikur të ishim duke folur për Norvegjinë, e jo për realitetin shqiptar.

Një pyetje që natyrshëm: në krye të asaj tryeze ulet gjithmonë kreu i shtetit. si e shihni rolin e Presidentit në këtë histori kaq të errët?

Kryetari i shtetit duhet të jetë mbi palët, për shkak të integritetit të tij personal, të detyrës së rëndësishme që ka. Pikërisht për këto motive, ai është vënë aty, që të ruajë disa balanca mes palëve. Në konferencën kombëtare gjyqësore, Presidenti i Republikës ka deklaruar se një pjesë e gjyqtarëve nuk e fillojnë punën në mëngjes, pa pritur zarfin e rradhës nga qytetarët.

Unë besoj se një deklaratë si kjo është thënë në kohën e duhur dhe në vendin e duhur, por mendoj se nuk duhet të mbetet vetëm si e tillë, pra si deklaratë verbale. Presidenti duhet të tregojë konkretisht, edhe me votë, se i qëndron kësaj deklarate. Ai duhet të mbështesë iniciativat e ministrit të drejtësisë dhe maxhorancës, në nismën për të reformuar KLD, por edhe për të nxjerrë jashtë sistemit gjyqtarë me shkelje të ligjit apo fshehje të pasurisë.

I përmenda këto fenomene, pasi rastet e fundit kanë qenë skandaloze. Gjyqtarë me miliona euro të pajustifikuara, të cilët mbrohen vetëm politikisht. Me fjalë të tjera, nuk përgjigjeshin për akuzat tona, mbi dhjetra e dhjetra pasuri të pajustifikuara, në konflikt të hapur me interesin dhe me detyrën që ushtronin. Sigurisht që nuk u mbajt një qëndrim i drejtë, për të dhënë një mesazh të qartë për të gjithë gjyqësorin, për partnerët ndërkombëtarë, për opinionin publik, që Këshilli i Lartë i Drejtësisë distancohet nga rastet në fjalë. Dhe jo pa qëllim në daljen time publike, deklarova që sistemi i drejtësisë nuk ka fytyrën e qeverisë, por ka fytyrën e Këshillit të Lartë të Drejtësisë. Që do të thotë se qeveria, kryeministri, ministri i drejtësisë, të gjithë distancohemi nga shkeljet e ligjit apo krimet korruptive që gjejnë vend në sistemin gjyqësor dhe që i takon qeverisjes së gjyqësorit, pra KLD, që të mrbojë gjyqtarët që janë për t’u mbrojtur, t’i promovojë ata në detyrë, por të largojë edhe pjesën e gangrenizuar apo të korruptuar, nga sistemi.

Ambasadori amerikan Arvizu ka thënë dikur se disa nga gjyqtarët shqiptarë, duhej të ishin pas hekurave tashmë. A pajtoheni me këtë shprehje të tij?

Duhet të nënvizoj faktin se kur ambasadori Arvizu e ka bërë këtë deklaratë, vërtetë nuk kishte gjyqtarë pas hekurave. Kurse tani kemi dy raste të hapura për korrupsion, dy gjyqtarë janë në burg. Sigurisht që maxhoranca ka qenë e vendosur për të zbatuar ligjin, që në ditët e para të punës së saj. KLD na ka mbështetur në dy raste, pasi ka qenë fjala për raste flagrante dhe ishte e vështirë të mbroheshin përballë opinionit publik.

Në rastet e tjera, më vjen keq të them se KLD nuk e ka mbështetur ministrin e drejtësisë. Kam vënë re se ka një farë kompaktësie mes anëtarëve të KLD, për të mbrojtur në mënyrë strikte vetëm e vetëm interesat e tyre personale. Nga muaji shtator e deri më sot, janë mbi 20 procedime gjyqtarësh dhe në 12 prej tyre, është propozuar shkarkimi nga detyra. Një shifër e barabartë kjo, me të gjitha propozimet e tetë vjetëve të shkuara, të marra së bashku. Por këto nisma nuk kanë gjetur mbështetje nga KLD. Ka patur zvarritje të theksuara në futjen e rasteve në rendin e ditës dhe në shqyrtimin e tyre.

Nuk jam nga ata që pretendojnë se çdo propozim i paraqitur në KLD duhet të merret parasysh automatikisht. Por sa kohë që pjesa më e madhe këtyre rasteve kanë ardhur nga vetë KLD dhe unë i kam kthyer me të njëjtin material në KLD për vendimmarrje, është absurde, për shembull, që vetë nënkryetari i KLD që ka sjellë materialin, nuk voton asnjëherë ato që na ka përcjellë vetë. Besoj se kaq mjafton për ta kuptuar sesi funksionon ky mekanizëm i shtrembër, që fillon çeshtjet dhe më pas, për të njëjtat objeksione të vetat, del e thotë “ministri s’ka prova”.

Shpërthen një makinë në lëvizje në Tiranë/ Eksploziv vëllait të drejtorit të burgut

20:10 Politika

FOTO LAJM/ Gjin Gjoni i qan hallin Fahri Balliut (dhe një batutë e Ramës për gjyqtarin)

19:56 Politika

Ana e errët e një feste futbolli

19:48 Politika

Basha: 300 ditë qeverisje, 300 ditë mashtrime, dhunë e brutalitet

19:23 Politika

FOTO REPORTAZH/ Franca feston Ditën e Bastijës me një paradë madhështore

19:19 Politika

Zgjedhjet e PD në Shkodër/ Fiton Ramiz Çobaj, kandidati i mbështetur nga Topalli

17:13 Politika

INVESTIGIMI/ Familja e Berishës dhe Damir Fazlliç fituan miliona euro nga pazaret me pronat

16:59 Politika

Basha takon ambasadorët: Të vendosur të mbrojmë vlerat e demokracisë

15:38 Politika

INTERVISTA/ Nuland: Keni nevojë për një gjyqësor më të pastër e më pak të korruptuar (dhe vlerëson Arvizunë)

16:36 Politika

Rama: KLD s'guxon të kërcënojë qeverinë. S'jemi të lumtur as me prokurorin dhe presidentin

14:46 Politika