Te fundit
Një brez i dështuar, i humbur edhe kur ka fituar
24 Korrik 2018, 13:42Blog
TEMA
Nga Lorenc Vangjeli
Fati i ish-Prokurorit të Përgjithshëm të Republikës është metafora e frikshme e përmbysjes së sistemit të drejtësisë. Pakkush e kishte menduar apo parashikuar se rrokullisja e individit që ishte ngjitur rrufeshëm shumë lart, do të ishte kaq e thellë. Kaq e shpejtë. Dhe për momentin, me shumë gjasa, edhe jo përfundimtare. Dhe me shumë gjasa, më e keqja ende nuk ka ardhur.
Vendimi për sekuestro i disa prej pronave të paluajtshme të tij, të dyshuara si produkt i veprave kriminale, është një hap domethënës, por jo i fundit për fatin e individit që ka drejtuar zyrën e prokurorit të përgjithshëm për pesë vjet.
Në këtë rast nuk flitet për një fat individi. Dhe as për një dramë njerëzore nga ato që përmblidhen në togfjalëshin e famshëm të “shpikur” nga Balzaku që përmbledh dy skaje: shkëlqimin dhe rënien. Eshtë shumë më shumë, për fat të keq. Eshtë simboli dhe parathënia e asaj që do të ndodhë edhe më pas. I përmbysjes përfundimtare të gjithë asaj “polifotoje” njerëzore që është krijuar në pothuaj tre dekada pluralizëm. Fillimisht në drejtësi.
Bashkë me rrënimin total të Gjykatës Kushtetuese dhe asaj së Lartë, mohimi I trashëgimisë së deri djeshme është fruti i hidhur I reformës në drejtësi.
Dimensioni I dukshëm i keqfunksionimit të njërit prej pushteteve kryesorë kushtetuesë në vend është në të njëjtën kohë dhe dëshmia e tërthortë e defekteve që kanë pasur, kanë e do të kenë dy pushtetet e tjera në vend, legjislativi dhe ekzekutivi. Pa lënë pas dhe pa harruar edhe pushtetin mediatik.
Tre dekada mbas përmbysjes së komunizmit, Shqipëria është ende një vend që nuk ka ndërtuar demokracinë funksionale sipas standarteve evropiane. Që nisin që me zgjedhjet dhe transferimin e pushtetit nga qytetari tek një grusht njerëzish për katër vjet e duke vazhduar me ligjin që mbron dhe ndëshkon në mënyrë të barabartë edhe të pasurin, edhe të varfërin, edhe të majtin, edhe të djathtin, edhe burrin, edhe gruan.
Rrugëtimi i vendit nga dhjetori tashmë shumë i largët i 90-s në këtë verë plot kapriçio të këtij viti është rrugëtimi i një brezi të tërë. Njerëzit më “famshëm” të të cilit, tashmë mund të bien dakort përfundimisht se një sistem mund të përmbyset brenda një dite.
Se një sistem ekonomik mund të ndryshojë edhe brenda një stine. Por mentaliteti I një shoqërie, vështirë se ndryshon edhe mbas një brezi. I cili, në tërësi, sot në këtë krizë institucionesh, topitjeje intelektualem e rrënimi moral, mund ta konsiderojë veten një brez të dështuar. Edhe pse shumë nga njerëzit e tij janë histori suksesi vetjak. Që kanë humbur edhe kur kanë fituar. Vetëm për veten e tyre. Siç ishte deri dje prokurori I përgjithshëm. Siç është sot ish-prokurori I përgjithshëm në dy skaje, me shkëlqimin dhe rënien e tij të thellë.
3 komente në “Një brez i dështuar, i humbur edhe kur ka fituar”
Lini një Përgjigje
Lini një Përgjigje
Më të lexuarat
24 oret e fundit
Javen e fundit
Blog Tema
Artikull pesimist dhe pa vlera. Shqipetaret kane plotesisht te drejte te shikojne processin e vitingut me nje fare pesimizmi sepse jane lodhur nga prapaganda politike e partive qe vine e ikin nga pushteti pa ju hyre asnje gjemb ne kembe per te gjtha krimet dhe vjedhjet qe bejne kur kane pushtetin. Por lajmi qe po i ngushtohet laku nje ish prekurorit te pergjithshem vegel e politikes (ju sherbeu me besnikeri te dy paleve) duket si nje shenje e mire.
Ndoshta ai mund te bashkepunoje me drejtesine dhe te ndihmoje me infromacion per te kapur kokat e gjarperit sepse gjarperi politik i Shqiperise eshte me shume koka (Berisha, Nano, Meta, Rama, Basha, Mediu, e shumica e ministratve te te gjitha qeverive) dhe po nuk u prene te gjitha kokat ai do te vazhdoje te helmoje ate vend.
Shqipetaret nga ana tjeter duhet te kuptojne qe persa kohe ate vete i ushqejne me rryshefete politikanet, doktoret, mesuesit/profesoret, zyrtaret etj nuk ka veting ne bote qe t’i ndihmoje.
STOP RRYSHFETET dhe mos u beni dy here imorale – njere kur jepni rryshfetin dhe nje here kur i denonconi qe moren rryshfet! Po te mos jepni ju rryshfet, nuk do perpiqen hajdutet te zene postet e shtetit, ndoshta te4 tjere njerez te ndershem (si puna jote qe lexon kete) mund te bejne punen e shtetit me ndreshmeri.
Po ca renie o Lorenc.Ketu flasim per hajduta ordinier qe nga fshatari me prodhime bio niseshteje qe nga turizmi elitar e deri tek peshkaqenet e biznesit.Ordinier ,ne cdo aspekt.Brez i humbur jane baballaret tane e jo ne .Ne jemi brez i kalbur pa gjak pa bese pa piken e respectit per komunitetin dhe per te tjeret qe do vine pas nesh.Zero brez hajdutesh dhe pordhacash keta jemi ne qe skedina dhe cafeja eshte moto e jetes
Ku ke qene deri tani more Lorenc, nuk i ke pare padrejtesite, vjedhjet, pushtetet e pamerituara, ministrat e korruptuar, president qe vrisnin dhe shisnin pozicione ne drejtesi? Ndertesen qe po rrezohet e shohin te gjithe. Sonte eshte eklipsi henes, na bej nje artikull neser.