Te fundit
Zbulohet arsyeja e sherrit mes Mulit dhe Albanës
16 Qershor 2025, 17:59Antena
TEMA
Muli dhe Albana janë parë duke u kacafytur në Kuvend me njëri-tjetrin, ndërsa ishin ulur në vendet e tyre.
Lelo u shqetësua shumë nga skena dhe e thirri urgjentisht Mulin për të kuptuar se çfarë kishte ndodhur.
— Lëre fare, tha Muli, jam shumë i mërzitur me atë.
Sa erdhi lajmi që Doktori është i sëmurë dhe nuk vjen dot në seancë, u ngrit menjëherë dhe filloi të sillej sikur ishte numri 2.
I thashë: “Ulu, mbaj vendin! Numri 2 jam unë këtu. Nuk e do Doktorin më shumë se unë, ti!”
— Mua s’më tregon dot ti sa e dua Doktorin, m’u kthye.
Kur e kam njohur unë Doktorin, ti s’kishe shans të afroheshe tek PD-ja!
Aty më iku truri...
— Si guxon të thuash që e do më shumë se unë Doktorin, i thashë?!
Kjo është fyerja më e madhe që më ka bërë një njeri ndonjëherë.
As kur na ka blerë votat Edi Rama s’jam ndjerë kaq i fyer, se në fund të fundit i ka blerë me lekë.
Po ti do të ma vjedhësh Doktorin falas!
— Paska qenë debat i egër, i tha Lelo.
— Shumë i egër! Dhe më mërziti shumë indiferenca e grupit.
Prisja të përfshiheshin edhe të tjerët në debat, të thoshin edhe ata: “Edhe ne e duam Doktorin.”
Por nuk pipëtinin fare.
Vetëm ne të dy ziheshim se kush e do më shumë Doktorin.
— Dhe si përfundim, a u pajtuat, pyeti Lelo?
— Jo. I thashë: “Leje këtë muhabet sot, se Doktori është i sëmurë dhe duhet të lutemi për shëndetin e tij.”
Pastaj, e di unë ç’do bëj për këtë shpifje që the ndaj meje.
— Po ti e quajte shpifje, ndërsa ajo më tha se shpifja ishte nga ana jote, se doje të tregoje që e do më shumë se ajo...
— Tani nuk kemi as ku e zgjidhim këtë konflikt, tha Lelo.
Se normalisht duhet të shkonit tek zonja Kalaja që ndan gjyqet në PD, por ajo mund të thotë që “më shumë se ju të dy, e dua vet”, dhe nuk zgjidhet kurrë kjo punë!
— Atë frikë kam, tha Muli.
Ndaj nuk dua ta bëj të madhe, që të mos i shkojë në vesh Doktorit.
Se ai preket shumë kur dëgjon gjëra të tilla.
Më të lexuarat
24 oret e fundit
Javen e fundit
Blog Tema
Lini një Përgjigje