Teksa bota po përjeton transformime të thella gjeopolitike dhe një pasiguri në rritje mbi të ardhmen e rendit ndërkombëtar, libri “Përplasja e Madhe” i profesor Dr. Enver Hoxhaj, ish Ministër i Jashtëm i Kosovës, shfaqet si një analizë e thelluar dhe vizionare mbi këto zhvillime. Kjo vepër nuk është thjesht një analizë e zakonshme politike, por të një lexim mbi dinamikat aktuale globale që ndikojnë drejtpërdrejt edhe në rajonin tonë.

Libri trajton qartazi përplasjen midis Perëndimit dhe Rusisë, duke e vendosur Ballkanin në një kontekst të ri strategjik. Në këtë analizë, roli i Rusisë dhe i Vladimir Putin paraqitet si thelbësor në përpjekjet për të sfiduar rendin ekzistues ndërkombëtar. Sipas autorit, kjo përplasje nuk është vetëm një rivalitet politik, por një përballje e thellë për ndikim global dhe për rikonfigurimin e balancave të fuqisë.

Një dimension i rëndësishëm i librit është analiza e ndikimit të këtyre zhvillimeve në Ballkan dhe veçanërisht në Kosovë. Në këtë kuadër, qëndrimi kritik i Rusisë ndaj shtetësisë së Kosovës shihet si pjesë e një strategjie më të gjerë për destabilizimin e rajonit dhe dobësimin e rolit të Shtetet e Bashkuara të Amerikës në këtë hapësirë.

Lufta në Ukrainë përbën një tjetër element kyç të analizës së profesor Hoxhajt. Ajo nuk paraqitet thjesht si një konflikt rajonal, por si një krizë me pasoja të gjera për sigurinë globale. Zhvillimet e fundit tregojnë se kërcënimi nuk kufizohet vetëm në një zonë të caktuar, por prek gjithë Evropën dhe më gjerë, duke vënë në provë strukturat ekzistuese të sigurisë ndërkombëtare.

Në të njëjtën kohë, libri evidenton dobësitë e reagimit evropian ndaj këtyre sfidave. Qasja e vonuar dhe shpesh e fragmentuar e institucioneve ndërkombëtare, që nga aneksimi i Krimesë në vitin 2014 e deri te zhvillimet aktuale, ka krijuar boshllëqe që janë shfrytëzuar nga aktorë të tjerë globalë.

Një nga vlerat më të rëndësishme të kësaj vepre është ngritja e pyetjes strategjike mbi pozicionimin e Kosovës në këtë realitet të ri ndërkombëtar. Kjo pyetje nuk mbetet vetëm në nivel teorik, por kërkon reflektim të thellë dhe veprim konkret nga politika dhe institucionet vendimmarrëse.

Ajo që e dallon Enver Hoxhaj është aftësia për të ndërthurur përvojën politike me analizën akademike. Ai nuk e sheh politikën vetëm përmes zhvillimeve të ditës, por në një perspektivë afatgjatë, duke ofruar një vizion të qartë për të ardhmen.

Edhe pse kanë kaluar disa vite nga botimi, idetë e “Përplasja e Madhe” mbeten aktuale dhe madje në shumë raste paraprijnë zhvillimet e sotme. Kjo e bën librin një kontribut të rëndësishëm jo vetëm për botën akademike, por edhe për vendimmarrësit dhe publikun e gjerë.

Në përfundim, kjo vepër shkon përtej një analize rajonale dhe shndërrohet në një reflektim të thellë mbi rendin e ri botëror, sfidat globale dhe rolin që duhet të luajnë shtetet e vogla në një realitet gjithnjë e më kompleks.

***Extrakt nga reçensa për librin e ish-ministrit të jashtëm të Kosovës, Dr HOXHAJ, botim i UETPRESS, në takimin promovues, Universiteti i VLORËS, 25 shkurt 2026

2 Komente

T
Tarasi

6 Prill 2026, 17:37

na trembe me kete emer

Përgjigjjuni
B
Baliu

6 Prill 2026, 18:26

Akademik Xhaxhi lexhende e gjalle qe ece n'kom t'veta.

Përgjigjjuni