Para zgjedhjeve të 14 majit, publikova një analizë rreth zgjedhësve që banojnë në Shqipëri dhe atyre që janë në emigracion (https://www.gazetatema.net/blogu-tema/rreth-42-e-zgjedhesve-ne-lista-jane-ne-emigracion-i389494 ). Në atë analizë, ndërthura të dhënat zyrtare të KQZ-së, INSTAT-it, Bankës Botërore, EuroBarometrit dhe UNDP-së, për të arritur tek shifra 42% e zgjedhësve që janë në emigracion. E përkthyer në numra realë zgjedhësish, rezulton se nga 3.65 milionë shqiptarë në listat zyrtare të zgjedhësve, rreth 1.52 milionë (42%) janë në emigracion dhe vetëm 2.13 milionë banojnë këtu.

Pas përfundimit të votimit, KQZ-ja raportoi se vetëm 1.4 milionë zgjedhës me të drejtë vote morën pjesë në zgjedhjet e 14 majit. Me fjalë të tjera, nga 2.13 milionë banorë të rritur të Shqipërisë, rreth 730 mijë nuk votuan. (Këtu nuk po llogarisim disa qindra emigrantë që erdhën në Himarë me autobusë nga Greqia…)

Nëse 730 mijë mospjesëmarrësit do t’i etiketonim si anëtarë hipotetikë të “Partisë së të Zhgënjyerve”, partia e tyre do të rreshtohej e dyta pas PS-së në votat për kryebashkiakë (kandidatët e PS-së për kryebashkiakë morën rreth 790 mijë vota). Kandidatët për kryebashkiakë të “Bashkë Fitojmë” do të renditeshin në vend të tretë, me distancë nga vendi i dytë (morën vetëm 500 mijë vota). Ndërsa ata të partisë së Arlind Qorrit (që e kishte sefte në një garë elektorale) ishin thjesht një zhurmë e lehtë statistikore më 14 maj.

Kjo tablo elektorale demonstron se ka hapësirë për një forcë të re politike në Shqipëri (jo e udhëhequr nga një 80-vjeçar i stazhionuar në politikë), për të sfiduar murin elektoral të ngritur nga Edi Rama qysh kur ishte në opozitë. Por shenjat e deritashme janë se një forcë e tillë nuk po duket në horizont…

3 Komente

E
Enes

23 Maj 2023, 13:33

Asnjeri nuk e analizon mospjesemarrjen ne votime. Askush nuk e analizon faktin qe gjysma e shqiptareve jane larguar nga vendi. Vetem byroja te jete e kenaqur.

Përgjigjjuni
G
Genti

23 Maj 2023, 13:42

Te ai 730 mijeshi qe nuk votuan jane te majte te zhgenjyer po aq sa te djathte. Nuk jane vetem te djathtet te zhgenjyer nga Berisha dhe Basha por edhe te majte te PS-se dhe LSI qe nuk gjejne referenca te lideret aktuale. Numri i abstenuesve sa vjen e rritet por edhe i atyre qe ne fletevotime shprehen kunder qeverisjes dhe opozites se korruptuar me fyerje dhe sharje banale ne shenje revolte ndaj politikes. Dhe kjo gje do vazhdoje drisa politikanet e sotem te mos flertojne me krimin dhe te mos vihen para gjyqit per shperdorim dhe korrupsion. Berisha dhe nje mendim qe te detyrohen me ligj votuesit te votojne. Kjo do ishte e pranueshme vetem kur ligji te veproje mbi banden e politikaneve hajdute qe prej 30 vitesh pasurohen ne menyre kriminaledhe nuk denohen.

Përgjigjjuni
I
Ilirjan

23 Maj 2023, 19:28

Kush nuk eshte ne Shqiperi... As te drejte vote si japin... Lapangjozet! Numerojnè milionat qe dergojne shqiptaret nga jashte po, kete se harrojne ta bejne. Kjo eshte FRIKE nga vota dhe... MOSMIRENJOHJE. Jo per gje po e kane PREMTUAR... Zgjebsat!

Përgjigjjuni