Fevzo zbardh 3 lutjet e kryeministrit

Ndryshe nga të gjitha vizitat e tjera jashtë vendit, këtë herë fluturimi drejt Izraelit i Doktorit nuk pati jehonën e duhur mediatike. Lajmet në kanalet informative vinin gjithnjë me vonesë, ose pa shumë detaje, ndërsa mungonte zëri, intervistat, që ne jemi mësuar t’i shikojmë me ‘stand up’ nga vetë shefi i qeverisë. Më i çuditshëm ishte fakti, që në delegacionin që shkoi në Izrael ishte edhe vetë Fevzo, që për të thënë të vërtetën nuk u kujdes aspak që informacionet drejt Tiranës të përcillnin mesazhet e duhura.

Ky fakt e shqetësoi jo pak Doktorin. Madje më e rënduar u bë situata pas telefonatës së Zenit. Për minuta me radhë Doktori foli në telefon, duke bërë lëvizje me këmbë dhe duar me të birin që ndodhej përtej telefonit mijëra kilometra larg. Deklarata për Palestinën kishte krijuar reagime të forta në Tiranë dhe këtë fakt e tregon edhe telefonata e Zenit në atë orë të natës. Menjëherë pas këtij momenti, Doktori thirri në dhomën e tij, Fevzon. Ky i fundit po vononte. Pas 15 minutash Fevzo ja behu në derë duke rregulluar kollaren.

– Të kam çuar që para çerek ore një mesazh në BBM, nejse, dakord, erdhe tani, s’ka problem.

– E kisha harruar në dhomë Doktor, isha në pishinë bëra dhe pak saunë se në fakt ky hoteli është shumë i mirë, por kur kemi qenë një herë në Ritz në Bahrein ishte shumë më i madh….

-Nejse, mirë, dakord, shiko pse të thirra, tani diçka duhet bërë se në fakt ka një keqkuptim në Tiranë dhe nuk është se nuk e kam bërë dhe pa qëllim…

– Po ç’ke pse mërzitesh, bëjmë një intervistë paraprake këtu, pastaj do bëjmë edhe një speciale të mirë kur të kthehemi në Tiranë.

-Dakord, e bëjmë atë, nuk na prish punë ajo, por shiko një histori u duhet krijuar atyre për vizitën, që të merren me këtë çështje dhe jo me fjalimin tim.

-Le se e zgjidh unë këtë punë, tha Fevzo. Ti vetëm thuaj që kam futur një zarf me tre kërkesa tek Muri i Lotëve, unë do të pyes dhe ti i zbardh për publikun. Pastaj njerëzit merren me ato.

-Kjo ishte, tha Doktori i gëzuar dhe u ngrit në këmbë duke u sjellë nëpër dhomë. Jo, është. Jo, ta them unë ty, ka shumë rëndësi se shqiptarët janë supersticiozë. Tani fillojmë intervistën, gati jam.

Fevzo bëri gati kamerat dhe pas pak filloi me pyetjen e parë.

– Vizita juaj në Izreal ishte shumë e ngarkuar dhe ndër të tjera shumë e larmishme, jo vetëm në aspektin qeveritar dhe në ato të biznesit, por si rrallëherë ju patët mundësi t’i dedikoni më shumë kohë për të vizituar Vendet e Shenjta.

– Është e vërtetë, kjo ishte një nga vizitat më të bukura të jetës time. Jo, shiko, ishte diçka shumë e bukur. Ju ishit prezent që krahas takimeve të rëndësishme në nivelin qeveritar, edhe pse koha ishte shumë e kufizuar, unë nuk mund të lija pa vizituar disa. Sigurisht vizita në vendin e shenjtë. Siç e dini unë isha në qendrën e botës. Unë pata mundësinë të prek rrasën mbi të cilën u vendos trupi i Jezu Krishtit dhe tek vendi ku ul Pejgamberi. Pata mundësinë të prek dorën e Maria Madalenës, eh, ajo ishte një femër e përkryer! Këto pjesë mos i lini në intervistë, e di ti Fevzo. Pra isha në një prej tempujve më të rëndësishëm të planetit…

– Më falni Doktor, pjesa e rëndësishme ishte edhe momenti kur ju vendosët edhe një letër me lutje…

– Po, pooo, është e vërtetë. Po, poo, kjo ishte një nga më të rëndësishmet! Unë shkruajta 3 lutje të rëndësishme për shqiptarët. 3 lutje të reja, ndryshe ç’bëra në vitin ’92 në një vend të shenjtë dhe që nga ajo kam patur vetëm mirënjohje. Këtë herë bëra 3 lutje dhe jo një. Ishte 3 lutje për të gjithë shqiptarët.

– Pra ju mendoni se lutjet tuaja do të dëgjohen sërish?

– Po, po, patjetër. Unë ato i bëj për popullin tim, ta them unë ty, njeriu që beson me shpirt i ka të gjitha lutjet të realizuara dhe unë e kam të vërtetuar.

– Dhe cilat janë këto lutje, sepse kjo ka shumë interes për të gjithë shqiptarët?

– E para, jo ta them unë ty, është shumë e rëndësishme. Fillimisht kërkova që bota të mos bëhet xheloze për Shqipërinë dhe shqiptarët. Xhelozia është një keqe e madhe për njerëzimin. Zhvillimi ekonomik dhe social është galopant për qeverinë time, ndaj nuk do të doja që vende si Greqia, Italia, Portugalia të bëhen xhelozë për të mirat që qeveria ime ka sjellë.

– Keni të drejtë z.Kryeministër, Shqipëria mund të konsiderohet një vend…

– Ta them unë ty, e bukura e dheut, është ajo që kam thënë gjithnjë dhe e gjithë bota tani e di. Dhe për kjo ishte edhe lutja ime e dytë.

– Shqipëria e bukura e dheut?

– Jo! Shqiptarët të duan Lulëzimin e Tiranës!

– Z.Kryeministër kjo duket më shumë si një slogan për Bashkinë e Tiranës?!

– Përkundrazi. Ne duhet të lutemi për Lulëzimin e Tiranës, sepse është zemra e të Bukurës së Dheut. Imagjinoni një Shqipëri të tillë, arra, lajthi, ullinj, shegë në të gjithë vendin dhe në qendrën e saj një Lulëzim i Tiranës. Ka pas përpjekje të shëmtuera, ka pas njerëz që kanë bë letra që shpirtrat e atyre që deshën të sulmojnë qeverinë time, pushtetin tim, të shkojnë në Parajsë, por unë kam shkru në letër se ata ishin ca kokëpalarë rebelë, që duhet të shkojnë në ferr. Dhe kanë për të ma dëgjue fjalën.

Dhe e treta, e kam thënë edhe një javë më parë në Panairin e Librit. O Zot ruajna nga politikanët shkrimtarë! Dhe ju e dini mirë si është kjo punë. Libri i tij është shitur me detyrim nga te të gjithë militantët.

– Këtë e di Doktor sepse libri im vazhdon të jetë 4 mijë kopje përpara.

– Të them unë ty sa e rëndësishme është kjo punë, Rama merr vesh nga letërsia aq sa Luan Hajdaraga merr vesh nga dietat, apo jo. Dhe imagjino që këta dështakë të marrin në duar fatet e një populli kaq të ndjeshëm. Kjo është e tmerrshme ta them unë ty. Mos dëgjoni gënjeshtrat e djemve të Çakallit. Letra që u vura në Murin e Lotëve ishte një letër për të gjithë shqiptarët, kam lënë edhe numrin e telefonit. Ata që janë të mençur do të dinë ta përdorin.

– Doktor, mendoj se mjafton me kaq.

– Dakord, si të mendosh ti. Ta them unë do të ketë shumë efekt. Sepse njerëzit duan detaje të rëndësishme. Do t’i them edhe Zenit. Alo Zeni! Po, po sapo e bëra, do ta nisim për lajmet. Kam sqaruar gjithçka.

Zeni, i çoroditur nga fjalimi i Doktorit në Izrael

21:03 Antena

Fevzo shkëmben foto dhe lajme nga Deti i Vdekur për KLSH

23:07 Antena

Sandri ngatërron Lulin me Doktorin tek Kënga Magjike

22:38 Antena

Sandri në kërkim të pareve për Gymyshin

20:18 Antena

Flamuri, i pakënaqur me Leskajn se thellon shkeljen e kritereve

21:56 Antena

Flamuri sqarohet se kush e prishi Parkun Rinia

21:30 Antena

Revoltë nga Bathorja në zyrën e Flamurit për Sheshin Skënderbej

20:33 Antena

Beci i shpjegon Kozit hallet e Festivalit dhe vizitës në Norvegji

22:14 Antena

Flamuri bën një plan dhuratash për gjyqtarët

22:45 Antena

Flamuri analizon me Full-hanin ndikimin e krizës greke dhe italiane në Shqipëri

12:12 Antena