Prej vitesh, fermerët dhe prodhuesit shqiptarë përballen me një paradoks: nga njëra anë, Shqipëria ka potencial të mjaftueshëm për të siguruar perime, fruta, mish, bylmetra dhe prodhime të tjera bujqësore të sigurta dhe cilësore për konsum të brendshëm; nga ana tjetër, tregjet mbushen çdo ditë nga produkte të importuara, shpesh me çmime më të ulëta, që shkatërrojnë konkurrencën dhe dekurajojnë prodhuesit vendas.Kjo situatë është justifikuar prej kohësh nga qeveria me argumentin se vendi është pjesë e Marrëveshjes së Tregtisë së Lirë, një angazhim ndërkombëtar që ndalon bllokimin e mallrave të importuara apo rritjen e tarifave doganore. Por sa i shërben kjo marrëveshje interesit të vendit kur praktikisht shndërrohet në një “kartë e bardhë” për të shkatërruar prodhimin vendas? Sot, prodhuesit shqiptarë nuk kanë vetëm konkurrencën e tregut të lirë, por edhe një sfidë të pabarabartë: mungesë subvencionesh serioze, vështirësi për të depërtuar në rrjetet e shitjes me pakicë, çmime të paqëndrueshme dhe mbi të gjitha, mungesë mbrojtjeje nga shteti. Ndërkohë, prodhimet e importit vijnë shpesh nga vende me subvencione të larta për bujqësinë dhe me standarde që nuk kontrollohen njësoj si ato vendase.Në këto kushte, shembulli i fundit i Donald Trump në SHBA, që rriti tarifat për mallrat e huaja për të mbrojtur ekonominë dhe prodhimin amerikan, ngre një pyetje të drejtë: a është koha që edhe Shqipëria të rishikojë qëndrimin e saj ndaj importit të pakontrolluar?
Natyrisht, Shqipëria nuk është SHBA. Ekonomia jonë është shumë më e vogël dhe më e ekspozuar. Por kjo nuk përjashton nevojën për të vendosur masa të zgjuara mbrojtëse — qoftë përmes tarifave sezonale, rishikimit të marrëveshjeve, vendosjes së standardeve të detyrueshme për produktet e huaja, apo favorizimit të prodhimeve vendase në tregjet publike.
Tregtia e lirë nuk duhet të jetë sinonim i tregtisë së shfrenuar në dëm të interesit kombëtar. Liria në këtë rast, pa drejtësi ekonomike, nuk është as zhvillim, as integrim. Është falimentim i heshtur i fermës shqiptare.
Nëse Shqipëria nuk reagon, shumë shpejt tokat do të mbeten djerrë, fshati do të shkretohet akoma më shumë, dhe do të ushqehemi me produkte që nuk i njohim, nga vende që nuk i kontrollojmë.
Mbrojtja e prodhimit vendas nuk është nacionalizëm ekonomik. Është mbijetesë.

5 Komente

q
qytetari

6 Gusht 2025, 22:00

O Trap... Po ku mer vesh ti nga modeli Tramp

Përgjigjjuni
K
Konsumatori

7 Gusht 2025, 00:24

Po pse keto tonat kontrollohen thua ti ? fermeret tane kane vite qe bejne hile , e me te drejte populli nuk i blen , e deturohen fermeret ti hedhin ne kanal prodhimet , flas per nje pikice fermeresh se shumica punon me ndershmeri , boll me fermere me pesticide po helmoni femije , po helmoni popullin , punoni me nderdhmeri e me cilesi qe tju blihet prodhimi , e ti gazetar nuk the nje fjale per pesticidet qe perdorin disa fermere .

Përgjigjjuni
M
Mira

7 Gusht 2025, 08:31

Mirë do ti rritësh ti tarifat, po ai tjetri çfarë do bëj?!

Përgjigjjuni
V
Vëzhguesi

7 Gusht 2025, 09:17

Shkrim në hava dhe jashtë realitetit. Modeli Trump jo vetëm në Shqipëri, por në asnjë vënd të Evropës nuk mund të aplikohet. Në shkëmbimin e mallrave midis vendeve të BE nuk ka tarifa doganore ose më saktë tarifa është 0%, kjo e vlefshme dhe për Shqipërinë. Edhe midis vendeve të Ballkanit ekziston marrëveshja e CEFTËS, e cila garanton shkëmbimin e mallrave pa tarifa midis vendeve ku taksa doganore është 0%. Nuk ka tarifa midis vendeve të Evropës dhe Ballkanit. Tregtia është e lirë dhe prodhimi vendas duhet të konkurrojë importin. Fshatarët tanë nuk ka nevojë të bëjnë skena kalamajsh duke hedhur prodhimet në mënyrë demonstrative në rrugë, por të arrijnë të konkurrojnë prodhimet e vendeve fqinje. Nuk ka zgjidhje tjetër.

Përgjigjjuni
K
Korrupsioni - nder dhe lavdi

7 Gusht 2025, 09:37

Vendet e fuqishme ekonomikisht dinë si ta mbrojnë prodhimin e tyre. Qoftë me subvencione, qoftë me dumping ose me barriera doganore. Veçse vende të prapambetura si Shqipëria bien në çarkun e "tregtisë së lirë". Franca psh nuk është duke e pranuar marrëveshjen e Merkosurit se i dëmtohet bujqësia e saj. Por ne kemi pasur në krye të vendit gjatë këtyre 35 viteve të fundit kryeministra të paaftë ose puthadorë të të huajve. Shqipëria duhet të ushtrojë kontrolle të forta mbi cilësinë e prodhimeve bujqësore blegtorale që vijnë nga jashtë, si dhe në ato të prodhuara në vend. Por në një vend ku korrupsioni konsiderohet nder dhe lavdi, kush mund të kontrollojë me ndershmëri?! Pra peshku është qelbur nga koka dhe nga bishti. S'ke nga ta kapësh.

Përgjigjjuni