Socialisti Berisha

Nga Lorenc Vangjeli, MAPO

Duhet besuar çfarë thonë politikanët në fushatë? Nëse njeriu që flet është Sali Berisha, përgjigja është e prerë dhe pa dilema: Jo! Në 20 vjet, zoti Berisha është identifikuar si gënjeshtari më i madh politik, i denjë për t´u krahasuar me paraardhësit e tij komunistë të Partisë së Punës që sidomos në dekadën e fundit të regjimit të tyre, nuk kishin asnjë lidhje me realitetin dhe të vërtetën. Arkitekt i kësaj të vërtete të ashpër, për ironi të fatit, është vetë zoti Berisha, madje edhe më shumë se kujtesa popullore që i shënon atij pirueta në politikë që do të rrëzonin çdo balerinë politike, thënie dhe kundërthënie, aleanca me armiq dhe armiq që shndërrohen në miq të ngushtë, premtime që nisin me frazën: unë ju garantoj ju!, që shoqërohen nga paragarancia e plotë se premtimi nuk mbahet.

Vlen të kujtohet edhe fraza e paharrueshme e mesjanarit të katër viteve më parë, në 2007, në Pallatin e Brigadave, kur u ngjiz publikisht “martesa” politike e zotit Berisha me njeriun që e burgosi për katër vjet me akuza politike, Fatos Nano: Mos besoni gjithçka thuhet në fushata elektorale! Këtë tha Berisha duke dashur të justifikojë atë lumë balte të gjatë dhe të gjerë si Nili i Afrikës, që kishte derdhur ndaj Nanos në plot 17 vjet pluralizëm. Në fakt, duhet të kihet në dispozicion fyt i gjerë dhe vullnet i madh për të tërhequr pas pështymën që ka fluturuar shumë herë nga goja, për të arritur në një konkluzion të tillë vetjak, të mjerë intelektualisht, të lodhur individualisht dhe të poshtër politikisht. Zoti Berisha, megjithatë, e kreu këtë mision të pamundur që e kishte paralajmëruar me një tjetër frazë brilante të vjeshtës së vitit 2001, kur deklaronte në Kuvend: “I kam kërkuar të mive që ne edhe me djallin bëhemi kundër Ilir Metës”. Djalli në këtë rast ishte Fatos Nano që kishte nisur katarsisin e tij që rezultoi me rrëzimin e ish-kryeministrit Meta në harkun e disa muajve. Sot, për ironi të fatit, edhe Djalli Nano, edhe Ilir Meta, edhe vetë Berisha, pa përjashtuar dhe një krijesë folklorike që vjen direkt nga e shkuara si Hysni Milloshi, janë bashkë kundër Edi Ramës. Parimi i vjetër, sa më shumë armiq, as më i fortë kundërshtari, kësaj rradhe duket se është më i vërtetë se kurrë!

Edhe gjatë kësaj fushate, dukshëm më të tensionuar dhe më të helmuar me dyshime se fushata e 28 qershorit 2009, gënjeshtrat do të zgjasin ca hundë dhe gjuhë druri që do të priten në 8 Maj nga tehu i votës referendare mes kundërshtarëve PD-PS. Njëra prej tyre ishte brilante dhe duket se do të qëndrojë për ca kohë në Hit Paraden e mashtrimit përballë turmave: “(Edi Rama) Në krye të Partisë Socialiste nuk erdhi vetë, e solli Fatos Nano, e solli Sali Berisha”. Njeriu që i flet vetes me emër dhe mbiemër është po Sali Berisha. Se në çfarë mënyre ka ndodhur një gjë e tillë, zoti Berisha nuk e tha, por është e lehtë të besohet se ai ka bindje se gjithçka në Shqipërinë e djeshme dhe të sotme parapolitike ndodh me dijeninë dhe lejen e tij vetjake, përveç, fjala vjen, demontimit kriminal të predhave në Gërdec. Por edhe këtu ka një problem. Dhe shumë serioz madje, shumë më të rëndësishëm për shqiptarët dhe Shqipërinë sesa dilema e vjetër qesharake mes vezes dhe pulës: Kush ka ardhur më parë në dynja, veza apo pula? Në këtë rast, dilema mund të bëhet trilemë: po vetë Sali Berishën kush e “paketoi” në krye të politikës shqiptare në këto 20 vjet në vijim?

Dikur tregohej një anekdotë. Ramiz Alia, presidenti i fundit komunist i vendit, kishte projektuar ndarjen si amebë (një nga njëqelizorët e parë të vitit “zero” të evolucionit) të partisë së tij në dy pjesë kryesore me bërthamën e vjetër, komunistët klasikë dhe bijtë e tyre. Ndarja do të ishte, komunistët e reformuar nga një anë dhe demokratët e orës së fundit, nga ana tjetër. Dy ishin njerëzit që do t´i drejtonin ato, Fatos Nano dhe Sali Berisha. Llogaria e vjetër e zotit Alia ishte e thjeshtë: “të mirin”, liberalin, ekonomistin me syze tek PS-ja dhe të “keqin”, ultrakonservatorin komunist, mjekun e talentuar tek PD-ja. Dhe ashtu ndodhi. Zoti Alia nuk dinte vetëm një detaj që historia e ka vërtetuar në çdo shembull që jepet: Mbretërit nuk i duan dëshmitarët e dobësive të tyre, ata hakmerren ndaj Mentorëve të tyre. Nuk dinte as etjen për të qenë “mbret” i Shqipërisë që kreshniku Berisha kishte ushqyer që nga momenti që kishte lënë Alpet dhe kishte ardhur për herë të parë në kryeqytetin e viteve 60´, atëherë kur nuk njihte askënd, atëherë kur e frustronte dialekti që fliste, atëherë kur mënyra e të ecurit dhe batanija e ashpër e konviktit ku flinte pak se studionte shumë, e ndante nga të tjerët.

Tashmë ka një diferencë të madhe mes dy armiqve të betuar, Berishës dhe Ramës. Një diferencë që nuk nis në fillim të viteve 90´ dhe në vijim, por që është krijuar si e tillë dhe e pandryshueshme nën regjimin komunist: nëse Rama atëherë i bënte veshët katër që të dëgjonte Pink Floyd, The Doors, Deep Purple e kështu me rradhë, Berisha edhe katër veshë të kishe në dispozicion, t´i priste të katërt nëse dëgjoje Pink Floyd, The Doors, Deep Purple e kështu me rradhë. Sot Berisha flet për Lady Gaga. Ironia nuk ka fund në këtë vend të mbushur plot me ironi, kur po Doktori, quan bir të etërve Ramën.

Thënë këtë, të 20 vjetët e pseudopluralizmit shqiptar deri në fushatën për zgjedhjet adminstrative të majit 2011, nuk kanë ndryshuar asgjë, përveç rigarimit mes komunistit të vjetër dhe të ri me kostum antikomunisti, zotit Berisha dhe anarkistit të vjetër dhe revolucionarit të ri me kostum trendy, zotit Rama. Qytetarët e kanë zgjedhjen e lehtë edhe këtë rradhë: duhet të mendojnë si demokratët e dhjetorit 1990 dhe të votojnë rishtaz kundër gënjeshtarëve komunistë. Pa harruar në këtë peshore as Fatos Nanon që mbeti viktimë e një “plumbi” qorr që qëlloi Doktori nga Vlora, kur u kujtoi të gjithëve sërish, se e shkuara e përbashkët komuniste me të, vlen të jetë argument për miqësinë e tyre të sotme e të nesërme.

Shemsi Prençi: Zv/ministri Peka më tha ‘do të të zhduk po nuk shtype mitingun e opozitës’

08:56 Politika

Kështu trajtohet pa mëshirë një Zonjë e Parë (FOTO)

08:50 Politika

Dështimi në vitin 2009, televizionet heqin dorë nga sondazhet

08:24 Politika

Spahiu: Imuniteti ka nxitur korrupsionin politik dhe gjyqësor

08:17 Politika

Tani është zyrtare: Fukushima është njësoj si Çernobili

08:10 Politika

Tension në bulevard për një çadër të PS, përplasen policia bashkiake me ndërtimorët

19:46 Politika

Jemi n’gjak me qeverinë

18:39 Politika

Zëvendësministri Peka: Prençi shpif, po keqpërdor postin e tij

17:54 Politika

Berishën e tërbon slogani i opozitës: Mjerë ai që u zë rrugën e Zotit shqiptarëve

16:51 Politika

Bardhosh Myrtaj tri orë para vrasjes ka qenë në Facebook

16:25 Politika