Një milionëshi i parë dhe fillimi i lidhjeve të Damir Fazlliç me Lulzim Bashën dhe vajzën e Berishës

Nga Mero Baze

Dosja Fazlliç, historia e spekulantit që pastroi miliardat e Berishës (1)

1.Një milionëshi i parë dhe fillimi i lidhjeve të Damir Fazlliç me Lulzim Bashën dhe vajzën e Berishës

Unë e njoh personalisht Damir Fazlliç. Shpresoj ta kem takuar në të njëjtën ditë për herë të parë me Sali Berishën, nëse ky i fundit nuk është shtirur në atë takim të parë në Uashington, në janar të vitit 2005. Kompania amerikane BG&R e kishte atë të kontraktuar si specialist për Ballkanin dhe ai do të bënte pjesë në ekipin që do të ndihmonte fushatën elektorale të PD në vitin 2005.

Pasi u lidh kontrata dhe u vendos që BG&R do të ishte krah PD, Fazlliç kërkoi që të kishte një person kontakti në Tiranë. KOP sa ishte formuar, kishte gjithsej dy javë. Lulzim Basha ishte një emër që e njihnin shumë pak. Ndërsa unë e kisha në majë të gjuhës emrin e tij për t’ia dhënë si person kontakti, Fazlliç e shqiptoi gati njësoj me mua.

– Ai më duhet, tha.

U çudita nga njiheshin, por nuk më bëri ndonjë përshtypje të keqe. Si dy ballkanas që kishin emigruar të dy në Evropë dhe në Ballkan, nuk ishte çudi njohja e tyre. Por BG&R u largua që në korrik. Damir Fazlliç, përkundrazi shtoi miqësinë me Lulzim Bashën dhe kunatin e tij, i cili nuk di pse rrinte gjithmonë dy hapa pas tyre, ose hapte derën e makinës.

Në shtator të vitit 2005, në javën e dytë të pushtetit të PD, ata ishin shumë të qartë në planin e tyre. Do bënin para.

Po ku do gjendej 1 milionëshi i parë?

Kur ishim në Uashington për të lidhur kontratën me  BG&R, kontrata u lidh formalisht  për 500 mijë dollarë, por në mbrëmje, ndërsa po hanim darkë në një restorant, Fazlliç përmendi në sy tonë (përveç Berishës që e dinte) se në fakt duhet t’u paguanim dhe 1 milion dollarë në cash. Partia Demokratike në fakt nuk kishte asnjë lek në arkën e saj. Opozita e gjatë dhe raportet konfliktuale të Berishës me biznesin e kishin kthyer atë në një shkretëtirë financiare. Aty për aty Berisha shpalosi planin financiar. 25 degët kryesore të PD do paguanin nga 20 mijë dollar, që do t’i gjenin tek bizneset dhe do paguhej kontrata e Uashingtonit. 1 milion dollarët cash do siguroheshin nga disa burime të tjera.

Darka ishte e këndshme dhe Damir Fazlliçi shoqërohej nga një bionde që e paraqiti pak a shumë si të dashur të tij që punonte për [email protected] Ishte një vajzë shumë e shpenguar, që e vuri në siklet Berishën me fjalorin e saj. Berisha e shikonte me pak adhurim, si një keip magjistarësh që të ndihmonin për fitore, por tregimet e saj rreth Bushit, që sapo kishte fituar mandatin e dytë, ishin të tmershme. Ajo tregonte skenën kur Bush ishte duke u rregulluar për debat dhe pa në sallë një gazetar të Neë York Times, dhe duke mos ditur që mikrofoni ishte hapur, kishte thënë “Qenka dhe ky k.. këtu”. Ajo e tregonte duke qeshur. Berisha u vu në siklet.

U kthye nga mua dhe më shpjegoi në formë shfajësimi për tregimin e saj, se po të ishte për intelektualët e Neë York-ut dhe Uashingtonit, republikanët nuk fitonin kurrë në SHBA. “Këta të rinjtë janë tërësisht liberalë, tha. Shiko si tallen me Bushin”.

Në fakt, ai vet po provonte të hynte në industrinë e të qenit lodër e marketingut politik përmes parave. Marrëveshja kishte përfunduar.

-Ku do t’i gjejmë një milion të tjerat, i thashë unë? Janë shumë.

-Do bëjmë diçka, tha. Janë disa kosovarë që do ndihmojnë. Dhe la të kuptoj që nuk donte të fliste më gjatë.

Siç e pashë më vonë, ata ishin vëllezërit Osmani,  disa “mbretër” të lojrave të fatit dhe shtëpive publike në Hamburg të Gjermanisë. Janë me  origjinë nga Gjakova, që më pas krijuan dhe lidhje shumë të ngushta me Shkëlzenin, djalin e Berishës, dhe kompjuterat e tyre diktuan tregun e lojërave të fatit në Shqipëri deri në vitin 2013.

Damir Fazlliç i kërkoi lekët “cash” në Maqedoni, nga ku tha se do t’ia jepte degës së Beogradit të BG&R. Sokol Olldashi i ndjerë, së bashku me dy të tjerë, që atëhere ishin nëpunës të PD, me ndërmjetësi të një ministri gjakovar të Rugovës, Astrit Haraçia, arritën t’i kalojnë lekët ilegalisht në Maqedoni, ku ju dorëzuan njerëzve të Fazlliçit. E gjitha ishte një histori e pistë, për të cilën dyshova deri në fund se ato para shkuan tek kompania amerikane. Më shumë gjasa ka të kenë shkuar tek klani Fazlliç & Basha dhe u përdorën për hapjen e bizneseve të tyre menjeherë në shtator, sapo PD erdhi në pushtet.

Damir Fazlliç hapi tri firma brenda dy ditëve, në të cilat ka pasur gjithmonë administrator kunatin e Lulzim Bashës, Erionin. Të tria i ka shitur më vonë. Një në Qipro dhe dy pjesërisht te një ish-lojtar i Partizanit të Beogradit, të cilët lidhen më tej me klanin Osmani. Nuk ka shumë rëndësi transferimi i parave dhe shkeljet fiskale. Më e rënda në gjithë këtë histori është fakti që pushteti lëviz nga Lulzim Basha, tek Argita dhe Damiri.

Avokatet e rekomanduara prej saj, si Kola apo Qeleshi, janë përpilueset e letrave të kompanisë, noterja Pustina, e cila punon tashmë me Shkëlzenin, është noterja e kompanisë Breçani, mbesa e Berishës, është ekspertja kontabël e kompanisë, Enkelejda Isufi, kushërira e kunatit të Lul Bashës, është përkthyesja e dokumenteve… kështu, në një zinxhir pa fund lidhjesh të mbyllura brenda një sekti që lëviz nga Basha, tek Argita dhe Fazlliç, vërtitej gjithë historia e kupolës së pushtetit të Sali Berishës.

Në fund të vitit 2005, më ndodhi një incident personal me të. Qeveria e Kosovës po përpiqej të kontraktonte BG&R për lobim rreth çështjes së pavarësisë. Bëhej fjalë për një shumë 1,5 milion dollarë. Ibrahim Rugova, i cili ishte në ditët e fundit të jetës së tij, nuk arriti dot të bindte UNMIK për pagesën zyrtare, ndërsa nuk pranonte që pagesa të bëhej nën dorë, siç propozonte Fazlliç. Palët u ndanë dhe brenda BG&R. Për të marrë situatën nën kontroll, Fazlliç shkon në Beograd dhe nënshkruan një marrëveshje joformale me zëvendëskryeministrin serb, ku thuhej se BG&R do të bëjë lobim për qeverinë e Serbisë kundër pavarësisë së Kosovës. Çmimi ishte dyfish dhe kushtet më të lehta. Pala tjetër brenda BG&R më nisi kopjen e spekulimit të Fazlliçit dhe më shpjegoi se kjo nuk ishte e vërtetë, por Fazlliç ishte duke bërë presion mbi qeverinë e Kosovës, se, nëse nuk firmosnin paratë, ai do lidhej me serbët.

Ishte e rëndë për Berishën, se ishte njeri popullor në Kosovë. Nipi i Stanisiç po bënte presion ndaj qeverisë së Rugovës, ku kishte hyrë me kartëvizitën e Berishës. Ja nisa me e-mail Berishës kontratën tip të Damirit me zëvendëskryeministrin serb. Nuk pata asnjë përgjigje. Nuk e kishte hapur fare për tri ditë. Kur befas kontrata u botua në “Gazeta Shqiptare”. U trondita thellë, pasi i vetmi person që e kishte në e-mail isha unë dhe Sali Berisha. Pyeta sekretaren e tij se kush e hapte e-mail-in [email protected] Më tha që vetëm ajo dhe ndonjë këshilltar i marrëdhënieve publike. Nuk pyeta më.

Atë ditë në mbrëmje isha në debat në TV Klan me Edi Ramën. S’kisha qenë kurrë në debat me të dhe kisha frikë se do bëhesha nervoz.

Debati nisi në mënyrën më të paparashikuar për mua. Edi Rama po ashtu kishte në dorë marrëveshjen e BG&R me Serbinë, dhe e nisi debatin me të. E ndërpreva pa takt dhe nisa të shpjegoj që është një mashtrim. Berisha vetë ishte hutuar nga shpjegimi im dhe pas debatit më tha se “ku i dija të gjitha ato”. I thashë se ia kam nisur me e-mail, por ka përfunduar te “Gazeta Shqiptare”. Nuk më dha kurrë një shpjegim për këtë, edhe pse e kuptoja sikletin e tij.

Dy ditë më pas i shkova në zyrë dhe i çova atë që mund të quhej dosja “Fazlliç”. Ishin një tufë shkrimesh në shtypin boshnjak dhe serb që e akuzonin për mashtrime financiare, lidhje me Legijan që ka vrarë Xhinxhiçin, por ndonjë mendjelehtë e akuzonte dhe për spiun britanik.

U kap te kjo e fundit.

– Janë mendje të mbyllura, tha.

– Nuk e shikon që i thonë spiun britanik?!

– Jo të gjithë, i thashë. Vetëm një. Të tjerët i thonë hajdut dhe vrasës.

– Mos i merr seriozisht, tha. E kanë zili.

Neser:  Përfshirja e Fazlliç përmes Bashës, në historinë e Telekomit, Rrugës së Kombit dhe Megatek

Megjithatë, Kongresi prodhoi politikë

21:50 Editorial

Debati politik për reformën si “Guri i Sizifit”

20:30 Editorial

Përse Basha u prit “pa dëshmitarë” nga zonja Nuland?

19:58 Editorial

Vizion obskurantist, për një “republikë dixhitale”

19:52 Editorial

Si Gërdeci "hodhi në erë", Partinë Demokratike!

18:48 Editorial

I flet Majkos, të dëgjojë Luli!

20:16 Editorial

Të sillesh sikur do jesh gjithë jetën opozitë

19:23 Editorial

“Nënë Zylja” si viktimë, si tregtare dhe si mashtruese

20:35 Editorial

Për dinjitetin e  plakës së gjobitur nga Bashkia

20:28 Editorial

Një sinjal nga Apeli për Familjen Berisha

20:29 Editorial