“Humbim 9 milionë euro në muaj”, fasonët letër qeverisë: Jemi në krizë, çdo ditë ikin 50 punonjës

24 Nëntor 2023, 22:25Ekonomia TEMA
“Humbim 9 milionë euro në muaj”, fasonët letër

9 milionë euro përllogariten në muaj humbjet e sektorit fason si pasojë ndikimit të drejtpërdrejtë të dobësimit të kursit të këmbimit, kryesisht të monedhës europiane. Shoqata Pro-Eksport Albania deklaroi se shumë biznese janë mbyllur dhe të tjerat kanë reduktuar linjat e prodhimit.

“Ne dita-ditës kemi një humbje në rreth 50 punonjës që largohen nga sistemi i punës në vendin tonë. Po humbasim konkurrueshmërinë tonë në krahasim me vendet ballkanike. Bizneset prodhuese të sektorit tashmë kanë filluar të reduktojnë linjat prodhuese e disa të tjerë kanë filluar mbylljen e bizneseve, pasi kostot deri në pritje të ndryshimit të situatës janë të larta dhe kjo ka çuar deri më sot që bizneset të rrisin borxhin që kanë me  DPT-n dhe Bankat e nivelit të dytë”, bën me dije Shoqata Pro-Eksport Albania.

Instituti i Statistikave raporton për një rënie të vlerës së  eksporteve me 47.4 milionë euro në 10 muaj, ndërsa shoqata thotë se humbjet janë edhe më të mëdha. Në një letër të drejtuar Ministrisë së Financave, por dhe Sipërmarrjes, përveç kërkesë për dialog, sektori thotë se duhet miratuar edhe paketa që mbështet manifakturën.

“Paketa manifakturë ka mbi 3 vite në sirtarët e Ministrisë së Financave, nuk ka asnjë lloj reagimi”.

“Ajo çfarë ne kemi llogaritur është 150 euro humbje për punonjës, ose 9 milionë euro humbje në muaj në sektor.”

Kursi i këmbimit, rritja e kostove, mungesa e theksuar likuiditeti, por dhe amortizimi i impianteve prodhuese janë ndër problematikat e sektorit i cili zë mbi 38% të eksporteve Made in Albania dhe ka mbi 75.000 të punësuar.

1 Komente

  1. S
    Shkodrani

    Ky nuk eshte biznes dhe ju nuk jeni sipermarres. Njerezit i humbni sepse cdo gje e keni bazuar ne shfrytezimin e deshperimit ekonomik te shqiptareve dhe ju mungon mendesia dhe largpamesia. Nuk njihni rregullat bazike te zhvillimit ekonomik ose me fjale te tjera jeni injorante te paskrupullt dhe te destinuar te zhdukeni.

    Lini një Përgjigje