Mungesa e Fanes nxit ëndrrën e Tanit të Kreditit për Guvernator

Duke përfituar nga mungesa e Fanes, Tani i Kreditit mori dje një grup xhirimi të TV dhe nisi projektin e tij të ëndërruar. Guvernatorit Fullani po i vjen fundi dhe me ato që ka bërë, ai Burri e ka të vështirë ta rikandidojë. Edhe pse ai po përpiqet të dërgojë sinjale se ka në dorë fatin e Ilir Metës në Gjykatë të Lartë, sërish nuk i ka punët mirë. Mbi të gjitha Tani i Kreditit nuk e duron dot faktin që edhe Sandri ka dy televizione, dhe Guvernatorin ta zgjedhë Sandri kur mund të bëhet Tani vetë. Për më tepër këtë gjë ja ka treguar vetëm një herë Fanes dhe ai ishte entuziazmuar.

-Jam gati të marr kredi sa të duash ti, i kishte thënë, vetëm të shikoj njëherë Guvernator. Po e ke folë me atë lart apo jo?

Tani i Kreditit këtu kishte marrë një hije të rëndë dhe i ishte përgjigjur.

-Po ai ka kohë që më lutet, por unë po bëj llogaritë e mia.

-Po ç’llogari mo vëlla, llogaritë janë sheshit. Ti bëhesh Guvernator i madh, këtu lëmë burrin e Vanës, i fusim ca kredi të tjera, dhe ty të kemi atje për ditën e keqe. Po ju lëkundën këmbët bankës sonë të parës, bëj shpejt e shpejt një plan me qeverinë dhe na merr përsipër kreditë.

-Unë po hyra, hyj për gjëra të mëdha, i kishte thënë Tani, këto që thua ti i bëj që sot po desha.

Sidoqoftë Fanes nuk i kishte ikur entuziazmi.

Dje Tani vendosi të nisë planin e tij. Me ekipin e televizionit filloi të xhirojë një spot publicitar para Bankës së tij. Skenari i spotit është i kombinuar me filmin ‘Guximtarët’. Është marrë një skenë nga ai filmi ku një djalë qullash që e shajnë dhe rrahin të gjithë thotë “Qeshni ju qeshni, po ua tregoj unë qejfin”. Dhe befas pas kësaj në sfond duket një njeri i menduar që bën sikur lexon libra, pastaj sikur shkruan libra, pastaj sikur dhuron libra, pastaj sikur ëndërron banka, pastaj sikur bën banka, pastaj sikur drejton banka, pastaj sikur bëhet Guvernator dhe mbron gjithë bankat.

Sekuenca e fundit është më bombastike. Shfaqen silueta biznesmenësh që shkrihen të gjitha në fytyrën e Fanes dhe thërrasin ‘kredi, kredi, kredi, kredi’. Tani i Kreditit që shfaqet si engjëll nga qielli… dhe hedh një re që kthehet në shi lekësh mbi kokat e tyre.

‘Merrini, ua solla, ja ku i keni. Kredi për të gjithë. Tani keni një engjëll mbrojtës…. dhe fjalia e fundit “Tani i Kreditit për guvernator”’

I gjithë skenari është bërë vetë nga Tani i Kreditit. Edhe sheshi i xhirimit u zgjodh po nga ai para derës së bankës. Edhe orari u zgjodh i mirë diku pas drekës mos të kishte shumë lëvizje. I vetmi njeri që u prishi punë ishte Gim Nesho. Ishte orari që ai kthehej në shtëpi dhe sapo pa që po xhirohej, mendoi se do ishte Doktori ose Lul Basha dhe bënte sikur harronte ndonjë gjë dhe kthehej ta kapte kamera që të dilte në ekran. Operatori i tha disa herë të mos kaloj më se po xhirojnë për një reklamë, por ai nuk dëgjonte. Tani i Kreditit u detyrua të dërgonte rojën e bankës, bleu nj puro tek Tobacco dhe e thirri.

-Gimi, eja ndezim një cigare…

-Ou, po ku je mo i madh, si je zoti Guvernator, i tha.

Tani ngriu. Ku e dinte ky që kish nis fushatën për Guvernator….

-Guvernator je, je drejtor banke, i tha, por dhe më lart mund të shkosh. Mjafton që ai legeni të mos marrë mandatin pa të gjitha do bëhen. E more vesh apo jo? Paska thënë diku që ky Kolegji e ka  zbardhë mirë vendimin. Hëhë, ja tregoj unë qejfin. Fola tani me Uashingtonin se mezi zbardh atje, duhet të presësh deri në drekë me orën e këtushme. Fola me një komshi që kemi pas aty në pallat, se atij i punon djali në një restorant picash ku shkon ha drekë Filip Gordon. Më dha fjalën ai se sa të kthehet nga Ballkani Gordon, në drekën e parë që do shkojë aty do t’i çojë mesazhin tim për këtë legenin dhe s’e ngre më kokën…

Ndërkohë zbriti roja me puron dhe Tani i Kreditit ja futi në xhep me takt. U dëgjua një tingull metalik nga takimi i mbështjellëses së puros me një tjetër të ngjashme në xhep. Gimi e kuptoi dhe e nxori menjëherë.

-Është bosh, tha, e mbaj për qejf kur iki rrugës po është bosh. Rrofsh. I madh je. Guvernator do bëhesh mos e diskuto. Na ke të gjithëve mbështetje. Fola dhe me këta biznesmenët. Të gjithë të duan. Taqi, Fania, Bani, Gjeku, të gjithë. Po do flas me dikë dhe nga Uashingtoni, po dhe në Wall Street kam njerëz. Njoh një djalë nga Puka që ka ecur aty se ka pasë qenë shofer limuzine aty po tani ka bë pare dhe shoqëron këta të bursës. Dhe ata mund të të ndihmojnë. Të takon ai vend, ka lezet. I vetmi që ke ngritë një bankë nga hiçi duke pasë klientë dy familje kryeministrash. Të tjerët rrinë vërdallë të gjejnë klientë koti. Hallall e ke vëlla, i tha.

Tanit Kreditit nuk i hynin në vesh lëvdatat, por donte që Gimja të mos bënte më rrugën para kamerës që të ndërpriste xhirimin. Dhe për fat iku në drejtim të kundërt nga ishte nisur kur u shfaq.

Pas kësaj Tani e mblodhi veten. Ideja se po bëhej Guvernator iu forcua më shumë. Spoti promocional po i dilte hata. T’ia tregoj një herë atij Baboos, tha me vete kur ishte duke mbaruar. Se po e pa ai, e përhap gjithandej dhe më rritet autoriteti. Mjafton ta marrë vesh Sandri ta dijë me kë ka të bëjë. Dy TV Sandri, dy TV Tani, një gazetë koti Sandri, një gazetë më pak koti Tani, plus dhe gazetën e Fanes dhe prapë t’ia linte Guvernatorin Sandrit. Budallallëk, tha me vete. Përfytyro çka hequr Tani i Krediti t’i gjente miliona euro gjithë bizneseve të Familjes pa hipotekë. Po të jetë guvernator, boll të mbyllë një sy dhe i bën brenda ditës.

Pas një ore shkoi në televizion dhe thirri Babon. I tregoi pak a shumë skenarin e spotit dhe përmbajtjen.

-Shumë mediokre shef, i tha Baboo. Duhet ta bësh vetë një skenar dhe një spot, se ti je më i talentuar se të gjithë. Kjo që më tregove ishte shumë mediokre, shumë fshatareske, shumë primitive. Ti ke nevojë për diçka të fortë, fine si djalë qyteti që je… Kjo duket sikur e ka bërë Fania.

Tani i Kreditit u pre fare. Tani as i tregonte dot që e kish bërë ai, as kishte dëshirë t’ia faturonte Fanes gjithë atë punë që ishte bërë.

Bëri sikur u nxeh.

-Ti Baboo, tha, nuk merr vesh nga spotet, merr vesh vetëm nga çmimet e spoteve. Ik pirdhu se s’kam nevojë për mendjen tënde.

Babooo nuk foli. U çua, ngriti dorën e majtë ,e çoi pas kokës dhe pak mbi cepin e veshit të djathtë, nisi të rrëmonte duke shpërndarë një re të lehtë pluhuri të bardhë prej zbokthi.

Tani i Kreditit me Baboon, komplot kundër Fanes

20:03 Antena

Fania mahnitet me lajmet nga Brukseli

22:02 Antena

Fania propozon kreun e OSBE për degustator birre

09:50 Antena

Fania merr mbështetje nga OSBE për kredi për elbin

19:38 Antena

Fania diskuton planin e biznesit për Fani University

18:45 Antena

Fania kërkon ndihmë nga Zeni të blejë elb për birra

19:58 Antena

Fania, dyshime për Tanin e Kreditit

20:20 Antena

Shpërthen lufta mes Fanes dhe Sandrit për çështje të bankave

22:03 Antena

Fania, xheloz për drekën Meta- Zheji

21:23 Antena

Fania përgatit festën për mandatin e Lul Bashës

20:41 Antena