Neptun Bajko: Kualifikimi? Tani na kanë të tjerët në dorë

Neptun Bajko është njëri nga trajnerët e kombëtares shqiptare në të shkuarën, në kohët kur kuqezinjtë mblidheshin aeroporteve dhe merrnin bukë me vete. Një realitet me të cilin, kush më pak e kush më shumë, janë përballur të gjithë shqiptarët që e kanë drejtuar ekipin tonë përfaqësues në futboll. Krejt ndryshe ka qenë situata me të huajt, në epokën “Duka”. Që nga Dosena e deri te De Biazi, kanë patur kushte optimale, si çdo kombëtare tjetër në Europë, për të bërë përpara.

E vërteta është se vetëm De Biazi, në fushatën eliminatore aktuale, po e mban gjallë ëndrrën e madhe të shqiptarëve, për t’u kualifikuar në finalet e një kompeticioni madhor, sikurse është Kampionati Europian. Meritë e tij dhe e lojtarëve që ka përzgjedhur e stërvit. Të hënën në mbrëmje, Shqipëria pësoi humbjen e parë në këto eliminatore. Prishja e një “rekordi” e ka hidhëruar paksa mjedisin kuqezi, megjithatë shanset për kualifikim si të dytët në grup mbeten reale.

Neptun Bajko, ish-trajneri i kombëtares në periudhën 1994-1996, duke analizuar ndeshjen kualifikuese me Portugalinë dhe situatën e krijuar pas humbjes me luzitanët, shprehet: “Personalisht kam qenë nga ata që e kam deklaruar qysh para ballafaqimit me Portugalinë se ndaj Serbisë, në “Elbasan Arena”, do të jetë ndeshja më e vështirë e pjesës së dytë të kësaj fushate eliminatoresh. Kështu si erdhi puna, që u mundëm nga Ronaldo me shokë, situata bëhet edhe më e vështirë, në shumë drejtime.

Duke qenë një njeri etik, edhe profesionalisht, nuk ia lejoj vetes të hyj në detaje tekniko-taktike, sepse kombëtarja ka një trajner për këtë punë. Ai është aty, i njeh më mirë se kushdo lojtarët, formën e secilit, dhe në fund përzgjedh formacionin me të cilin luan. Dëgjoj tani, pas betejës, të bëjnë edhe kritika, pse u luajti me këtë formacion, me këta lojtarë, me këtë apo atë modul, zëvendësimet nuk ishin të duhura, apo ishin të vonuara. “Pas pilafit”, sikurse thotë edhe populli ynë, është e kollajshme të bësh kritizerin.

Para ndeshjeve, të gjithë thonë, kudo u jepet mundësia, se kemi një ekip cilësor, me lojtarë shumë të mirë, se luajmë për fitore. Unë mendoj se një ndeshje futbolli fitohet në një aspekt, sikurse edhe humbet. Kjo ndodhi me portugezët. Si ekip që na interesonte edhe barazimi, luajtëm për diçka të tillë deri pesë minuta para fundit të ndeshjes. Kush e njeh sadopak futbollin e kupton se edhe Portugalia na e lejoi në njëfarë mënyre ta arrinim këtë objektiv, pra 1 pikë, si ekip i madh që është, ashtu në mënyrën e vet të (mos)luajturit.

Por, neve na rrëmbeu euforia. Kombëtarja nuk u drejtua më nga trajneri në 5 minutat e fundit, por nga pasioni dhe stadiumi. Skudra veproi në bazë të thirrjes së tifozëve. Dhe u ndëshkuam, sepse tejkaluam veten dhe atë që në njëfarë mënyre kishte minuta të tëra që na e kishte lejuar kundërshtari. E përsëris, në detaje taktike nuk ndërhyj, as pse nuk luan Kaçe, apo dikush tjetër, as përse sakrifikojmë një lojtar sulmues me detyra mbrojtëse. Kjo është puna e De Biazit, për këtë merr meritat dhe përgjegjësitë.

Në fund të kualifikueseve le të gjykohet, jo pas një ndeshjeje. Tani është momenti për t’i qëndruar të gjithë pranë kombëtares, pas një humbjeje që ka ndikimin e vet negativ në moralin e lojtarëve. Do ta kemi shumë të vështirë me Serbinë, e përsëris, më të vështirë se në të gjitha këto kualifikuese, ndaj aty duhet të jetë përqendrimi. Portugalia iku, nuk kthehet më. Kualifikimi për në Europian mbetet një çështje e hapur, një mundësi reale edhe për ne, por pas humbjes me portugezët ka ndodhur një ndryshim: Deri dje e kishim ne në dorë shkuarjen në “Euro 2016”, tani na kanë të tjerët në dorë.”/ Telesport

Hafizi: Mos e dramatizoni, kemi shanse për Europianin

12:07 Sport

De Biazi kontratë me televizionin Rai 2, opinionist tek emisioni “Novantesimo minute”

10:48 Sport

FSHF: Xhani De Biazin e kemi bërë ne të famshëm, jo ai ne!

10:00 Sport

Vendimi i çuditshëm i gjyqtarit turk, i jep dy kartonë të verdhë të njëjtit lojtari në një aksion

15:10 Sport

Lajm i keq për Shqipërinë, zbret e katërta në renditjen e vendeve të treta më të mira

14:48 Sport

Serbët tmerrohen nga Ballisti: "Terroristi" Morina ka një plan të ri për në "Elbasan Arena"

13:52 Sport

Sokol Cikalleshi përplaset me policinë shqiptare, i rrahën vëllain pas ndeshjes me Portugalinë

13:31 Sport

Luksemburgu nga spitali në fushë, UEFA nuk shtyn sfidën me Bjellorusinë

13:27 Sport

Sa shumë vëmendje! Helikopterë dhe snajpera për të ruajtur Ronaldon

13:07 Sport

Mediat italiane elozhe Shqipërisë: Humbje e pamerituar me Portugalinë

12:12 Sport