Gjermania është nikoqirja e Samitit G-20 më 7- 8 korrik. Prej ditësh në Hamburgun me rreth 1,9 milionë banorë ku do të mbahet ky Samit, mediat na kanë ofruar pamje jo të këndshme nga protestat dhe përleshjet e njerëzve me policinë. Mijëra demonstrues protestojnë kundër këtij takimi të nivelit të lartë. Ata e shohin G-20 si burimin e të gjitha të këqiave, si strofkë të neoliberalizmit, përgjegjës për padrejtësinë në këtë botë, etjer. Por Globalizimi është një fakt me të cilin duhet të përballemi. Ai ka qenë dhe është i lidhur me ideologjinë e neoliberalizmit. Të prekur direkt nga globalizimi janë industritë e eksportit. Dhe pikërisht ato i kanë punët në vijë. Nuk është rastësi që eksporti gjerman lulëzon.

Sot polemizohet mbi mundësitë që i mbeten politikës. Dhe këtu është përsëri fjala nëse globalizimi llogaritet si fakt, apo ai i drejtohet politikës si armë e ideologjisë neoliberale. Globalizimi i tregut të kapitalit e detyron politikën të kontrollojë të gjitha masat ligjore që mund të frikësonin një investues. Askush nuk prodhon në një vend ku i duhet të ndeshet me një xhungël të padepërtueshme autoritetesh.Askush nuk e mohon faktin që hapësira e veprimit të politikës sidomos, ajo e shteteve nacionale tkurret nga globalizimi. Për këtë arsye Samitet G 20 (dikur G7,G8) shoqërohen me demonstrata të mëdha ku qindramijëra njërëz protestojnë ndër të tjera edhe për shkak të kërcënimit të kompanive të mëdha për t’u vendosur gjetkë, nëse politika nuk i plotëson dëshirat e tyre.

Ende nuk është e qartë, nëse G20 dhe që ndonjëherë quhet edhe si qeveria e ekonomisë botërore, mund të prodhojë më tepër se sa avull të nxehtë. Katalogu i masave është mbresëlënës, por problemet për zbatimin në realitet të tyre nuk mund të lihen mënjanë pa u vënë re. Njëri prej këtyre problemeve më të mëdha është ndarja e pabarabartë e mirëqënies në botë. Çdo ditë e më shumë po thellohet hendeku mes të pasurve dhe të varfërve. Ky hendek duhet të mbyllet. Ndryshe bota rrezikohet nga një destabilizim kudo në rritje, vlerësojnë ekspertët . Kritikat ndaj globalizimit duhet të merren seriozisht. Shumë vetë ndjehen të lënë pas nga zhvillimet globale e gjithnjë e më shumë janë të pushtuar nga ndjenja e padrejtësisë sociale. Vëmendje e veçantë i duhet kushtuar po ashtu kontinentit afrikan në mënyrë që njerëzit aty të përfitojnë nga frytet e globalizimit.

Në punimet e Samitit të Hamburgut vendin kryesor do ta zërë lufta kundër terrorizmit dhe ndryshimi i klimës. Por edhe Brexit, apo kriza në Siri, saksionet kundër Rusisë dhe iniciativa “Compact with Africa” do të trajtohen gjërësisht nga pjesëmarrësit e Samitit. Rreth 5000 gazetarë nga 65 vende do të ndjekin nga afër këtë Forum të madh botëror. Dihet që G20 nuk është një pazar solidariteti, por interesash. Kjo u vu re në Samitin e kaluar me mangësinë e solidaritetit lidhur me çështjen e refugjatëve. G20 nuk është as edhe një shoqatë e të drejtave të njeriut dhe demokracisë. Vlerat e përbashkëta këtu kanë pak vlerë. Në thelb bëhet fjalë për koordinim ekonomik – dhe për mbrojtje nga terrori.

Gjithësesi, një gjë është e sigurtë: Samiti G20 në Hamburg edhe këtë rradhë do të ketë një efekt të madh vetëm për faktin se krerët e shteteve më të fuqishme ekonomike(19 shtete dhe BE) do të jenë bashkë në një sallë duke diskutuar, bashkë dukë ngrënë dhe bashkë duke u argëtuar. Fundja pjesëmarrësit nuk kanë shumë ç’t’i thonë njëri-tjetrit, interesat ekonomike të shteteve janë shumë të ndara nga njëra-tjetra. Por Politika duhet të jetë aq e ndjeshme sa të dallojë se kur dhe ku nevojitet. Sepse në parim përgjegjësia e politikës është e pakufizuar. Ajo shtrihet përtej pushtetit të saj.

1 komente në “Me sytë nga Hamburgu”

mirel says:

7 Korrik, 2017 16:36 te 4:36 pm

E kuptojne njerezit cfare perfaqesojne keto lloj Samitesh. Vetem shqipot akoma nuk marrin ere se cfare behet. Investime thone, dhe hp jua fusin me koncesione.

Përgjigjjuni