Te fundit
Borxhi i Tiranës, Gjergji Muzaka: Zgjidhja u takon atyre, ata janë në hall
21 Maj 2018, 15:38Sport
TEMA
Pak kohë më parë, Gjergji Muzaka fitoi gjyqin me Tiranën që detyrohet t’i shlyejë futbollistit aktual të Skënderbeut 107 milionë lekë për kohën e fundit që ai ka luajtur me bardheblutë.
Skuadrës kryeqytetase iu hoqën tre pikë nga klasifikimi për faktin se nuk respektoi afatet për shlyerjen e Muzakës, por kjo çështje ende nuk ka një zgjidhje dhe mund të ketë sërish ndëshkim për Tiranën.
Gjergji Muzaka ka sqaruar për “Vipsport.al”se çështja nuk ka marrë zgjidhje dhe se gjithçka e ka në dorë vetë klubi i Tiranës:
“Unë kam fituar një të drejtë timen dhe i takon Tiranës të veprojë. Nuk më është bërë asnjë propozim. Janë ata që janë në hall dhe jo unë, sepse e thashë se unë kam fituar të drejtën time. Zgjidhja i takon Tiranës tani. Kjo është e gjitha”, – ka theksuar Muzaka, mesfushori që në periudha të ndryshme është aktivizuar me Tiranën.
Për të mos rrezikuar masa të tjera ndëshkuese, drejtuesit e klubit të Tiranës duhet të veprojnë me urgjencë, pasi edhe afatet kohore kanë kaluar për shlyerjen e Muzakës.
Tirana ka edhe probleme të tjera për të zgjidhur, ku ndër më kryesoret është ajo e trajnerit Ze Maria. Me këtë të fundit do të ketë një takim sot presidenti Refik Halili dhe mbetet për t’u parë çfarë vendimi do të merret.
Lini një Përgjigje
Më të lexuarat
24 oret e fundit
Javen e fundit
Blog Tema
