Te fundit

Muli shpjegon si e kanë refuzuar partitë e vogla për koalicionin me Doktorin 

9 Mars 2023, 20:04Antena TEMA

Muli dje në mbrëmje ishte shumë i nxehur.

Pasi e kishin refuzuar gjithë partitë e vogla për t’u bërë partnerë në koalicion, u çoi një mesazh gjithë degëve të Foltores të fillonin të regjistronin si të pavarur kandidatët e Primareve.

Por sot në mëngjes i kishte ardhur përgjigjja se dhe ai afat ka kaluar.

I shqetësuar thirri Lelon ta diskutonin.

-Po ça të thanë këta që të refuzuan, tha Lelo?

-Po ca të them unë, ky Gon Duka do me provu partinë që ka ble. E ka me merak.

-Dakord. Po Dulja?

-Dulja thotë e kemi bë marrëveshjen bashkë publikisht, do më mbështesni në tre bashki, do t’u mbështes në 58 të tjera. Kemi mbaru punë.

-Po Mediu?

-Mediu thotë nuk ka lezet të bëni koalicion me mua se do thonë i regjistroi Celibashi me hatër për shkakun tim.

Më dëmtoni reputacionin.

-Po Ndoka?

-Ndoka nuk është kundër në parim, po thotë që nuk mund të udhëheqë partinë e Saliut, një katolik i devotshëm si ai.

Po Arjan Starova?

-Ai thotë dakord jam me Doktorin, por partia ime është euroatlantike dhe bie ndesh me platformën e Doktorit.

-Po ky i Ballit Kombëtar?

-Ai dakord është, por ka kusht të mos jetë Balli Kombëtar Demokrat.

-Po ky i Ballit Kombëtar Demokrat?

-Ai dakord është, po thotë të dënohet fraksioni tjetër i Ballit.

-Po legalistët?

-Dakord janë, por duan të futim në program kthimin e Mbretërisë.

-Di çfarë ke ti? Lere fare, tha Lelo.

Ja regjistrojmë kandidatët Ilir Metës dhe i bëjmë thirrje popullit që janë tanët.

Më mirë të vdesim bashkë me Ilir Metën se sa të dorëzohemi tek Alibeaj.

-Dakord jam, tha Muli.

Lini një Përgjigje

Më të lexuarat

Blog Tema

Powered by Tomorrow.io