Te fundit
Vuçiç: Serbia, e gatshme për marrëveshje me Kosovën për të zhdukurit
14 Qershor 2022, 12:43Rajoni
TEMA
Presidenti i Serbisë, Aleksandar Vuçiç, tha se Serbia është e gatshme të nënshkruajë marrëveshje me Kosovën për personat e zhdukur në luftë. “Ne jemi të gatshëm të nënshkruajmë marrëveshje për personat e pagjetur. Jemi të vetëdijshëm se duhet të jetojmë pranë njëri-tjetrit”, tha Vuçiç pas vendosjes së kurorave me lule në Monumentin e Heronjve të Koshares, në Beograd.
Ekipet nga Kosova dhe Serbia janë takuar disa herë për të diskutuar çështjen e personave të zhdukur gjatë luftës në Kosovë, më 1998-99.
Kjo çështje është ngritur edhe në kuadër të dialogut ndërmjet Kosovës dhe Serbisë për normalizimin e marrëdhënieve, i cili zhvillohet në Bruksel, me ndërmjetësimin e Bashkimit Evropian.
Një diplomat i lartë i BE-së ka thënë në fund të prillit se Kosova dhe Serbia janë “shumë afër” nënshkrimit të dy marrëveshjeve për personat e zhdukur, por zyrtarisht, deri më tani, nuk është arritur ndonjë e tillë.
Më herët, kryeministri i Kosovës, Albin Kurti, ka kërkuar që Velko Odalloviq, të shkarkohet nga pozita e kreut të Komisionit serb për Personat e Zhdukur, pasi ai është anëtar i Partisë Socialiste të Serbisë. Kjo e fundit, në vitet 1990, është udhëhequr nga presidenti i atëhershëm serb, Sllobodan Millosheviq.
Gjatë luftës në Kosovë janë vrarë rreth 13,000 njerëz, janë zhvendosur mbi 800,000, ndërsa janë zhdukur rreth 6,000.
Të zhdukur, edhe sot e kësaj dite, mbeten ende mbi 1,600 persona.
Qindra trupa të shqiptarëve të vrarë të Kosovës janë gjetur në varrezat masive në Serbi.
Në kërkimet e fundit që janë bërë në lokacionin Shtaval, në jug të Serbisë, është thënë se nuk janë gjetur mbetje mortore. Kërkimet atje janë zhvilluar për 13 ditë në muajin maj.
Komisioni i Qeverisë së Kosovës për Personat e Pagjetur ka thënë se, edhe pse ka kërkuar vazhdimisht nga përfaqësuesit e institucioneve serbe që të ndajnë informacione nga arkivat e tyre, përfshirë edhe për Shtavalin, “një gjë e tillë nuk ka ndodhur”.
Megjithatë, Odalloviq e ka mohuar këtë.
Vuçiç i vendosi kurorat me lule me rastin e 23-vjetorit të përfundimit të betejës në Kosharë – Komuna e Ferizajt – midis pjesëtarëve të ushtrisë së atëhershme jugosllave dhe të Ushtrisë Çlirimtare të Kosovës.
Beteja ka zgjatur disa javë në pranverë të vitit 1999, duke lënë dhjetëra luftëtarë të vrarë në të dyja anët.
Për deklaratat e Scholzit: “E jona është të negociojmë”
Vuçiç komentoi të martën edhe deklaratën e kancelarit gjerman, Olaf Scholz, i cili, gjatë një vizite në Kosovë, më 10 qershor, ka thënë se dialogu midis Kosovës dhe Serbisë duhet të zgjidhë edhe çështjen e njohjes së Kosovës.
“E jona është të negociojmë”, tha Vuçiç.
“Sa i përket cenimit të shtetësisë dhe integritetit territorial, ne e respektojmë të drejtën publike ndërkombëtare, në të cilën thirret e gjithë bota. Ne vetëm përsërisim atë që Perëndimi vazhdimisht e thotë kur bën thirrje për respektimin e integritetit territorial të Ukrainës”, tha Vuçiç.
Ai shtoi se, gjatë periudhës së ardhshme, pret kritika “të ashpra” ndaj Serbisë për Kosovën dhe për “mosvendosjen e masave kufizuese” ndaj Rusisë, për shkak të pushtimit të Ukrainës.
I pyetur nga gazetarët nëse kritikat që vijnë nga Bashkimi Evropian janë të rrezikshme, Vuçiç tha se ato “nuk janë naive”.
Kosova dhe Serbia janë në negociata për normalizimin e marrëdhënieve qysh në vitin 2011. Palët kanë arritur dhjetëra marrëveshje në fusha të ndryshme, por zbatimi i shumicës së tyre ka ngecur.
Kancelari Scholz ka takuar javën e kaluar në Beograd edhe Vuçiqin.
Gjatë një konference të përbashkët për media, Vuçiq ka thënë se “sot [10 qershor], për herë të parë, ka dëgjuar në konferencën për media në Prishtinë, që dikush nga Bashkimi Evropian po kërkon që dialogu i Brukselit të rezultojë me njohje reciproke”./REL
1 Komente
Lini një Përgjigje
Më të lexuarat
24 oret e fundit
Javen e fundit
Blog Tema
Eshte fatkeqesi kombetare loja e ndyre midis Vuciqit dhe Kurtit per te sabotuar planet perendimore. Me ne fund Vuciqi dhe Kurti u moren vesh qe bisedimet te mos kene qellim njohjen reciproke ne fund, por bisedimet te zhvillohen me idene qendrore te njohjes reciproke….Pra me ne fund nje dredhi tjeter e Vuciqit e thene nepermjet Kurtit qe nuk ka nevoje per nje firme qe Serbia te njohi Kosoven, por e rendesishme eshte te bisedohet per kete qellim. Me sa duket Kancelari Gjerman i ka bere presion jetesor Vuciqit dhe ai pranoi qe te bisedohet sipas planit te Kurtit(qe eshte perseri plani I Vuciqit) ku palet te bejne dialog rreth, por jo per njohje reciproke. Ne "Valsin e Vdekjes" qe Vuciqi kercen me Kurtin, Evropa po mahnitet me masheshtine dhe bukuruine artistike se si keta palivane hedhin kembet. Kurti me ne fund do shes ne tregun Kosovar nje "fitore" tjeter ne strategjine e tij "patriotike", kurse Vuciqi si dhelper serbe do e shes kete si lojen serbe qe nuk ka nevoje per komente. Serbet dine te kuptojne nepermjet veprave