Sihariq i "bankierëve" për popullin shqiptar

Një sihariq të madh ka dhënë sot një kompani e huaj rreth asaj që ka ndodhur në zonën e Marinzës. Lajmi u përhap me bujë në gjithë Shqipërinë dhe drejt  zonës janë turrur mijëra banorë, që të përfitojnë nga oferta më e fundit e kompanisë.

Sipas kompanisë, gjatë punës në një pus nafte nga nëntoka,  Zoti ka dërguar një dhuratë për banorët e zonës, e cila kishte kohë që kërkohej. Në njoftimin për shtyp, kompania thotë se “nga matjet e menjëhershme u bë e mundur të identifikohej që gazi i çliruar ishte CO2 (Dioksid karboni). Dioksidi i karbonit (CO2) është një gaz pa ngjyrë, pa erë, vital për jetën në tokë dhe pjesë përbërëse e atmosferës 0.04% (400 ppm), dhe mund të blihet në supermarket, për ata që e pëlqejnë në formën e “dry ice”.“

Kjo dhuratë e jashtëzakonshme për banorët e zonës ka vlera të pallogaritshme. Sapo u njoftua, që gazi që shpërtheu ishte CO2, banorët që kishin ikur të lebetitur nga shtëpitë, ngaqë u kishte shpërthyer uji dhe gazi tek dera, u kthyen me urgjenc dhe kanë turinjtë në baltë që të thithin gazin jetik për organizmin me gojë. Ky gaz ka një të keqe që nuk shikohet me sy, ndaj gjithë banorët po kërkojnë me hundë se ku mund të jetë. Sipas kompanisë, gazi nuk ka as erë, kështu që banorët po i mbajnë hundët mbyllur, mos ta ngatërrojnë me një gaz tjetër që vjen era vezë e prishur, por që besohet se ka ardhur nga qielli dhe jo nga toka.

Nga llogaritë e para, del që banorët kanë kursyer miliona lekë nga marrja falas e këtij gazi, të cilin mund ta blinin me lekë në supermarketin modern të fshatit.

Po ashtu, shpërthimi i këtij gazi, ka balancuar oksigjenin e tepërt që po u merrte jetën nga gjelbërimi në zonë. Me shpërthimin e CO2, oksigjeni është balancuar dhe nuk ka shans të bezdisë më fshatarët e zonës. Shpërthimi i këtij gazi ka bërë të panevojshëm dhe mbajtjen e luleve apo gjelëbrimit në shtëpi, të cilat natën çlirojnë CO2. Tani “CO2” fshatarët mund të marrin dhe ditën pa pagesë.

Pas banorëve të zonës, aty kanë filluar të shfaqen refugjatët e parë, që po tentojnë të pushtojnë fushën, duke ecur këmba-dorës që të thithin këtë gaz dhe të luten që të shpërthejë përsëri fontana.

Kjo i ka bezdisur pak punëtorët e kompanisë, të cilët nuk ua kanë ngenë halleve të njerëzve që kërkojnë gaz falas. Për këtë ata i kanë kërkuar qeverisë, që të mos e tepërojë me mbipopullimin e zones, se ata nuk kanë detyrime, përveç atyre që janë në zonë.

Dalja e këtij gazi konsiderohet si një nga fitoret më të mëdha të industrisë së naftës në Shqipëri, i cili u hap një perspektivë të ndritur banorëve të zonës, pasi i furnizon ata me gaz falas dhe vitalizon jetën e tyre. Pas këtij gazi, fshatarët nuk kanë më nevojë as të pinë ujë nga zona, as të hanë perimet e zonës dhe as të strehohen, por vetëm të thithin këtë gaz dhe jeta e tyre do të ndryshojë përfundimisht.

Ajo që i bën të lumtur dhe krenar banorët e zonës, është se kjo dhuratë e kompanisë përveçse është falas, do të vazhdojë përjetësisht dhe banorët do ta kenë këtë privilegj derisa të jenë gjallë. I vetmi detaj që nuk është përcaktuar, është jetëgjatësia e banorëve pas shpërthimit të gazit. Për këtë, pritet një studim tjetër po nga kjo kompani, e cila do të përcaktojë sesa vjet i duhen akoma banorët në zonë.

Kryesia e fshatit L...falenderon deputetin 2K

20:28 Antena

Kunati urdhëron vjedhjen e biçikletës së Sazanit

19:26 Antena

Kunati heton protestuesin, që prishi mitingun e Vlorës

20:10 Antena

Kunati heton për një Q7 të re të Faros në Durrës

20:35 Antena

Kunati bën profilin e kandidatëve të Tiranës

20:40 Antena

Kunati shpall armik të opozitës, Kunatin e Gonit

19:52 Antena

Kunati sqaron përse PD ka refuzuar koalicionin me partitë e vogla

19:25 Antena

Kunati sqaron Faten për garën e Durrësit

19:02 Antena

Kunati heton korrupsionin tek heqja e TVSH-së për gomerët

19:55 Antena

Grigja i futet punës të lexojë poezi

20:11 Antena