Shënime nga Ditari i Doktorit: Dashuri gay në kohë të kolerës

Të dashur miq!

Në kulmin e krizës ekonomike dhe politike, ku e ka futur vendin qeveria e dalë nga mafia e krimit dhe korrupsionit, Edvin Rama po përpiqet të heqë mendjen e njerëzve nga kriza duke hapur debate që tentojnë të shpërqendrojnë opozitën dhe opinionin publik.

E kam fjalën për martesat gay. Avokati i Popullit, një ushtar i bindur i Edi Ramës, ka hartuar një strategji raciste kundër shqiptarëve, duke kthyer në popull pakicat dhe popullin në pakicë. Që kur ka marrë atë detyrë, ai është marrë vetëm me romët dhe homoseksualët, a thua që në këtë vend nuk jeton popull. Mirë sa isha unë kryeministër se populli nuk kishte halle, dhe ai doemos që me romët do merrej, por tani që populli ka halle, përse ai nuk merret me popullin, po merret me gay-të dhe romët? Merret se e urdhëron Edi Rama.

Kjo strategji ka disa pasoja: E para, debati mbi martesat gay bëhet në një kohë kur Edi Rama u ka dhënë prioritet grave të ngrihen në detyrë dhe kur janë zvogëluar shanset e meshkujve për martesa. Me këtë akt, Rama kërkon të drejtojë një shoqëri matriarkati, ku gratë të drejtojnë dhe burrat të martohen me njëri- tjetrin.

E dyta, kjo strategji synon të fusë përçarje në opozitë. Pasi pa më pyetur as mua, po sidomos Lulin, Mesila ka dalë dhe ka sulmuar Avokatin. Kjo zonjë duhet ta dijë se i pari në këtë vend që ka propozu martesat gay jam unë dhe e kam në të drejtën e plotë që ata kanë të martohen me njëri- tjetrin. Duke shfrytëzuar inatet e saj ndaj Lulit dhe duke ditur që Lulit nuk i bën zemra të dalë kundër martesave gay, ajo po provokon brishtësinë e partisë, për të eksportuar në këtë rast brenda opozitës një debat të nxitur nga Edi Rama.

Luli kishte nxjerrë Tritanin të fliste dhe ai që të balancohen zërat dhe të mos duket sikur ka problem, por përsëri sherri mbetet. Ky është një debat që bie ndesh me qëndrimet e mia, të Lulit dhe të dyve së bashku.

E treta që ka dhe më shumë rëndësi, është se debatet rreth seksit në kohë krize shërbejnë si terapi fallco për qytetarët dhe Edvin Rama kërkon ta kalojë krizën duke i vënë njerëzit të mendojnë për seksin. Natyrisht që ka shumë njerëz që kundërshtojnë seksin brenda gjinisë, por dhe të tjerë që e pranojnë. Ky vërshim dashurie në kohën e kolerës së kuqe, që i ka rënë Shqipërisë, është i rrezikshëm dhe ne duhet ta kundërshtojmë me forcë këtë debat.

Për këtë arsye e thirra Lulin dhe urdhërova ndalimin e deklaratave nga ana jonë për ketë çështje. Si një i ri i ardhur nga Holanda, ku martesat gay janë legjitime, ai natyrisht që është në pozitë të vështirë nga kundërshtarët brenda partisë, që duan ta vënë me shpatulla për muri.

Po ia shpjegoja dhe Jozit këtë situatë.

-Si e shpjegon ti, i thashë, që këtë Lulin e ka vënë me shpatulla për muri Mesila, dhe ky të mos ketë guxim të hapë gojën? Çfarë i thua ti kësaj?

-Asht’ e pamoralshme Doktor me e sulmu njat djal në njat pikë. Më dhimbet ai njeri dhe jam pendu thellë që e kam pas luftu dikur. Si mundesh me e vënë njat djal’ me shpatulla për muri. Tan’ jetën ka kenë me fytyrë nga muri!

Shënime nga Ditari i Doktorit: Ngatërresa e tmerrshme me ambasadorin në Beograd

21:35 Antena

Shënime nga Ditari i Doktorit: Mbi debatet në grupin parlamentar

21:44 Antena

Shënime nga Ditari i Doktorit: Një plan djallëzor për t’u bërë milioner

20:11 Antena

Shënime nga Ditari i Doktorit: Ja faktet pse u shkri krimi ekonomik

20:07 Antena

Shënime nga Ditari i Doktorit: Si po e nëpërkëmbin Gimin e Puros

19:51 Antena

Shënime nga Ditari i Doktorit: Debat për Zonjën e Parë në ditën e Nënë Terezës

19:45 Antena

Shënime nga Ditari i Doktorit: Bashkëbisedim me Bujarin për shqetësimet e tij

21:33 Antena

Shënime nga Ditari i Doktorit: Si ta mbulojmë skandalin e vjedhjes së pikturës

20:24 Antena

Shënime nga Ditari i Doktorit: Dyshimet që po më forcohen për Kunatin

20:58 Antena

Shënime nga Ditari i Doktorit: Përjetime në ditëlindjen e 69-të

20:25 Antena