Kreu i Gjykatës së Vlorës Haluci: S’ka lidhje mes vjedhjes së trojeve në Zvernec dhe ish-gjyqtarit Konomi

Gjykata e Vlorës ka reaguar në lidhje me hetimet që ka kryer prokuroria e që lidhen me falsifikimin e dokumenteve për një truall prej 89 hektarësh në zonën e Zvërnecit.

Sipas hetimeve, pronësia është fituar përmes një vendimi të gjykatës së Vlorës në vitin 2003, me firmë të falsifikuar të Skerdilajd Konomit, gjyqtarit të vrarë në qytetin bregdetar, por që në vitin kur supozohet se është dhënë vendimi me firmë të tij, ai nuk ka qenë gjyqtar.

Gjykata e rrethit të Vlorës inkurajon prokurorinë në këtë proces, por sqaron përmes një deklarate për mediat, se kjo situatë nuk ka asnjë lidhje me vdekjen tragjike të Konomit.

“Trupa gjyqësore e Gjykatës së Rrethit Gjyqësor Vlorë, gjen rastin të inkurajojë sërish organet ligjzbatuese, për zbardhjen e plotë të kësaj ngjarjeje të paprecedent në historinë e ekzistencës së shtetit Shqiptar”, thuhet në njoftim.

Në fakt, deklarata e cila mban firmën e Skënder Halucit, kryetarit të Gjykatës së Vlorës, duket e çuditshme, kur në fakt mediat nuk kanë bërë asnjë lidhje të vendimit të falsifikuar me vrasjen e gjyqtarit Konomi, të cilit ju vu tritol në makinë në vitin 2011 në zonën e Skelës. Mediat vetëm kanë rikujtuar se gjyqtari Konomi tashmë nuk jeton më.

“Gjykata vlerëson se, çdo aludim konspirativ dhe subjektiv mbi vrasjen e të ndjerit dhe aktivitetit penal nën hetim krijon premisat dhe cenon çdo vlerë njerëzore dhe shtetërore të sjellë në vëmendje më lart”, thuhet në njoftim.

Po ashtu, në reagimin e gjatë, gjyqtari i cili “kapet” me mediat, nuk thotë në asnjë rresht asnjë sqarim apo qëndrim të tijin se si ka mundësi që vendimet e falsifikuara të gjykatave, në procese fiktive të cilat nuk kryheshin fare, arrinin të futeshin në arkivën e gjykatës.

Deklarata e plote per mediat:

Gjykata e Rrethit Gjyqësor Vlorë ka ndjekur me vëmëndje zhvillimet e fundit mediatike, në lidhje me ecurinë e hetimeve të filluara nga ana e Prokurorisë së Rrethit Gjyqësor Vlorë, që lidhen me dyshimet e arsyeshme të kryerjes nga ana e personave përgjegjës, të veprave penale të “Shpërdorimit të detyrës”, “Falsifikimit të dokumentave” dhe “Pastrimit të produkteve të veprës penale”, që kanë të bëjnë me titujt e pronësisë mbi sipërfaqe të caktuara tokë, të ndodhura në qytetin e Vlorës.

Së pari, Gjykata e Rrethit Gjyqësor Vlorë, shpreh dhe rikonfirmon edhe një herë inkurajimin dhe bashkëpunimin më të ngushtë institucional me organin e prokurorisë, që jo vetëm në rastet e bëra mediatike, por edhe në eventualitetin e evidentimit të rasteve të tjera analoge, për zhvillimin e një hetimi të plotë, profesional, objektiv dhe të gjithanshëm, në respekt të parimeve kushtetuese të shtetit të së drejtës, ushtrimit të ndjekjes penale sipas parimit të ligjshmërisë, si dhe transparencës dhe të drejtës për informim, me qëllim vënien përpara drejtësisë të çdo personi, pavarësisht statusit apo cilësisë së tij. Duke marrë shkas nga disa publikime në median e shkruar dhe atë vizive, në lidhje me rastin më të fundit të zbuluar nga ana e Prokurorisë së Rrethit Gjyqësor Vlorë, të dyshimeve të arsyeshme të krijuara mbi falsifikimin e titujve të pronësisë mbi një sipërfaqe toke, të ndodhur në zonën e “Zvërnecit”, ku midis të tjerave, ka rezultuar edhe një vendim gjyqësor i Gjykatës së Rrethit Gjyqësor Vlorë, i vitit 2003, i dyshuar se është nënshkruar nga ana e kolegut, të ndjerit z. Skerdilajd Konomi, Gjykata e Rrethit Gjyqësor Vlorë, brenda kornizës kushtetuese dhe ligjore, në respekt të të drejtës themelore kushtetuese për informimin e publikut, etikës profesionale, si dhe në respekt të normave dhe parimeve të përgjithshme të moralit dhe dinjitetit njerëzor, realizon këtë njoftim për median e shkruar dhe atë vizive, duke sqaruar si më poshtë: Se prezenca e një vendimi gjyqësor, i dyshuar se, është dhënë nga ana e kolegut, të ndjerit z. Skerdilajd Konomi, në vitin 2003, periudhë kohore në të cilën i ndjeri z. Skerdilajd Konomi nuk ka ushtruar funksionin kushtetues të gjyqtarit pranë Gjykatës së Rrethit Gjyqësor Vlorë, ka ardhur si rezultat i tërësisë së veprimeve hetimore të kryera nga ana e organit të prokurorisë, në funksion të procedimit penal të nisur si më sipër, për të cilat organi i prokurorisë ka tagrin kushtetues të ushtrimit të ndjekjes penale dhe vënies përpara përgjegjësisë ligjore të autorit apo autorëve të këtyre veprimeve të kundraligjshme, dhe nuk ka asnjë lidhje vdekjen tragjike të kolegut z. Skerdilajd Konomi, për të cilën, trupa gjyqësore e Gjykatës së Rrethit Gjyqësor Vlorë, gjen rastin të inkurajojë sërish organet ligjzbatuese, për zbardhjen e plotë të kësaj ngjarjeje të paprecedent në historinë e ekzistencës së shtetit Shqiptar.

Gjykata e Rrethit Gjyqësor Vlorë kërkon nga media e shkruar dhe ajo e vizive që të ruajnë etikën profesionale dhe vetëpërmbajtjen në raportimin e lajmit, të respektojnë kujtimin e të ndjerit, gjendjen emocionale të rëndë të familjarëve të tij dhe gjithashtu të krijojnë klimën e përshtatshme për zhvillimin dhe mbarëvajtjen e një hetimi të plotë dhe të gjithëanshëm për organet e ndjekjes penale. Gjykata vlerëson se, çdo aludim konspirativ dhe subjektiv mbi vrasjen e të ndjerit dhe aktivitetit penal nën hetim krijon premisat dhe cenon çdo vlerë njerëzore dhe shtetërore të sjellë në vëmendje më lart. Së fundmi, duke qënë e vetëdijshme për rolin e pazëvëndësueshëm dhe themelor që ka pushteti mediatik, në një shtet demokratik dhe të së drejtës, në funksion të garantimit të të drejtës themelore për informimin e publikut, si dhe duke shprehur të gjithë mirënjohjen dhe vlerësimin institucional për misionin dhe veprimtarinë e përditshme të medias së shkruar dhe asaj vizive në Shqiëpri, Gjykata e Rrethit Gjyqësor Vlorë, mbetet e hapur dhe e gatshme që në vijim, të ofrojë mbështetjen dhe të mirëpres çfarëdo forme bashkëpunimi institucional me organet mediatike, në respekt të plotë të normave dhe parimeve kushtetuese dhe ligjore që rregullojnë këtë raport.

Me respekt dhe konsideratë të lartë,

SKËNDER HALUCI

KRYETAR I GJYKATËS SË RRETHIT GJYQËSOR VLORË

INVESTIGIMI/ Bosët italianë të mafias zbulojnë “parajsën” e pastrimit të parave në Shqipëri

11:12 Kronika

Sherr për një femër/ Tentuan të vrasin njëri- tjetrin, bien në pranga polici bashkiak dhe 39 vjeçari

11:03 Kronika

Arrestohet shqiptari me 100 mijë euro drogë të fshehur në frigorifer

09:43 Kronika

Haki Çako sot në Apel për rikthimin në krye të Policisë së Shtetit

09:46 Kronika

Skadojnë 156 mijë pasaporta, Ministria e Brendshme bën thirrje për aplikime të reja

16:57 Kronika

Ministeriali i Mbrojtjes Bruksel, Kodheli: Shqipëria, kontribut për trajnimin e Forcave të Sigurisë Irakene

14:57 Kronika

Histori e trazuar dashurie në Policinë e Krujës. Përndjek kolegen pas ndarjes, arrestohet oficeri

15:55 Kronika

Djegia e autobusit në Krujë, ndërrojnë jetë dy nga të plagosurat

15:16 Kronika

Shqiptarët i vjedhin gomonen lordit anglez në Greqi. Gjendet në Çukë të Sarandës

12:26 Kronika

Gjyqtari Arian Aliaj mori apartament për vetëm… 1 milion lekë

10:11 Kronika