Te fundit
Milan fiton edhe në Shkup ndaj Shkëndijës
24 Gusht 2017, 23:25Sport
TEMA
Aventura e Shkëndijës së Tetovës në Europa League përfundoi bashkë me fërshëllimën e trefishtë në stadiumin e Shkupit që sanksionoi humbjen e dytë në po kaq ndeshje ndaj Milanit.
Në një skenar të pamundur që i rezervoi shorti, shqiptarët e Maqedonisë nuk i tradhtuan parashikimet dhe u dorëzuan përballë italianëve me disfatën 0-1 në Shkup që gjithsesi ishte më e lehtë të kapërdihej se tërmeti 6 ballësh para një jave në San Siro.
E vogël përballë ambicieve dhe kualitetit të italianëve, tetovarët kërkuan të mbyllin me nder një provë gjithsesi pozitive në Europë ndërsa formacioni i trajnerit Osmani fitoi zemrat dhe ovacionet e tifozëve, plot 33 mijë të tillë në Shkup.
Cutrone pas 13 minutash lojë prishi ekuilibrat në impiantin Filipi i dytë me një finish klinik brenda zonës së tetovarëve dhe ky ishte dhe goli i vetëm i skuadrave në të gjithë 90 minutëshin.
Armend Alimi dhe kapiteni Hasani kishin në këmbët e tyre topin që mund t’u jepte një gol historik, por dështuan në kuadratin e mbrojtur nga Storari.
Shkëndija e Tetovës eliminohet nga Europa League pasi regjistroi 3 viktima më parë në futbollin kontinental, Dacian, Helsinkin dhe Trakain. Ndërkohë Milani i Montelës favorit për trofeun, pret shortin me garancinë se do të jetë një kokë grupi dhe do ketë rivalë më të dobët se veten.
Lini një Përgjigje
Më të lexuarat
24 oret e fundit
Javen e fundit
Blog Tema
