Monopoli i markimit, hetim kompanisë për shkeljen e konkurrencës/ Kush e ka monopolin e markimit?

Autoriteti i Konkurrencës ka nisur menjehërë hetimet ndaj kompanisë së markimit të karburanteve për shkelje të konkurrencës në treg. Kryetarja e këtij institucioni, Lindita Lati tha për “Top Channel” se inspektorët e konkurrencës kanë zbritur në terren për të mbledhur prova.

“Autoriteti i Konkurrencës në zbatim të ligjit për mbrojtjen e konkurrencës në këtë moment sheh nëse kemi të bëjmë me një proces të abuzimit me pozitën dominuese që është të refuzosh të kryesh shërbimin. Inspektorët e konkurrencës në këtë moment janë në terren për të gjetur dhe evidentuar fakte dhe prova dhe për të hedhur dritë se çfarë ka ndodhur pikërisht nga pikëpamja e ofertës dhe kërkesës, nga të dyja pjesët”, tha Lindita Lati, kryetare e Autoritetit të Konkurrencës.

Por veç abuzimit me pozitën monopol, autoriteti do të hetojë edhe shitjen e aksioneve para disa muajsh nga kompania GFI tek Petroleum Consulting Partners. Sipas Latit, ligji i detyron kompanitë që nëse plotësohen disa kushte të njoftojnë autoritetin para shitjes së aksioneve, çka nuk e kanë bërë.

“Nëse plotësojnë 7 miliardë lekë si xhiro vjetore të vitit të kaluar duhet të sjellin njoftimin, për këtë transaksion, pranë Autoritetit të Konkurrencës. Ndryshe ky transaksion nga pikëpamja juridike nëse plotëson kushtet e ligjit për të marrë autorizimin e Komisionit të Konkurrencës është nul. Nuk kemi pasur asnjë lloj njoftimi për këtë transaksion”, thotë Lati.

Në fakt, koncesioni i markimit të karburanteve ka qenë edhe më parë në lupën e konkurrencës, si një marrëveshje problematike.

“Autoriteti i Konkurrencës është shprehur qartas në maj të vitit 2015, me një vendim dërguar autoritetitet kontraktor, konkretisht Ministrisë së Financave ku i kërkon që duhet të realizohet një vlerësim ekspost i performancës së konçesionarit, pasi kërkohet të hidhet dritë nëse ishte vërtetë ajo efiçencë që pritej në treg, apo jo”, vijon Lati.

Ligji i konkurrencës detyron qeverinë apo ministritë që japin koncesione që përpara nënshkrimit të kontratave t’i drejtohen për mendim Autoritetit, por ky detyrim është shkelur në shumë raste.

Kush e ka monopolin e markimit?

Kush e kontrollon sot monopolin e markimit të karburanteve në Shqipëri? Edhe pse zyrtarisht tenderi ishte fituar nga “Global Fluids”, tashmë pronare e vetme e këtij shërbimi është “Petroleum Consulting Partners”, e cila zotëronte fillimisht 25 përqind të aksioneve.

Ajo është një kompani e regjistruar në Zvicër në kohën kur qeveria kishte shpallur tenderin për koncensionin dhe në të nuk bëhen publikë se kush janë aksionerët e kompanisë, por deklarohet vetëm përfaqësuesi ligjor.

Në shtator të ketij viti kjo kompani u bë pronare e 99.93 përqind të shërbimit të markimit, duke qenë thuajse pronare e vetme e këtij shërbimi, ndërsa GFI ka mbajtur kuotën simbolike prej 0.07 përqind.

Burime nga Ministria e Financave thonë se kompanitë nuk e kanë patur detyrimin për të marrë autorizim nga Ministria e Financave për këtë transaksion, pasi sipas tyre nuk kemi të bëjmë me hyrjen e një aksioneri të ri, por thjesht me ndryshim kuotash brenda aksionerëve ekzistues.

Sipas burimeve nga financat, detyrimi i vetëm që kompanitë kanë patur është ai i njoftimit të Ministrisë për transferimin e aksioneve dhe këtë e kanë përmbushur.

Tashmë pikëpytja më e madhe në koncesionin e markimit, është se kush e zotëron atë? Më saktë kush janë aksionerët e shoqërisë Petroleum Consulting”?. Ministria e Financave thotë se nuk e ka detyrimin për të dhënë informacion mbi këtë pikë, ndërsa vetë kompania nuk pranon të prononcohet.

Për publikun ky mbetet një koncesion i veshur me mister edhe pse bëhet fjalë për një të drejtë ekskluzive sovrane, aktualisht në duar të panjohura./ TCH

Zhbllokohet markimi i naftës/ Transaksioni, si i lëshoi aksionet GFI për një hua të pashlyer prej 711 mijë euro

09:44 Ekonomia

Moody's: Shqipëria duhet të stabilizoj borxhin

17:30 Ekonomia

LETRA/ Rama i shkruan biznesit të vogël

17:34 Ekonomia

Papunësia rritet me 0.2 pikë përqindje

15:59 Ekonomia

Cilët janë kandidatët për çmimin Pashko 2015

14:00 Ekonomia

Bllokohet tregu i karburanteve, koncesionari i ngjyrimit ndërpret punën pa paralajmërim

13:22 Ekonomia

Taksa për makinat luksoze mbi 50 mijë euro

18:38 Ekonomia

Holandezët hapin kompani për paketimin e mjedrës në Fier

14:00 Ekonomia

2 mln euro për rrjetin e shpërndarjes së energjisë, vitin tjetër linja e tensionit të lartë me Kosovën

14:56 Ekonomia

“Taksë” e fshehur 5-10 lekë/litër për naftën, Qeveria rrit me 170 herë tarifën për licencën e karburanteve

11:00 Ekonomia