Shënime nga Ditari i Doktorit: Ngatërresa e tmerrshme me ambasadorin në Beograd

Miq të dashur!

Ka ndodhur një ngatërresë e dhimbshme, që për disa orë më tronditi dhe më la pa frymë. Ambasada jonë në Beograd kishte përgatit raportin e zakonshëm për ministrin e Jashtëm në Tiranë dhe për mue. Sekretarja e ambasadës, një vajzë e re, nuk i dinte adresat e e-mailit dhe kish pyetë në kryeministri, sa e ka e-mailin zoti Berisha. Ata i kishin dhënë e-mailin e Ditzi Bushatit. Pastaj, kur ajo e kishte pyetë si e ka emalin Ditzi Bushati, ata i kishin dhënë e-mailin tim. Kjo ishte ngatërresë e qëllimshme, e bërë nga stafi i Edvin Ramës. Dhe ja seç ndodhi.

Sapo hapa e-mailin, shikoj një raport nga Beogradi.

Fillova të lexoj.

“I dashur shef.

Më lejo të shpreh konsideratat e mia të larta për punën tuaj. Është një nder i madh për mua të kem shansin të punoj me ju si ministër i Jashtëm. Qeveria e re, e kryesuar nga Edi Rama, i ka dhënë një hov të ri diplomacisë shqiptare dhe na ka çliruar nga dogmatizmi, orientalizmi dhe politizimi që na impononte qeveria e mëparshme.

Jam veçanërisht i lumtur që kam të bëj me ju, një djalë i ri, i shkolluar, bir e një familje të madhe të historisë sonë.

Desha t’iu vë në dijeni për disa zhvillime të fundit në Beograd në raport me Shqipërinë.

Sikurse e dini, në Kosovë do mbahen zgjedhjet me 3 nëntor dhe Daçiç do shkojë të votojë aty. Nuk është mirë të merreni me debatin a duhet të shkojë a jo, se vini në siklet dhe Thaçin. Fundja le të shkojë se nga Prizreni është. Në Beograd ka një shqetësim se ju jeni afruar shumë me Turqinë, Italinë dhe Greqinë dhe po injoroni Beogradin.

Lidhur me Kosovën, këtu janë të kënaqur që keni marrë këshilltar Shkëlzenin dhe që keni mbështetur vizitën e Erdoganit, dhe kjo është pak problem që duhet ta korrigjoni.

Sa për Berishën, këtu ka një lloj shqetësimi se mos bizneset e nisura në kohën e tij do të ndërpriten. Ma kanë përmendur disa herë nëse do të kenë probleme bizneset serbe në Shqipëri pasi kanë qenë në kulmin e tyre gjatë gjithë historisë. U kam thënë se do bisedojmë rast pas rasti.

Nga burimet e këtushme, Berisha ka bashkë me serbët biznesin e interkonjeksionit me Kosovën, depozitat në Portoromano, një fabrikë skrapi në Shënavlash, tregtinë e kompjuterëve, etj. Duhet të veproni shpejt t’i eliminoni.

Shpresoj të shihemi kur të vij në Tiranë. Deri atëherë ju shkoftë mbarë dhe suksese Rilindjes, e cila po na bën të gjithëve krenarë që jemi shqiptarë”.

Përfytyrojeni të dashur miq si u bëra kur e lexova këtë. Dhe e kish shkruar një njeri që kam respekt të veçantë, ka pasur një nënë zonjë, dhe unë kam dashur ta bëj president. U trondita shumë. Nuk dija si ta shpjegoja.

Pas një ore më vjen një e-mail nga Ditzi Bushati.

Ai më kish bërë forward raportin që ambasadori kish bërë për mua, por që ia kish nisur gabimisht Ditmirit. Tek subjekti shkruhej. “Kjo është për ju”.

Ja seç thoshte ai:

“I nderuar zoti Kryeministër. Po të shkruaj nga Beogradi dhe për mua ti do të jesh gjithë jetën kryeministri im. Po të njoftoj shkurt për situatën. Takova Jeremiçin dhe më tha i thuaj Doktorit të bëjë kujdes si të ruhet biznesi i Fazlliçit në Portoromano dhe biznesi i atyre miqve të tij që shkrijnë skrap në autostradë nga makinat e vjetra. Takova Daçiçin dhe më tha të të bëj të fala, por ishte i shqetësuar që Rama donte ta bënte linjën e interkonjeksionit me Kosovën. Thuaj Berishës ta denoncojë si korrupsion, më tha. Ke po ashtu të fala nga ata djemtë që u ke dhënë tenderin e kompjuterëve të “moshës internetit” më 2010 dhe më thanë se nuk do t’ia harrojnë kurrë.

Më porositën ta mbrosh këtë çështjen e shamive në shkolla në Kosovë se u intereson shumë. Dhe diçka në fund. Ti e di që unë jam gati të bëj sakrificat më të mëdha për ju. Në çdo kohë çfarëdo të ndodhë, e keni një derë hapur në Beograd sa të jem këtu, por dhe nëse nuk jam, do lë porosi. I yti…”.

Më në fund u qetësova që miku im ambasador kishte bërë një ngatërresë, por prapë u trondita nga aftësia për të pasur jo vetëm dy raporte, por dhe dy karaktere. Ngatërresa e adresave ishte fatale dhe unë akoma nuk e kam mbledhur veten. Ky Edvin Rama kërkon të poshtërojë njerëzit me hile të tilla. Por nuk do ta lejoj. Përpara!

Shënime nga Ditari i Doktorit: Mbi debatet në grupin parlamentar

21:44 Antena

Shënime nga Ditari i Doktorit: Një plan djallëzor për t’u bërë milioner

20:11 Antena

Shënime nga Ditari i Doktorit: Ja faktet pse u shkri krimi ekonomik

20:07 Antena

Shënime nga Ditari i Doktorit: Si po e nëpërkëmbin Gimin e Puros

19:51 Antena

Shënime nga Ditari i Doktorit: Debat për Zonjën e Parë në ditën e Nënë Terezës

19:45 Antena

Shënime nga Ditari i Doktorit: Bashkëbisedim me Bujarin për shqetësimet e tij

21:33 Antena

Shënime nga Ditari i Doktorit: Si ta mbulojmë skandalin e vjedhjes së pikturës

20:24 Antena

Shënime nga Ditari i Doktorit: Dyshimet që po më forcohen për Kunatin

20:58 Antena

Shënime nga Ditari i Doktorit: Përjetime në ditëlindjen e 69-të

20:25 Antena

Shënime nga Ditari i Doktorit: Si e uzurpuan policët e Tahirit pallatin tim

20:28 Antena